,
დღეიდან, 2025 წლის 1-ლი ივლისიდან საქართველოში არაერთი რეგულაცია შედის ძალაში, რომელიც ტრანსპორტს, ენერგეტიკას, ვაჭრობასა და საზოგადოებრივ სივრცეებში ქცევის წესებს ეხება.
საქართველო-სომხეთს შორის მგზავრთა გადამზიდავებისთვის ახალი წესი ამოქმედდება
ეკონომიკის სამინისტროს ინფორმაციით, 1-ლი ივლისიდან საქართველოსა და სომხეთს შორის მოქმედი კომერციული სატრანსპორტო გადამზიდავები ვალდებული იქნებიან, ECMT-ის საერთაშორისო სტანდარტის შესაბამისი მგზავრთა სია წინასწარ შეავსონ.
რეგულაცია ეხება M1, M2 და M3 კატეგორიის ავტოსატრანსპორტო საშუალებებს — მათ შორის ავტობუსებს, მიკროავტობუსებსა და მინივენებს. სია ელექტრონულად უნდა შეივსოს ლათინური ასოებით მგზავრობის დაწყებამდე, ხოლო ბეჭდური ვერსია ბორტზე უნდა იქონიონ და მაკონტროლებელ ორგანოს წარუდგინონ.
ბუნებრივი აირის ჭკვიანი მრიცხველების დაყენება სავალდებულო ხდება
გაზის ჭკვიანი მრიცხველების მონტაჟი მუნიციპალიტეტებში სავალდებულო ხდება. 1-ლი ივლისიდან მოქალაქეები, რომლებიც ბუნებრივი აირის ჭკვიანი მრიცხველის დაყენებას მოითხოვენ, წინასწარ უნდა გადაიხადონ მოწყობილობის ღირებულების ნახევარი. დარჩენილი ნაწილი კი 10 დღეში, მოწყობილობის დამონტაჟების შემდეგ.
აღნიშნული წესი უკვე მოქმედებს თვითმმართველ ქალაქებში 2024 წლის 1-ლი ოქტომბრიდან.
ცვლილება განათლების კანონში
2025 წლის 1-ლი ივლისიდან შეიცვლება ზოგადი განათლების საბაზო და საშუალო საფეხურების ხანგრძლივობა. ცვლილებები შეეხო იმ მოსწავლეებს, რომლებიც 2024–25 სასწავლო წელს მე-9 ან მე-10 კლასში გადადიან.
პარლამენტის რეგლამენტი
bm.ge-ზე გამოქვეყნებული პროექტით, რომელიც 1–ლი ივლისიდან დაიწყებს მოქმედებას, ცვლილებები შეეხება პარლამენტის მუშაობისა და პრეზიდენტის უფლებამოსილების განსაზღვრას.
საღებავების შემადგენლობა კონტროლს დაექვემდებარება
იმავე თარიღიდან ძალაში შევა რეგულაცია, რომელიც ლაქ-საღებავების პროდუქტში აქროლადი ორგანული ნაერთების შემცველობის შემოწმებას ითვალისწინებს.
ზედამხედველობას ბაზარზე უზრუნველყობს სახელმწიფო ზედამხედველობის სააგენტო. შემოსავლების სამსახური კი უფლებამოსილი იქნება, საჭიროების შემთხვევაში შეაჩეროს პროდუქტის იმპორტი და აცნობოს სააგენტოს.
სასიგნალო იარაღზე რეგულაცია მკაცრდება
1-ლი ივლისიდან სასიგნალო იარაღისა და ვაზნების წარმოება, ვაჭრობა და შეკეთება ლიცენზირებად საქმიანობად განისაზღვრება. შესაბამისი ნებართვის მოსაკრებელი 100 ლარს შეადგენს.
ასაკობრივი ზღვარი სასიგნალო იარაღის შეძენისთვის განისაზღვრა 18 წლიდან. მოქმედებს სპეციალური ტარიფები ფიზიკური და იურიდიული პირებისთვის, ისევე როგორც უცხო ქვეყნის მოქალაქეებისთვის იარაღის შემოტანისა და გატანის შემთხვევაში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
