,
საქართველოს ტურიზმის ეროვნული ადმინისტრაცია ინდონეზიიდან წამყვანი ტურისტული კომპანიების, მედიასაშუალებების, მათ შორის ინდონეზიის ერთ-ერთი ყველაზე მაღალრეიტინგული ტელევიზიის TRANS 7-ის წარმომადგენლებსა და ბლოგერებს მასპინძლობს.
გაცნობითი ტური ინდონეზიაში საქართველოს საელჩოსა და თურქეთის ავიახაზების მხარდაჭერით ტარდება.
ტურის მონაწილეებს შეხვდა ტურიზმის ეროვნული ადმინისტრაციის ხელმძღვანელის პირველი მოადგილე თამარ ყორიაული.
გაცნობითი ტურის ფარგლებში, B2B ფორმატის ფარგლებში, ინდონეზიელ ტუროპერატორებს ქართველი კოლეგები შეხვდნენ.
„პროდუქტიული შეხვედრა გაიმართა და ხელი შეეწყო ახალი საქმიანი კავშირების დამყარებას ქართველი და ინდონეზიელი ტურისტული კომპანიების წარმომადგენლებს შორის. ჩვენს მთავარ მიზანს წარმოადგენს ხელი შევუწყოთ ახალ, გრძელვადიან და ნაყოფიერ თანამშრომლობას, რათა კიდევ უფრო გავაძლიეროთ ტურიზმის სექტორი და შევქმნათ ახალი შესაძლებლობები, როგორც ბიზნესისთვის, ასევე ტურისტებისთვის“-განაცხადა თამარ ყორიაულმა.
ინდონეზიელ ტუროპერატორებთან შეხვედრის მნიშვნელობაზე საუბრობს ტურისტული კომპანია ქისი თრეველის დამფუძნებელი თიკო ჯიშკარიანი.
„ძალიან საინტერესო შეხვედრა იყო, საშუალება მოგვეცა შევხვდეთ ჩვენს ძველ პარტნიორებს და გავიცნოთ ახალი კომპანიები, რომლებიც საქართველოთი დაინტერესებულები არიან. ინდონეზია დიდი ტურისტული ბაზარია, მათ ტურისტულ ჯგუფებს აინტერესებთ საქართველოს მიმართულება ოთხივე სეზონზე. ინტერესი გაზრდილია, თითქმის გაორმაგებულია ტურისტების მოთხოვნა ღამეებზე“-აცხადებს თიკო ჯიშკარიანი.
შეხვედრის ფარგლებში, ქართული კერძო სექტორის 20-ზე მეტ წარმომადგენელს საშუალება ჰქონდა გასცნობოდა ინდონეზიის ტურისტული სააგენტოების ერთ-ერთი უდიდესი ასოციაციას ASTINDO-ს, რომელიც 1200-ზე მეტ ტურისტულ სააგენტოს, ავიაკომპანიასა და სასტუმროს აერთიანებს.
„ინდონეზიური ტურისტული სააგენტოებისთვის მნიშვნელოვანია მეტი შევიტყოთ საქართველოს შესახებ, ძალიან კარგია საქართველოში ამ ტურის ორგანიზება, შევხვდით ქართველ ტუროპერატორებს, დავათვალიერეთ სასტუმროები, რომ შევიტყოთ თუ რა ტიპის ტურისტული პაკეტის მომზადება შეიძლება, როგორ შეგვიძლია საქართველოს პრომოცია ინდონეზიაში, რომ მოვიზიდოთ მეტი ინდონეზიელი მოგზაური საქართველოში“-განაცხადა ASTINDO-ს თავმჯდომარემ პაულინ სუჰარნომ.
ტურის 12 მონაწილე თბილისს, კახეთს, გუდაურსა და ყაზბეგს ეწვია. მედიის წარმომადგენლები საქართველოს ტურისტული მიმართულების, კულტურის, ბუნებისა და კულინარიის შესახებ სიუჟეტებსა და ბლოგებს მოამზადებენ.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
