გუშინ, 4 ოქტომბერს, ილჰამ ალიევმა ხელი მოაწერა დადგენილებას სამრეწველო პარკის „არაქსის ხეობის ეკონომიკური ზონა“ შექმნის შესახებ. ახალი ზონა მოიცავს ჯაბრაილის რაიონის ტერიტორიას. აღნიშნული რაიონი 1993 წლიდან 2020 წლამდე კონტროლდებოდა არაღიარებული მთიანი ყარაბაღის რესპუბლიკის მიერ. 2020 წლის ომის შედეგად, აზერბაიჯანმა სრული კონტროლი დაიბრუნა რაიონზე.
ჯაბრაილის რაიონს სამხრეთით ესაზღვრება ირანის ისლამური რესპუბლიკა. დადგენილებაში ნათქვამია, რომ ტერიტორიას აქვს უპირატესად სწორი რელიეფი, რაც ქმნის ხელსაყრელ პირობებს ინდუსტრიული პარკის შექმნისათვის. შეიქმნება აგრეთვე სასაზღვრო-გამშვები პუნქტი ეკონომიკური რაიონის სამხრეთით, ხუდაფერინის ხიდების მიმართულებით, რაც ასევე უზრუნველყოფს ეკონომიკური პარკის ეფექტიანობას. შეგახსენებთ, ხუდაფერინის ხიდები კვეთენ მდინარე არაქსს, რომლის მარჯვენა ნაპირზე მდებარეობს ირანი, ხოლო მარცხენა ნაპირზე - მდებარეობს აზერბაიჯანის ჯაბრაილის რაიონი.
სურათზე სამრეწველო პარკის საძირკვლის ჩაყრის ცერემონიალი ჯაბრაილის რაიონში ილჰამ ალიევის მონაწილეობით. აქვე მან უპასუხა ირანს:
„ჩვენ კეთილი ზრახვები გვამოძრავებს. მაგრამ ეს არ ნიშნავს, რომ ჩვენ მივიღებთ უსაფუძვლო ბრალდებებს ჩვენს წინააღმდეგ. მე ვეუბნები ამას აქ - ჯაბრაილში, აქ, - არაქსის სანაპიროსთან, აზერბაიჯანელ ხალხს და მთელს მსოფლიოს: უსაფუძვლო ბრალდებები ჩვენს წინააღმდეგ პასუხგაუცემელი არ დარჩება“.
