,
Bloomberg-ზე საქართველოს ტურიზმის ეროვნული ადმინისტრაციის მარკეტინგული კამპანია გრძელდება. გავლენიანი მედია პლატფორმა საქართველოს ტურისტული პოტენციალის შესახებ პირველ სტატიას აქვეყნებს.
„იუთუბერები ჯეიმ პოულ სპარფორდი და ბენჯამინ დევიდ ებრელი კერძებისა და სასმელების თემაზე ყველაზე პოპულარული ვიდეოების შემქმნელები არიან, მათ არხს “Sorted Food” Youtube-ზე 2,7 მილიონი გამომწერი ჰყავს. როგორც ბენი ამბობს YouTube-ზე 13 წელია სხვადასხვა ეროვნული სამზარეულოს შესახებ ამზადებენ ვიდეო მასალებს, თუმცა საქართველოს შესახებ მხოლოდ ერთხელ ისაუბრეს. ამიტომ ახლა კარგი დროა ეს გამოვასწოროთ. Sorted Food-ის გუნდს ვთხოვეთ გაიცნონ საქართველოს სამზარეულო, კულინარიული ტრადიციები, რესტორნები და შეფ-მზარეულები, რითაც საქართველო მსოფლიოში ცნობილი გახდა“,-წერს Bloomberg. სტატიის ავტორის თქმით, ბენი და ჯეიმი მოგზაურებს ძირითად დასავლეთის ქვეყნებიდან მოიზიდავენ საქართველოში.
„შემიძლია რუკაზე ზუსტად გაჩვენოთ საქართველო“, -ამბობს ჯეიმი. „მრავალფეროვანი ტრადიციებით გამორჩეული საქართველო ძალიან ძველი ქვეყანაა, რომელიც გზაჯვარედინზე მდებარეობს, თბილისი ძალიან თანამედროვეა. საქართველო ავსტრიასა და ირლანდიაზე მცირე ზომის ქვეყანაა, თუ დროში შეზღუდული ხართ არა უშავს, თქვენ მაინც მოასწრებთ ისტორიული ქალაქების, მშვენიერი მთის სოფლების, საზღვაო, სამთო კურორტებისა და ღვინის რეგიონების მონახულებას. ჩვენ ჯეიმს და ბენს ამ საზაფხულო მოგზაურობაში გავყევით, რომ კარგად გაეცნოთ ქართული კერძები, ღირსშესანიშნაობები და კულტურა“,-წერს Bloomberg.
სტატიაში აღწერილია ცნობილი იუთუბერების მოგზაურობა ძველ თბილისში, გოგირდის აბანოები, დედაქალაქის ისტორიული ადგილები, რესტორნები, კერძები, შეხვედრები ცნობილ მზარეულებთან. Bloomberg სტატიაში აღწერს თუ როგორ მოამზადეს ცნობილმა იუთუბერებმა ხინკალი ქართველი მზარეულების დახმარებით, როგორ გაეცნენ ქართულ სუფრას, სადღეგრძელოებს, რიტუალებს, პოლიფონიურ სიმღერებს და რა თქმა უნდა ღვინის მომზადებას.
„ მას შემდეგ რაც თბილისს გავცდით, ჩვენმა კერძების მკვლევრებმა საქართველოს ერთ-ერთი უძველესი ტრადიციის მეღვინეობის შესწავლა დაიწყეს. სექტემბერი მოსავლის აღების საუკეთესო პერიოდია, ამ პერიოდში ფესტივალები იმართება, თუმცა კახეთში, ღვინის მწარმოებელ მხარეში, ნებისმიერ დროს შეგიძლიათ შეისწავლოთ და გაეცნოთ ქართულ ღვინოს. ჩვენ ფრანგული სტილის შატოს ვესტუმრეთ. მე-19 საუკუნეში აგებული წინანდლის მამული, ალექსანდრე ჭავჭავაძის დროს, საქართველოს ინტელექტუალური და კულტურული ცხოვრების ცენტრი იყო“,-წერს Bloomberg. სტატიაში აღწერილია ქართული ღვინის 8 ათასწლოვანი ტრადიცია, პურის დამზადების მასტერკლასები, თელავის ვაზარი, ყველი, ნადუღი და მაწონი.
ტურიზმის ეროვნული ადმინისტრაციის მასშტაბური მარკეტინგული კამპანიის ფარგლებში Bloomberg საქართველოს შესახებ კიდევ ერთი სტატიას გამოაქვეყნებს, მზადდება ვიდეორგოლები. უკვე მიმდინარეობს სარეკლამო კამპანია სოციალურ მედიაში, (Facebook, Twitter, Instagram, Youtube, TikTok) რომელიც წლის ბოლომდე გაგრძელდება.
კამპანიის მიზანია მსოფლიოს სხვადასხვა ქვეყნიდან მაღალმხარჯველი ტურისტების მოზიდვა.
https://sponsored.bloomberg.com/article/a-food-filled-adventure-through-georgia
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
