,
ჩვენი მიზანია, რაც შეიძლება მალე გავხდეთ ევროპული დიდი ოჯახის წევრი ქვეყანა, მივიღოთ კანდიდატის სტატუსი, მაგრამ ეს არ ნიშნავს იმას, რომ ჩვენ უარი ვთქვათ ჩვენს ქვეყანაზე, ჩვენი ქვეყნის ინტერესების დაცვაზე, - ამის შესახებ პარტია „ქართული ოცნების“ გენერალურმა მდივანმა, თბილისის მერმა, კახა კალაძემ ჟურნალისტებს გურიაში განუცხადა.
მისი თქმით, საქართველოსთან დაკავშირებით არასამართლიანი გადაწყვეტილება იყო მიღებული, როდესაც ქვეყანას კანდიდატის სტატუსი არ მიანიჭეს.
„საქართველოსთან მიმართებაში მოიქცნენ არასწორად, არასამართლიანად და ჩვენი ქვეყანა და ჩვენი ხალხი დაჩაგრეს, რომ სტატუსი არ მოგვანიჭეს, თუმცა მე ძალიან უბრალოდ ვსაუბრობ., რომ ხალხმა ყველაფერი გაიგოს. საზოგადოების დიდი ნაწილი ყველაფერს ხვდება, თუ რატომ არ მისცეს მაშინ ქვეყანას სტატუსი. კიდევ ერთხელ ავხსნი, ეს სჭირდებოდათ პოლიტიკური მიზნებისთვის, რომ მოეხდინათ ქვეყანაში არეულობა, მოეხდინათ ხელისუფლების ცვლილება ყველანაირი მეთოდებით, იყო ამის მცდელობა, რომ ხალხისთვის ეთქვათ, აი, იცით რა არის? თქვენ კარგი ხალხი ხართ, იმსახურებთ ევროპას, ევროპულ მომავალს, მაგრამ აი, ხელისუფლება გყავთ ცუდი. ეს ნარატივი ჰქონდათ და სამწუხაროდ, დღესაც, ზოგიერთ შემთხვევებში ვისმენთ აღნიშნულ მესიჯს, რაც ძალიან მძიმეა, დამაზიანებელია. კიდევ ერთხელ, ხაზი მინდა გავუსვა ერთ რამეს, თუ ვინმემ, რაიმე წარმატებას მიაღწია ევროინტეგრაციის გზაზე, ეს არის „ქართული ოცნება - დემოკრატიული საქართველო“ ჩვენი ქვეყნის მოსახლეობასთან ერთად. თუ რაიმე წინგადადგმული ნაბიჯი გვაქვს რეფორმების თვალსაზრისით, ეს უკავშირდება 2012 წლის შემდგომ პერიოდს: ვიზალიბერალიზაცია, ასოცირების შეთანხმება, თავისუფალი ვაჭრობის შეთანხმება და ასე შემდეგ.
ჩვენ ევროინტეგრაციის გზაზე მსვლელობას ვაგრძელებთ, რეფორმების განხორციელებას. ჩვენი მიზანია, რაც შეიძლება მალე გავხდეთ ევროპული დიდი ოჯახის წევრი ქვეყანა, შევუერთდეთ ევროპის ოჯახს, მივიღოთ კანდიდატის სტატუსი, მაგრამ ეს არ ნიშნავს იმას, რომ ჩვენ უარი ვთქვათ ჩვენს ქვეყანაზე, ჩვენი ქვეყნის ინტერესების დაცვაზე“, - განაცხადა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
