,
რუსეთის საგარეო საქმეთა მინისტრის სერგეი ლავროვის განცხადებით, ვლადიმერ პუტინი მზად, არის უკრაინის პრეზიდენტს ვოლოდიმირ ზელენსკის შეხვდეს იმ შემთხვევაში, თუ მოლაპარაკებაზე განსახილველი საკითხები შეხვედრამდე იქნება მომზადებული.
ლავროვი ამბობს, რომ რუსეთი თანახმაა, დასავლეთმა უკრაინას უსაფრთხოების კოლექტიური გარანტია მისცეს, რომლის პრინციპებიც ფაქტობრივად, 2022 წელს სტამბოლში შეხვედრისას იყო შეთანხმებული.
მაშინ სტამბოლში მოსკოვის ერთ-ერთი პირობა უკრაინის არმიის რიცხობრივი შემადგენლობის შემცირება და უკრაინის ნეიტრალიტეტი იყო.
„ჩვენს პრეზიდენტს არაერთხელ უთქვამს, რომ ის მზად არის, შეხვდეს მათ შორის ბატონ ზელენსკის იმის გააზრებით, რომ ყველა საკითხი, რომელიც მაღალ დონეზე განხილვას საჭიროებს, კარგად დამუშავდება, და ექსპერტები, მინისტრები შესაბამის რეკომენდაციებს მოამზადებენ - რა თქმა უნდა იმის გაგებით, რომ როცა, იმედი მაქვს, საქმე მომავალი შეთანხმების ხელმოწერამდე მივა, იმ პერსონის ლეგიტიმაციის საკითხი გადაწყვეტილი იქნება, რომელმაც ამ შეთანხმებას ხელი უნდა მოაწეროს“, - თქვა ლავროვმა.
დიდი შვიდეულის“ ქვეყნებისა და ევროკავშირის ლიდერებმა, ურსულა ფონ დერ ლაიენმა და ანტონიო კოშტამ იოჰანესბურგში „დიდი ოცეულის“ სამიტის ფარგლებში გამართულ შეხვედრაზე ვაშინგტონის მიერ უკრაინისთვის შეთავაზებული სამშვიდობო გეგმა განიხილეს, - ინფორმაციას Reuters-ი ავრცელებს.
გამოცემის ცნობით, შეხვედრას ასევე ესწრებოდნენ ფინეთის, ნორვეგიის, ესპანეთისა და ნიდერლანდების ლიდერები.
დისკუსიის დაწყებამდე საფრანგეთის, გაერთიანებული სამეფოსა და გერმანიის არაფორმალური უსაფრთხოების ალიანსის შეხვედრა გაიმართა.
შეერთებული შტატები და რუსეთი უკრაინაში მიმდინარე ომის დასრულების შესახებ 28-პუნქტიან გეგმაზე მოლაპარაკებებს აწარმოებენ, თუმცა ბრიუსელი მოლაპარაკებებში არ არის ჩართული. ევროკომისიის პრეზიდენტმა, ფონ დერ ლაიენმა გუშინ განაცხადა, რომ უკრაინის პრეზიდენტ ვოლოდიმირ ზელენსკის დაუკავშირდება.
ზელენსკიმ განაცხადა, რომ მზადაა ვაშინგტონთან „კონსტრუქციული და პატიოსანი თანამშრომლობისთვის“. უკრაინის ეროვნული უსაფრთხოებისა და თავდაცვის საბჭოს მდივანმა, რუსტემ უმეროვმა, დღეს გაავრცელა ინფორმაცია, რომ კიევი, აშშ-სთან კონსულტაციებს მომავალ კვირას შვეიცარიაში იწყებს.
