,
„ურეკში გაკეთებული ბულვარის ნაწილი სასაკლაოა“ - ეს განცხადება „საქმიანი დილის“ ეთერში სასტუმრო „კოლხიდას“ დამფუძნებელმა ხათუნა ლაგაზიძემ გააკეთა. მისი განმარტებით, წელს ბულვარის მოწყობა დაიწყო, თუმცა სამანქანო მოძრაობა არ ჩაკეტილა, რის გამოც დამსვენებლებისთვის საფრთხე ძალიან მაღალია.
ლაგაზიძე აქცენტს კურორტის პოპულარიზაციის მნიშვნელობაზე აკეთებს და ამბობს, რომ შესაბამისი უწყებების მხრიდან დაინტერესების შემთხვევავში, პროცესებში ადგილობრივი ბიზნესის წარმომადგენლებიც აქტიურად ჩაერთვებიან.
„ურეკი არის უმეტესად ბავშვთა და საოჯახო კურორტი და მის მიმართ დაინტერესება ნულოვანია. მხოლოდ გასულ წელს გაკეთდა წყალმომარაგება, კანალიზაცია და გაზიფიცირება. წელს კი დაიწყეს ბულვარის ნაწილის კეთება, რომელიც პირდაპირი მნიშვნელობით სასაკლაოა, იმიტომ რომ არ ჩაკეტეს სამანქანო მოძრაობა. უპრეცედენტო რაღაც ხდება, არაერთხელ მივმართეთ და არ გაითვალისწინეს, პირდაპირ მანქანების შეჯიბრება იმართება ბულვარის ნაწილზე, ზედ სანაპირო ზოლზე, სასტუმროდან რომ ბავშვი მშობელს გაექცეს, შესაძლოა, მანქანამ გადათელოს და მერე ამ უბედურებაზე პასუხს ვინ აგებს?
გქონდეს ასეთი განძი, რომელსაც აქვს მთელი წლის მუშაობის რესურსი და ყველაზე მოუვლელი და უპატრონო იყოს, ამ პირობებში რა ეკონომიკურ განვითარებაზე ვსაუბრობთ? გასაგებია, რომ იქ განაშენიანება ისეა დარღვეული, რომ რთულია სპამარგალიტი გააკეთო, მაგრამ თუ არ დავიწყეთ ამ მიმართულებით მუშაობა, არასდროს იქნება. არადა მას აქვს რესურსი, რომ გურიის და სამეგრელოს მიმდებარედ მოსახლეობა დაასაქმოს და სოფლის მეურნეობაც მიიბას, მაგრამ სისტემაურად და სტატეგიულად არავინ აზროვნებს.
ჩეხეთში არის მაგნიტოთერაპიის ინსტიტუტები, სადაც იმ შედეგს, რაც აქ ბუნებრივად დგება, სამედიცინო აპარატურის გამოყენებით აღწევენ. გავუგზავნეთ მათ ჩვენი კვლევები და აპირებდნენ 3 წლის ვადით ჩამოსვლას, უნდა მომხდარიყო პაციენტების დახვედრება და შედეგების შედარება, თუმცა ამ პროცესს მაშინ ხელი 2008 წლის ომმა შეუშალა. წლების შემდეგ კვირიკაშვილის ეკონომიკის მინისტრობისასაც მივმართეთ იგივე თხოვნით, მაგრამ მაშინ ამ თემით ჯანდაცვის სამინისტრო არ დაინტერესდა და დარჩა კურორტი წლების განმავლობაში უპატრონოდ. ყველანაირი ტიპის თანამშრომლობისთვის მზად ვართ მათ შორის ფინანსურ ნაწილშიც, ოღონდ კი დაიწყოს ამ მიმართულებით მუშაობა და ყურადღება გამოიჩინონ.“ - განაცხადა ლაგაზიძემ.
რაც შეეხება წლევანდელ სეზონზე კურორტის დატვირთულობის მაჩვენებელს და ფასებს, სასტუმრო „კოლხიდას“ მფლობელი ამბობს, რომ ინტერესი ამ ეტაპზე ადგილობრივი მოსახლეობისგან იკვეთება, ფასები კი 2019 წელთან შედარებით განახევრებულია.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
