თბილისის მერიაში დედაქალაქის მთავრობის სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და აღნიშნა, რომ ცენტრალურმა ხელისუფლებამ მუნიციპალიტეტს თიანეთის გზატკეცილზე მდებარე მიწის ნაკვეთი გადასცა, რომელსაც სამომავლოდ განავითარებს.

მისი თქმით, მიწის ნაკვეთი წინა ხელისუფლების დროს 20 წლის ვადით გასხვისდა და დღეს იქ მძიმე მდგომარეობაა.

„ჩვენ განსაკუთრებულ ყურადღებას ვუთმობთ სპორტული მოედნების, რეკრეაციული სივრცეების არსებობას დედაქალაქში. ყველა მსგავსი ტიპის პროექტის განხორციელების დროს გათვალისწინებულია სპორტული არეალების მოწყობა, რადგან ჯანსაღი ცხოვრების წესის პოპულარიზაცია ძალიან მნიშვნელოვანია. წლების წინ, 2012 წლამდე იყო ძალიან მავნე პრაქტიკა, როდესაც სპორტულ მოედნებს ასხვისებდნენ და იქ საცხოვრებელ კორპუსებს აშენებდნენ. ასევე, ხდებოდა პარკების და სკვერების გასხვისება, რაც ძალიან მძიმეა. ჩვენ დამოკიდებულება აბსოლუტურად შევცვალეთ. ქალაქი ვითარდება. მშენებლობები მიმდინარეობს, მაგრამ ეს ყველაფერი ხდება ურბანულად სწორად და არა სპორტული მოედნებისა და მწვანე სივრცეების ხარჯზე.

სახელმწიფომ რამდენიმე დღის წინ მუნიციპალიტეტს საკუთრებაში გადმოსცა გლდანში, თიანეთის გზატკეცილის N37ა-ში მდებარე 23 789 კვ.მ მიწის ნაკვეთი. გლდანში მცხოვრებ მოსახლეობას კარგად ეცოდინება ე.წ. ამერის სტადიონი, სადაც ადრე ორი სპორტული მოედანი იყო. 2004 წელს, წინა ხელისუფლების დროს აღნიშნული ტერიტორია 20 წლის ვადით გადაეცა კერძო მესაკუთრეს და მას მოვლა-პატრონობისა და განვითარების არანაირი ვალდებულება არ ჰქონია. დღეს იქ ძალიან მძიმე მდგომარეობაა“, - განაცხადა კახა კალაძემ.

ამასთან, დედაქალაქის მერმა ცენტრალურ ხელისუფლებას მადლობა გადაუხადა აღნიშნული ტერიტორიის მუნიციპალიტეტისთვის გადაცემისთვის.

„პირველ რიგში, მინდა, ცენტრალურ ხელისუფლებას, სპორტის სამინისტროს, მინისტრ შალვა გოგოლაძეს მადლობა გადავუხადო, რომ აღნიშნული ინფრასტრუქტურა მერიას გადმოეცა. ჩვენ გლდანის მოსახლეობას ვპირდებით, რომ ეს იქნება ერთ-ერთი საუკეთესო სავარჯიშო კომპლექსი, რომელიც მთლიანად რეაბილიტირდება, თავისი ახალი საფარით, შესაბამისი ინფრასტრუქტურით, გასახდელებით, საშხაპეებით და ა.შ. ტერიტორია მთლიანად გამწვანდება და განახლდება“, - განაცხადა თბილისის მერმა.

მთავრობის დღევანდელ სხდომაზე აღინიშნა, რომ დიდი ლილოს საყოფაცხოვრებო ნარჩენების პოლიგონზე ახლო მომავალში მასშტაბური პროექტების განხორციელება დაიწყება - გამოვლენილია საპროექტო და სამშენებლო ტენდერის გამარჯვებული კომპანია და შესაბამის ხელშეკრულებას ხელი დღეს მოეწერება.

„პროექტი მნიშვნელოვანია გარემოს დაცვის თვალსაზრისით და ადგილობრივი მოსახლეობის საცხოვრებელი პირობების გაუმჯობესებისთვის. ადგილობრივ მოსახლეობასთან, რომელსაც შექმნილი აქვს საინიციატივო ჯგუფი, არაერთი შეხვედრა გავმართეთ. მათ მივეცი პირობა, რომ იქ არსებული მდგომარეობა მოწესრიგდებოდა. აღნიშნულ ნაგავსაყრელზე მთელი რიგი პრობლემები არსებობს. ასევე, ხაზი მინდა გავუსვა იმას, რომ დაწყებული გვაქვს ახალი არეალის მოძიება, სადაც შესაძლებელი იქნება ნაგავსაყრელის გადატანა. ამაში ჩართულია შესაბამისი კომპანიები, რათა ქალაქიდან მოშორებით განხორციელდეს ახალი პროექტი. რა თქმა უნდა, არსებული ნაგავსაყრელის იმ პირობებში დატოვება, რა პირობებშიც ის დღეს არის, წარმოუდგენელი და ძალიან მძიმეა“, - განაცხადა კახა კალაძემ.

მისი თქმით, დედაქალაქის მთავრობა აღნიშნულ პროექტს ევროპის რეკონსტრუქციისა და განვითარების ბანკთან (EBRD) თანამშრომლობით განახორციელებს.

„აქტიურად ვთანამშრომლობთ ევროპის რეკონსტრუქციისა და განვითარების ბანკთან (EBRD), რადგან უცხოელი ექსპერტების ჩართულობის გარეშე, რთულია ამ ტიპის სამუშაოების ჩატარება. ჩვენ ამ მიმართულებით არ გვყავს ძლიერი სპეციალისტები. პროექტის ღირებულება 6,5 მლნ ევროს შეადგენს“, - განაცხადა დედაქალაქის მერმა.

მას ასევე აღნიშნა, რომ სამუშაოებს შპს „თბილსერვის ჯგუფის“ დაკვეთით, შპს „გუმბათი ჰოლდინგი“ შეასრულებს.

„კონტრაქტორი კომპანია პროექტის მომზადებას ხვალიდან დაიწყებს. შესაბამისი ინფრასტრუქტურის მოწყობის შემდეგ, ლილოს პოლიგონზე ყველაზე დიდი გარემოსდაცვითი პრობლემა მოგვარდება და შემცირდება ის აუტანელი სუნი, რაც წლების განმავლობაში აწუხებს მოსახლეობას. ნაგავსაყრელი ეტაპობრივად გაიწმინდება წლების განმავლობაში დაგროვებული ნაჟური წყლებისგან, ახალი განთავსებული ნარჩენებისგან წარმოქმნილი სითხე ავტომატურად გაიფილტრება და ის პრობლემა, რაც სუნს უკავშირდებოდა, მთლიანად მოიხსნება. აღნიშნული კომპანია, „გუმბათი ჰოლდინგი“ მაქვს მხედველობაში, ბერძნულ საპროექტო და გერმანულ მწარმოებელ კომპანიებთან ერთად იმუშავებს. პროექტირებისა და სამუშაოების განხორციელების ვადა 12 თვეა“, - განაცხადა კახა კალაძემ.

მისივე თქმით, შესაბამისი ტენდერი EBRD-მა საერთაშორისო წესებისა და პირობების დაცვით ჩაატარა.

გარდა ამისა, დედაქალაქის მერმა აღნიშნა, რომ ურბანული წესრიგის დაცვის მიზნით, მუნიციპალური ინსპექციის მიერ ახალი პროექტი - მოტოინსპექცია შეიქმნა, რომელიც დედაქალაქის იერსახის, გარემოს დანაგვიანების და აკუსტიკური ხმაურის კონტროლს, ასევე, სამშენებლო და ადმინისტრაციულ სამართალდარღვევებზე ოპერატიულ  რეაგირებას განახორციელებს.

„ურბანული წესრიგის დაცვა და შესაბამისი ღონისძიებების გატარება ჩვენს ერთ-ერთ პრიორიტეტს წარმოადგენს. ამ მიმართულებით არაერთი ქმედითი ნაბიჯი გადაიდგა. ამჯერად, გაგაცნობთ თბილისის მუნიციპალური ინსპექციის პროექტს, რომელიც დაგვეხმარება დროში ეფექტურად და ოპერატიულად ვმართოთ წესრიგის დაცვის ღონისძიებები დედაქალაქის ტურისტულ და ისტორიულ ზონებში, ცენტრალურ მოედნებსა და გამზირებზე“, - განაცხადა კახა კალაძემ.

დედაქალაქის მერის თქმით, მოტოინსპექცია აღიჭურვა ევროპული სტანდარტის ტრიციკლებით, სპეცეკიპირებით და თანამედროვე ტექნოლოგიებით.

„პროექტის მიზანია, ისტორიულ და ტურისტულ ზონებში, ცენტრალურ მოედნებსა და გამზირებზე ეფექტურად მართოს ურბანული წესრიგი და გაატაროს შესაბამისი ღონისძიებები. მუნიციპალური ინსპექციის თანამშრომლებმა გაიარეს სპეციალური მომზადება; სამსახურის მიერ შესყიდული იქნა 20 ერთეული ტრიციკლი“, - აღნიშნა კახა კალაძემ.

მისივე განცხადებით, მსოფლიო პოპვარსკვლავის ჯასტინ ტიმბერლეიკის კონცერტზე დამსწრე საზოგადოების შეუფერხებელი გადაადგილების მიზნით, „დინამო არენას“ მიმდებარე ტერიტორიაზე მოძრავი მუნიციპალური ავტობუსების ნაწილი და მეტრო გახანგრძლივებული დროით იმუშავებს.

„კონცერტზე დამსწრე საზოგადოების შეუფერხებელი გადაადგილების მიზნით, „დინამო არენას“ მიმდებარე ტერიტორიაზე მოძრავი მუნიციპალური ავტობუსები და მეტრო, გახანგრძლივებული დროით, 24 ივლისის 02:00 საათამდე იმუშავებს. აღნიშნულ პერიოდში ავტოტრანსპორტი გადაადგილდება ალტერნატიული მარშრუტებით. კონცერტი 21:00 საათზე დაიწყება. ავტობუსების მარშრუტების შესახებ დეტალური ინფორმაცია უკვე გავავრცელეთ, თუმცა დაინტერესებულ პირებს, მისი მოძიება თბილისის მერიის ვებგვერდზე, ასევე, სოციალურ ქსელში, ტრანსპორტისა და ურბანული განვითარების სააგენტოს გვერდზე შეუძლიათ“, - განაცხადა კახა კალაძემ.

მისივე თქმით, „სთარინგ ჯორჯიას“ მიერ დაგეგმილი კონცერტის გამო, „დინამო არენას“ მიმდებარე ტერიტორიაზე ავტოტრანსპორტის მოძრაობაც შეიზღუდება. შეზღუდვა 24 ივლისის 01:00 საათამდე იმოქმედებს.