,
2023 წლის 5 აპრილს პირველი საჯარო ლექცია წაიკითხა გამორჩეულად ნიჭიერმა მოზარდმა, ბრიტანულ-ქართული აკადემიის მე-8 კლასის მოსწავლემ კიაზო ნადარეიშვილმა, რომელმაც სალექციო თემად უფროსთათვისაც კი არცთუ ადვილი პრობლემის – „განათლების სისტემის განვითარების ეტაპები და არსებული გამოწვევების“ განხილვა აირჩია.
პატარა ვუნდერკინდმა ისაუბრა განათლების სისტემის ჩამოყალიბების საწყისებზე ძველი წელთაღრიცხვიდან მოყოლებული თანამედროვეობამდე, მიმოიხილა ძველი მსოფლიოს წამყვანი ქვეყნების საერო და სასულიერო სასწავლო კერების სწავლების მეთოდები, ხარისხი, გამოყენების შესაძლებლობები, იმსჯელა სწავლებისა და განათლების როლზე კაცობრიობის ისტორიაში.
პატარა პრეზენტატორმა საქართველოს გეოპოლიტიკური მდებარეობის მიხედვით ისაუბრა პრიორიტეტებზე, გამოწვევებსა და საფრთხეებზე; შესაძლებლობებზე, რომლებიც მას რეგიონული ალიანსის მთავარ მოთამაშედ გახდის. საინტერესოა, რომ ამ პრობლემაზე მსჯელობისას, მას არგუმენტებად სათანადო და კარგად შერჩეული ამონარიდები მოჰყავდა სსუ-ს რექტორის, პროფესორ ზურაბ ხონელიძის მონოგრაფიიდან „მშვიდობის ქართული პარადიგმა“.
კიაზო გამორჩეულად ნიჭიერი ახალგაზრდაა. მის თითოეულ ნაფიქრში, თითოეულ წინადადებაში იგრძნობა განათლების სიღრმე ნებისმიერი სამეცნიერო მიმართულებით. კიაზოს გამორჩეულობა მისი აზროვნების მასშტაბურობაა. მისი ხედვა მსოფლიოს გეოპოლიტიკური მოწყობის, მართვის, კონფლიქტების თუ მათი დარეგულირების შესახებ, ბევრ ზრდასრულ ადამიანს დაამშვენებდა.
სოხუმის სახელმწიფო უნივერსიტეტის რექტორმა, პროფესორმა ზურაბ ხონელიძემ საინტერესო მოხსენებისთვის მადლობა გადაუხადა პატარა მეგობარს და აღნიშნა: „კიაზომ, როგორც სკოლიდან, ასევე სხვადასხვა წყაროდან, დააგროვა დიდი ცოდნა, რამაც განაპირობა მისი ხედვის ჩამოყალიბება. ის არის უკვე ჩამოყალიბებული, სახელმწიფოებრივად მოაზროვნე ახალგაზრდა და მინდა მადლობა გადავუხადო მის მშობლებს და ბრიტანულ-ქართულ აკადემიას ასეთი გონიერი, პატრიოტი და ქვეყნისთვის სასახელო შვილის აღზრდისთვის“.
დასასრულს, სსუ-ს რექტორმა პატარა მეცნიერს საგანგებო სიგელები გადასცა სოხუმის სახელმწიფო უნივერსიტეტისა და საქართველოს განათლების მეცნიერების აკადემიის სახელით.
