,
დიდ ბრიტანეთში, ბანდები აუპატიურებდნენ ბავშვებს და ძალადობდნენ მათზე, ხოლო ხელისუფლებამ ისინი ვერ დაიცვა - გაუპატიურების მსხვერპლ ბავშვებს უარი ეთქვათ სახელმწიფოს მხრიდან მართლმსაჯულებასა და დაცვაზე, რათა შეენარჩუნებინათ წარმატებული მულტიკულტურული საზოგადოების იმიჯი, - წერს ბრიტანული გამოცემა The Telegraph-ი.
ქალაქ ოლდჰემში სექსუალური ძალადობის მიმოხილვა 2022 წელს გამოქვეყნდა, თუმცა მხოლოდ 2011-2014 წლების პერიოდს მოიცავდა. ქალაქის მოსახლეობას სურდა, რომ მთავრობას გამოძიება ჩაეტარებინა უფრო ხანგრძლივი პერიოდისთვის. ქალებისა და გოგონების მიმართ ძალადობის საკითხებში საპარლამენტო სახელმწიფო მდივნის მოადგილემ, ჯეს ფილიპსმა ქალაქის საბჭოს მიწერა, რომ მას ესმის ქალაქში არსებული გრძნობების სიძლიერე, მაგრამ აჯობებდა ადგილობრივ დონეზე გამოძიების ჩატარება.
„ეს არის სკანდალი, რომელიც სრულად უნდა აღმოიფხვრას და ბრიტანეთის სახელმწიფომ ის სრული ძალით უნდა გამოიძიოს. თუმცა, როგორც ჩანს, მთავრობას არ სურს ჩინოვნიკების შეცდომებში ჩაძიება. ეს ახალი არ არის. ქვეყნის მასშტაბით, ქალაქებში, ჩვენს ქუჩებში და სახელმწიფო ინსტიტუტებში, რომლებიც შექმნილია ჩვენი საზოგადოების ყველაზე დაუცველი წევრების დასაცავად, ხელისუფლებამ შეგნებულად დახუჭა თვალი ძირითადად თეთრკანიან ბავშვებზე საშინელ სექსუალურ ძალადობაზე, რომელსაც პაკისტანური წარმოშობის ბანდები ახორციელებდნენ“, - ნათქვამია სტატიაში.
„დროთა განმავლობაში, დეტალები გაირკვა სექსუალური ძალადობის შესახებ როტერჰემში, ტელფორდში, როჩდეილში და ათეულობით სხვა ადგილას. მაგრამ ვინაიდან ისტორიები ნაწილ-ნაწილ ქვეყნდება, ხოლო დეტალები იმდენად საშინელია, რომ მათი წაკითხვა შეუძლებელია, სკანდალის სრული მასშტაბი ჯერ კიდევ უცნობია საზოგადოებისთვის“, - წერს The Telegraph-ი.
გამოცემა The Telegraph-ს ამონარიდი მოჰყავს 2013 წლის საქმიდან - მუჰამედ კარარმა ოქსფორდში თავისი მსხვერპლი (არასრულწლოვანი) მოამზადა „ჯგუფური ანალური გაუპატიურებისთვის ტუმბოს გამოყენებით. მსხვერპლს 5-6 კაცი აუპატიურებდა. მას პირში წითელი ბურთი ჩაუდეს, რათა გაჩუმებულიყო“.
ტელფორდში, ლუსი ლოუ 16 წლის ასაკში გარდაიცვალა დედასთან და დასთან ერთად, როდესაც მოძალადემ მის სახლს ცეცხლი წაუკიდა 2000 წელს. მისი სიკვდილი შემდგომში გამოიყენეს სხვა ბავშვების დასაშინებლად.
ტელფორდში, როდესაც 12 წლის ერთ-ერთმა დაზარალებულმა დედას მოუყვა ძალადობის შესახებ და დედამ პოლიციას დაურეკა, მის სახლში შვიდი აზიელი კაცი მივიდა და მას დაემუქრნენ, რომ დაწვავდნენ მის სახლს, თუ განცხადებას არ გამოიტანდა.
როდესაც დამოუკიდებელი მიმოხილვა საბოლოოდ გამოქვეყნდა 2022 წელს, გაირკვა, რომ პოლიციის ოფიცრებმა ქალაქ ტელფორდის ზოგიერთი რაიონი აღწერეს, როგორც „აკრძალული ზონა“, ხოლო მოწმეები გამოვიდნენ ბრალდებებით პოლიციაში კორუფციისა და პაკისტანური თემის მიმართ ფავორიტიზმის შესახებ.
გამოძიებამ დაადგინა, რომ „არსებობდა მღელვარება რასობრივი თემის გამო და „აზიური“ თემის მიერ ჩადენილი დანაშაულების გამოძიების სურვილის ნაკლებობა“.
„პრობლემის მასშტაბის უარყოფა ღრმად არის ფესვგადგმული ბრიტანეთის პოლიტიკურ სისტემაში. ზოგჯერ, როგორც ჩანს, მულტიკულტურალიზმისადმი მთავრობის მიდგომა არ არის კანონის დაცვა, არამედ თემებს შორის არეულობის რისკის მინიმუმამდე შემცირება. როდესაც საქმე შეეხო ძირითადად პაკისტანელი მამაკაცების ბანდებს, რომლებიც ძალადობდნენ ძირითადად თეთრკანიან ბავშვებზე, სახელმწიფომ ზუსტად იცოდა რა უნდა გაეკეთებინა. საზოგადოებაში ურთიერთობების სასიკეთოდ, მას ეს ამბავი უნდა დაემარხა“, - ნათქვამია სტატიაში.
ქალაქ როტერჰემში, პოლიციის უფროსმა ოფიცერმა განუცხადა დაზარალებულის მამას, რომ ქალაქი „აფეთქდებოდა“, თუ პაკისტანელი მამაკაცების მიერ თეთრკანიან ბავშვებზე ძალადობა საჯარო გახდებოდა.
გაუპატიურების 15 წლის მსხვერპლის მამას კი უთხრეს, რომ თავდასხმა შესაძლოა ნიშნავდეს, რომ მისი შვილი „გაკვეთილს ისწავლიდა“.
როტერჰემში 2014 წლის გამოძიებამ დაადგინა, რომ ბავშვებს „ბენზინს ასხამდნენ და დაწვით ემუქრებოდნენ“, „იარაღით ემუქრებოდნენ“, „ბავშვები სასტიკი გაუპატიურების მოწმენი გახდნენ და მათ ემუქრებოდნენ, რომ ისინი შემდეგი იქნებოდნენ, თუ ვინმეს ეტყოდნენ“, „11 წლის გოგონებს აუპატიურებდნენ დიდი რაოდენობით მოძალადე მამაკაცები“.
„როდესაც ხალხი ცდილობდა ამ საკითხის წამოწევას, მათ აჩუმებდნენ. 2004 წელს, მე-4 არხის დოკუმენტური ფილმი ბრედფორდში სექსუალური ძალადობის შესახებ გადაიდო მას შემდეგ, რაც პოლიციის ძალებმა გააფრთხილეს, რომ მტკიცებულებამ, რომ „აზიელი მამაკაცები ძალადობენ ახალგაზრდა თეთრკანიან გოგონებზე“, შეიძლება გააღვივოს რასობრივი დაძაბულობა“, - წერს The Telegraph-ი.
მაშინ, როდესაც რასობრივი დაძაბულობისა და პოლიტკორექტულობის გამო სახელმწიფოს ხშირად არ სურდა მსხვერპლთა დაცვა, იმავე შეშფოთებამ გამოიწვია თავდამსხმელების დაცვა. როგორც როტერჰემში 2014 წელს გამოძიებამ დაადგინა, სულ მცირე, ორ შემთხვევაში მამებმა თავიანთი შვილების ადგილსამყოფელი დაადგინეს და ცდილობდნენ ისინი გაეყვანათ იმ სახლებიდან, სადაც მათზე ძალადობდნენ. პოლიციამ კი მამები დააკავა.
ერთ შემთხვევაში, როდესაც მსხვერპლმა გაბედა და პოლიციაში წავიდა, როგორც ჩანს, მოძალადეს ინფორმაცია მიაწოდეს. ჯერ კიდევ პოლიციის განყოფილებაში ყოფნისას ერთმა ბავშვმა მიიღო მესიჯი მოძალადისგან, რომელშიც ეწერა, რომ მას ჰყავდა 11 წლის და და რომ ახლა „არჩევანი შენზეა“. ბავშვმა არჩია საჩივარი არ წარედგინა.
„ეს ისტორიები მოიცავს ქალაქების მხოლოდ მცირე რაოდენობას. თუმცა, უფრო ფართო სურათი ნათელია. შედეგები ასევე ნათელია: არც ერთი პოლიციელი ან სახელმწიფო მოხელე არასდროს დაუპატიმრებიათ თანამდებობრივი დანაშაულის გამო. ბავშვები მიატოვეს საზოგადოებაში ურთიერთობების სახელით - უპატიებელი ფასი. და ეს იყო ფასი, რომელსაც არაფერი მოუტანია: სიცრუეზე დაფუძნებული ჰარმონია არ გრძელდება დიდხანს. საზოგადოების მრისხანება მატულობს. ძალადობა შეიძლება კვლავ ხდებოდეს, რადგან სახელმწიფომ ვერ იმოქმედა სათანადოდ ადრე. ახალი მიდგომის დროა“, - აღნიშნულია სტატიაში.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
