,
გიორგი ბაჩიაშვილის მიერ საქართველოს სახელმწიფო საზღვრის უკანონოდ გადაკვეთაში დახმარების ფაქტზე ბრალდებულ 48 წლის შოთა ქარუმიძის ადვოკატის, ალექსანდრე ამირხანაშვილის განცხადებით, დაკავებული ბრალს აღიარებს.
როგორც ადვოკატი აღნიშნავს, ქარუმიძეს გამოძიებისთვის ინფორმაცია როგორც მოწმეს აქვს მიწოდებული.
კითხვაზე - როგორც საგამოძიებო უწყების ინფორმაციაშია აღნიშნული, დაუკავშირდა თუ არა ბრალდებულს ბაჩიაშვილია მამა? - ადვოკატი პასუხობს, რომ „ქარუმიძე ეჭვობს, რომ პირი, რომელიც მას ესაუბრა, ბაჩიაშვილის მამა იყო“.
„გუშინ წაუყენეს ბრალი საზღვრის უკანონო კვეთაში დახმარებაზე. ის დაეთანხმა ბრალს, აღიარებს წარდგენილ ბრალდებას. ინფორმაცია მიწოდებული აქვს მოწმის სახით, როგორც ბრალდებულს ინფორმაცია არ მიუწოდებია, უბრალოდ დაეთანხმა ბრალს“,- განაცხადა ამირხანაშვილმა.
მისივე თქმით, ბრალდებულს ბაჩიაშვილის მამა, ალექსანდრე ბაჩიაშვილი არ უნახავს, მას მხოლოდ ტელეფონით ესაუბრა.
„ამ დეტალებზე არ მისაუბრია, ვერც დავადასტურებ, ვერც უარვყოფ, რაც მოვასწარი მასთან საუბარი, იმის მიხედვით, ის ეჭვობს, რომ მას ბაჩიაშვილის მამა ესაუბრა, თუმცა, ის თვალით არ უნახავს, უშუალოდ ბაჩიაშვილს შეხვდა, სხვას არავის“,- განაცხადა ამირხანაშვილმა.
ის სასამართლოს ქარუმიძის მიმართ აღკვეთის ღონისძიების სახით გირაოს გამოყენებას შესთავაზებს.
ცნობისთვის, შოთა ქარუმიძემ მიმდინარე წლის 2 მარტს, წინასწარ შემუშავებული გეგმის შესაბამისად და ფულადი თანხის სანაცვლოდ, ავტომობილში სპეციალურად მოწყობილი სამალავით, საქართველოს სახელმწიფო საზღვარზე სომხეთის მიმართულებით მალულად გადაიყვანა გიორგი ბაჩიაშვილი, რომელსაც, როგორც ბრალდებულს აკრძალული ჰქონდა ქვეყნის დატოვება.
„დაკავებულს ბრალდება სსკ-ის 25, 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთაში დახმარება) წარედგინა, რაც სასჯელის სახედ 3-დან 5 წლამდე თავისუფლების აღკვეთას ითვალისწინებს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
