,
გენერალური პროკურატურის განცხადებით, დიდი ოდენობით თანხების სავარაუდო გაფლანგვის საქმეზე საგამოძიებო სამსახური სს "ელექტრომოძრავი შემადგენლობის სარემონტო ქარხნის თბილისის ფილიალში" შევიდა. ეს კომპანია თბილისის მეტროს ვაგონების ტექნიკური მომსახურების გაწევით არის დაკავებული.
თბილისის მერიაში აცხადებენ, რომ საქმე უკავშირდება 12 ვაგონის შეკეთებისთვის, 2023 წელს გაფორმებულ 13.7 მილიონი ლარის ღირებულების კონტრაქტს, რომლის შესრულებაშიც მერიის შიდა აუდიტის სამსახურის თანახმად, მნიშვნელოვანი კითხვის ნიშნები არსებობს, რის გამოც მერიამ მთავარ პროკურატურას მიმართა. საქმე ეხება 2023 წლის ივნისში გაფორმებულ ხელშეკრულებას, რომლის ფარგლებშიც მომსახურების მიწოდება 2023-2024 წლებში ხდებოდა.
მნიშვნელოვანია გარემოება, რომ თავად სს "ელექტრომოძრავი შემადგენლობის სარემონტო ქარხანა" არის ერთობლივი საწარმო, რომლის 50%-ის წილს ფლობს მერიის დაქვემდებარებაში არსებული "თბილისის სატრანსპორტო კომპანია", 50% კი კერძო საკუთრებაშია და ის "ინდუსტრიულ ინვესტმენტს" ეკუთვნის. თავის მხრივ აღნიშნული კომპანიის 50-50%-ის წილი ეკუთვნით გვანცა სალაყაიას და ნოდარ გაგუას. კომპანიის დირექტორია ბიზნესმენი გელა ძიძიკაშვილი. კომპანიის სამეთვალყურეო საბჭოს წევრია თბილისის სატრანსპორტო კომპანიის დირექტორი გიორგი შარკოვი.
პროკურატურის განცხადებაში არაა მითითებული თუ უშუალოდ რამდენი მილიონი ლარის სავარაუდო გაფლანგვაზე მიმდინარეობს გამოძიება.
" აუდიტის ფარგლებში შესწავლილი იქნა შპს ,,თბილისის სატრანსპორტო კომპანიასა“ და სს ,,ელექტრომოძრავი შემადგენლობის სარემონტო ქარხნის თბილისის ფილიალს“ შორის მეტროს მოძრავი შემადგენლობის 12 ვაგონის მოდერნიზაციის მომსახურების მიზნით გაფორმებული ხელშეკრულება.
მასალების შესწავლით გაჩნდა კითხვები, რომელიც საჭიროებს პასუხის გაცემას, შესაბამისად, მასალები შემდგომი რეაგირების მიზნით გადაგზავნილი იქნა საქართველოს მთავარ პროკურატურაში", - განაცხადეს მერიაში.
საქართველოს პროკურატურის ინფორმაციით, ელექტრომოძრავი შემადგენლობის სარემონტო ქარხნის თბილისის ფილიალის პასუხისმგებელი პირების მიერ სამსახურებრივი მდგომარეობის გამოყენებით დიდი ოდენობით ფულადი თანხის მართლსაწინააღმდეგო მითვისებისა და გაფლანგვის ფაქტზე გამოძიება მიმდინარეობს.
პროკურატურის ცნობით, გამოძიების ფარგლებში, სასამართლოს განჩინების საფუძველზე, 3 თებერვალს რამდენიმე მისამართზე საგამოძიებო მოქმედებები, მათ შორის ჩხრეკა, ჩატარდა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
