,
„ქართული ოცნების“ გენერალური მდივნის, კახა კალაძის განცხადებით, პირადად მას და ასევე მის თანაგუნდელებსაც არაერთხელ მოუწიათ განცხადების გაკეთება იმაზე, რომ პრემიერ-მინისტრ ირაკლი ღარიბაშვილის ჩარტერული რეისისთვის „ბიუჯეტიდან ერთი თეთრი არ დახარჯულა“.
„მთელი ამ დღეების განმავლობაში მიმდინარეობდა მიზანმიმართული დეზინფორმაცია, შეტევა პრემიერ-მინისტრზე, მის ოჯახზე, არასწორი ინფორმაციის გავრცელება, მიუხედავად იმისა, რომ დარწმუნებული ვარ, აბსოლუტურად ყველაფერი იცით და აბსოლუტურად ყველაფერი იცოდა ოპოზიციამ. მთელი ამ ხნის განმავლობაში პროპაგანდა გქონდათ იმისა, რომ თითქოს ბიუჯეტის თანხები დაიხარჯა და მცდელობა, საზოგადოება შეცდომაში შეგეყვანათ მიუხედავად იმისა, რომ მეც ბევრჯერ მომიწია განცხადების გაკეთება, ჩემს თანაგუნდელებსაც, რომ აღნიშნულ ფრენასთან დაკავშირებით ბიუჯეტიდან ერთი თეთრი არ დახარჯულა. დღეს, ნახეთ, როგორი სიტუაცია გაქვთ - უკვე მიიღეთ ინფორმაცია და კონკრეტიკა, მიუხედავად იმისა, რომ ყველაფერი იცოდით, დღეს პროპაგანდის უკვე ახალი ფურცელი დაიწყეთ“, - განაცხადა კალაძემ.
მან უპასუხა ჟურნალისტების შეკითხვას, თუ საიდან ჰქონდა პრემიერ-მინისტრის პენსიონერ მამას იმ ოდენობის თანხა, რომ მისი შვილის ჩარტერული რესი დაეფინანსებინა.
„შეიძლება ჩემი მხრიდან დეტალებში შესვლა უხერხული იყოს. თანამდებობის პირებს გვაქვს ვალდებულება ყოველი წლის ბოლოს წარმოვადგინოთ ჩვენი დეკლარაცია და დაელოდეთ დეკლარაციას, ყველაფერი გაწერილი და მითითებული იქნება. რა პარალელი მინდა გავავლო? ნახეთ, როგორ ხდება მიზანმიმართული დეზინფორმაციის გავრცელება „ქართული ოცნების“ წარმომადგენლების მიმართ. სულ რამდენიმე კვირის წინ, აღნიშნული პროპაგანდის მსხვერპლი მე და ჩემი ოჯახიც ვიყავით. მთელი ამ ხნის განმავლობაში თავს მამართლებინებდით, რატომ არ დაიხოცნენ ჩემი შვილები შოვში. ეს პროპაგანდა გქონდათ თქვენ და ეს ყველაფერი, როგორ დაგიბრუნდათ გახსოვთ. როგორ დალაგდით ყველა, ჟურნალისტებიდან დაწყებული პოლიტიკოსებით დამთავრებული - როგორ და ვის მოუვიდა აზრად კახა კალაძემ ვერტმფრენი გამოიყენა და სხვები მიატოვაო. იმიტომ, რომ თქვენ თვითონ ჩავარდით მძიმე მდგომარეობაში იმიტომ, რომ ნახეთ, როგორი იყო ხალხის აგრესია თქვენ მიმართ, სიბინძურეები, რომელიც თქვენ იკადრეთ და გააკეთეთ. არ იფიქროთ, რომ კონკრეტულად რომელიმე თქვენგანზე ვამბობ, ზოგად მიმართულებაზე ვსაუბრობ. ამიტომ, არ შეიძლება ასეთი მიდგომები და დამოკიდებულებები. ალბათ ამას გარკვეული დრო და წლების დასჭირდება, რომ შეიცვალოს“, - განაცხადა კახა კალაძემ.
გერმანიის კანცლერმა, ფრიდრიხ მერცმა განაცხადა, რომ ირანი ამერიკის შეერთებულ შტატებს „ამცირებს“. მან გააკრიტიკა ვაშინგტონის მცდელობები, თავი დააღწიოს ომს, რომელშიც ის ყოველგვარი მკაფიო მიზნების დასახვის გარეშე ჩაება.
„ირანელები აშკარად ძალიან დახვეწილები არიან მოლაპარაკებებში, ან უფრო სწორად, ძალიან დახვეწილები არიან მოლაპარაკებების არწარმოებაში - ისინი აიძულებენ ამერიკელებს ჩავიდნენ ისლამაბადში და შემდეგ კვლავ ყოველგვარი შედეგის გარეშე წამოვიდნენ“, - განაცხადა მერცმა ცენტრალურ გერმანიაში, ქალაქ მარსბერგის ერთ-ერთ სკოლაში სტუმრობისას.
მან გააკრიტიკა ის, რასაც ამერიკული სტრატეგიის ნაკლებობა უწოდა და ერაყისა და ავღანეთის მაგალითებზე მიუთითა, როგორც გაფრთხილებაზე იმ ომებში ჩაბმის შესახებ, რომელთაც გამოსვლის სტრატეგია არ გააჩნიათ.
„ეს საქმე, რბილად რომ ვთქვათ, გაუაზრებელია“, - თქვა მერცმა. „ამ მომენტში მე ვერ ვხედავ, თუ რა სტრატეგიულ გამოსავალს ირჩევენ ახლა ამერიკელები“.
მან კიდევ ერთხელ დაადასტურა ბერლინის სურვილი, რომ ომი რაც შეიძლება მალე დასრულდეს, რათა თავიდან იქნას აცილებული მსოფლიო ეკონომიკის შემდგომი დაზიანება.
გერმანია იმ კოალიციის ნაწილია, რომელსაც ბრიტანეთი და საფრანგეთი ხელმძღვანელობენ და რომელიც მიზნად ისახავს ჰორმუზის სრუტეში გემების უსაფრთხო გადაადგილების უზრუნველყოფას მას შემდეგ, რაც მიღწეული იქნება ცეცხლის მუდმივი შეწყვეტა.
„ჩვენ შევთავაზეთ გერმანიიდან ნაღმსაწინააღმდეგო ხომალდების გაგზავნა, რათა დავეხმაროთ სრუტის ნაღმებისგან გათავისუფლებაში, რადგან ის აშკარად, სულ მცირე ნაწილობრივ მაინც, დანაღმულია“, - განაცხადა მან.
„ჩვენ შეგვიძლია დახმარების გაწევა, მაგრამ ჯერ საბრძოლო მოქმედებები უნდა დასრულდეს. ამჟამად მე ვერ ვხედავ, როგორ შეიძლება ამის განხორციელება უახლოეს მომავალში, რადგან ირანელები აშკარად იმაზე ძლიერები აღმოჩნდნენ, ვიდრე ეგონათ, ხოლო ამერიკელებს, როგორც ჩანს, დამაჯერებელი მოლაპარაკებების სტრატეგია არ გააჩნიათ“, - დასძინა მან.
