,
აშშ-ის სამაუწყებლო კომპანია Voice of America („ამერიკის ხმა“) სათაურით „წინსვლის საუკეთესო გზაა, გადასცე ჩირაღდანი ახალ თაობას", აქვეყნებს აშშ-ის პრეზიდენტის ჯოზეფ ბაიდენის ამერიკელი ერისადმი მიმართვის შინაარსს:
გთავაზობთ პუბლიკაციის ტექსტს:
პრეზიდენტმა ჯო ბაიდენმა ოთხშაბათს, თეთრი სახლის ოვალური კაბინეტიდან ერისადმი მიმართვისას თქვა, რომ ის „ჩირაღდნას ახალ თაობას გადასცემს“.
ერისადმი მიმართვისას, ბაიდენმა ამერიკელებს პირველად აუხსნა, რატომ გადაწყვიტა, მეორე ვადით პრეზიდენტობისთვის აღარ ებრძოლა.
„გადავწყვიტე, რომ წინსვლის საუკეთესო გზაა, გადასცე ჩირაღდანი ახალ თაობას. ჩვენი ერის გაერთიანების საუკეთესო გზა ეს არის“ - განაცხადა ბაიდენმა. ბაიდენმა გადაწყვეტილება მისი პარტიის წევრების, დემოკრატების მხრიდან რამდენიმე კვირიანი ზეწოლის ფონზე მიიღო.
“მე ვეთაყვანები ამ კაბინეტს, მაგრამ ჩემი ქვეყანა უფრო მიყვარს“, - თქვა ბაიდენმა.
ბაიდენი განზე განდგომისკენ, პრეზიდენტ დონალდ ტრამპმთან ცუდად ჩატარებული დებატების შემდეგ, მოუწოდებდნენ, რამაც კითხვები გააჩინა მის ფიზიკურ და გონებრივ შესაძლებლობებთან დაკავშირებით.
„დიდებული რამ ამერიკის შესახებ ისაა, რომ აქ მეფეები და დიქტატორები არ მართავენ. ხალხი მართავს. ისტორია თქვენს ხელშია. ძალაუფლება თქვენს ხელშია. ამერიკის იდეა - თქვენს ხელშია“, - განაცხადა პრეზიდენტმა ბაიდენმა.
ერისადმი მიმართვისას, პრეზიდენტმა ბაიდენმა, ასევე ისაუბრა ვიცე-პრეზიდენტ კამალა ჰარისის შესახებ, რომელსაც დემოკრატიული პარტიის საპრეზიდენტო კანდიდატატ წარდგენისთვის მხარი მალევე დაუჭირა მას შემდეგ, რაც განაცხადა, რომ პრეზიდენტობის მეორე ვადისთვის აღარ იბრძოლებდა.
„სულ რაღაც რამდენიმე თვეში, ამერიკელი ხალხი, ამერიკის მომავლის კურსს ირჩევს“, - თქვა ბაიდენმა.
„ჩემი ცხოვრების პატივი იყო, მემსახურა თქვენს პრეზიდენტად. მაგრამ, დემოკრატიის დაცვა, რომელიც სასწორზე დევს, ვფიქრობ უფრო მნიშვნელოვანი რამაა, ვიდრე ნებისმიერი ტიტული. ძალას ვიღებ და სიხარულს ვგრძნობ ამერიკელი ხალხისთვის მუშაობაში“, - განაცხადა პრეზიდენტმა ბაიდენმა, ერისადმი მიმართვაში.
ბაიდენი ამბობს, რომ ამერიკელ ხალხს მოუწევს, არჩევანი გააკეთოს წინსვლასა და უკუსვლას შორის. მისი თქმით, ახლა არის მომენტი, როცა გადაწყვეტილებები განსაზღვრავს არა მხოლოდ შეერთებული შტატების, არამედ ასევე მთელი მსოფლიოს მომავალ ათწლეულებს.
„მე ნათლად განვაცხადე, რომ მჯერა ამერიკა გადახრის წერტილშია. ეს ისტორიის ერთ-ერთი იშვიათი მომენტია, როდესაც გადაწყვეტილებები, რომლებსაც ახლა ვიღებთ, ჩვენი ერისა და მსოფლიოს ბედს, მომავალი ათწლეულების განმავლობაში განსაზღვრავს. ამერიკას მოუწევს გააკეთოს არჩევანი, განაგრძოს წინ სიარული თუ უკან წავიდეს, მოუწევს გააკეთოს არჩევანი იმედსა და სიძულვილს შორის, ერთიანობასა და განხეთქილებას შორის. ჩვენ უნდა გადავწყვითოთ, გვჯერა თუ არა პატიოსნების, წესიერების, პატივისცემის, თავისუფლების, სამართლიანობისა და დემოკრატიის.“
ერისადმი მიმართვისას, პრეზიდენტმა ასევე ისაუბრა იმის შესახებ, თუ რას გააკეთებს საპრეზიდენტო ვადის ამოწურვამდე. ჯო ბაიდენს, პრეზიდენტობის ვადა 2025 წლის იანვარში ეწურება, როცა არჩეული პრეზიდენტი ფიცს დადებს.
„მომდევნო ექვსი თვის განმავლობაში, მე კონცენტრირებული ვიქნები პრეზიდენტის მოვალეობის შესრულებაზე. ეს ნიშნავს, რომ მე გავაგრძელებ შრომისმოყვარე ოჯახებისთვის ხარჯების შემცირებას, ჩვენი ეკონომიკის გაზრდას. მე გავაგრძელებ ჩვენი პერსონალური და სამოქალაქო თავისუფლებების დაცვას, - ხმის უფლებიდან, არჩევანის უფლებამდე. მე გავაგრძელებ, სიძულვილისა და ექსტრემიზმის წინააღმდეგ მოწოდებას. ამერიკაში არ არის პოლიტიკური ძალადობის ან რაიმე ძალადობის ადგილი, რომელის ოდესმე ყოფილა. მე გავაგრძელებ ადვოკატირებას, დავიცვათ ჩვენი შვილები იარაღით ძალადობისგან“, - თქვა პრეზიდენტმა ბაიდენმა და დასძინა, რომ ის გააგრძელებს მოწოდებებს აშშ-ის უზენაესი სასამართლოს რეფორმისთვის.
პრეზიდენტმა ბაიდენმა ასევე განაცხადა, რომ პრეზიდენტობის ვადის ამოწურვამდე, ის გააგრძელებს დაუპირისპირდეს რუსეთის პრეზიდენტის, ვლადიმირ პუტინის ზრახვებს უკრაინის წინააღმდეგ.
„ჩვენ გავაგრძელებთ ამაყი ქვეყნების კოალიციის შეკრებას, რათა შევაჩეროთ პუტინი, რომლის მიზანია ხელში ჩაიგდოს უკრაინა და მეტი ზიანი მიაყენოს. ჩვენ შევინარჩუნებთ ძლიერ ნატოს, გავაძლიერებთ მას და უფრო გავართიანებთ, ვიდრე ნებისმიერ დროს, ჩვენი ისტორიის განმავლობაში“, - თქვა ბაიდენმა.
პრეზიდენტმა ბაიდენმა, სიტყვის დასასრულს, ამერიკულ შესაძლებლობაზე ისაუბრა, - გაუხსნას გზა ადამიანებს და თქვა, რომ არსად დედამიწის ზურგზე არ არის შესაძლებელი, „ბავშვი, რომელიც ბორძიკით ლაპარაკობს, მოკრძალებული საწყისით, პენსილვანიიდან, დელავერიდან“, დაჯდეს თეთრი სახლის ოვალურ კაბინეტში, პრეზიდენტის მაგიდასთან, - „მე აქ ვარ. ეს არის ძალიან განსაკუთრებული ამერიკის შეერთებულ შტატებში. ჩვენ ვართ დაპირებების, შესაძლებლობებისა და მეოცნებეების ერი. კარი ჩვეულებრივი ამერიკელებისთვის, გააკეთონ არაჩვეულებრივი რაღაცები. ჩემს სულსა და გულს ვაძლევ ჩვენს ერს“, - თქვა ბაიდენმა.
„ჩვენ ამერიკის შეერთებული შტატები ვართ, არ არსებობს სრულიად არაფერი, ჩვენი შესაძლებლობების მიღმა, როცა ამას ერთად ვაკეთებთ. ასე რომ, ვიმოქმედოთ ერთად. ღმერთმა დაგლოცოთ, ღმერთმა დალოცოს ჩვენი ჯარები“, - ამ სიტყვებით დაასრულა ერისადმი მიმართვა, პრეზიდენტმა ბაიდენმა.
ბაიდენის პოლიტიკური კარიერა 1972 წელს 29 წლის ასაკში დაიწყო, როცა ის სენატორად აირჩიეს და გახდა მეექვსე ყველაზე ახალგაზრდა ამერიკელი სენატორი. ის თეთრ სახლში 2025 წლის 20 იანვარს დაასრულებს თავის ვადას, როგორც ამერიკის ყველაზე ხანდაზმული პრეზიდენტი, როცა 82 წელი შეუსრულდება.
წყარო: https://www.amerikiskhma.com/a/7712037.html
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
