,
ყვარელში, ახალსოფელში დუღაშვილების მამა-პაპისეულ სახლში მცირე ინვესტიციითა და „აწარმოე საქართველოს“ გრანტით 2018 წლიდან ამოქმედებული ღვინის მცირე საწარმო და ტურისტული ობიექტი „ღვინის ეზო N1” ფართოვდება და ვითარდება.
ახალი ადგილი პანდემიამდე უცხოელ ტურისტებს ღვინის, გასტრო, აგრო, ეკო, ეთნო ტურებს სთავაზობდა და როგორც თავად ობიექტის დამფუძნებელი BM.GE-სთან საუბრისას ამბობს, „ღვინის ეზო N1” პანდემიამდე უცხოელ ვიზიტორებში, ხოლო პანდემიის პერიოდში ადგილობრივებში დიდი პოპულარობით სარგებლობდა.
დღეს კი ტურისტული ობიექტი „აწარმოე საქართველოს“ ხელშეწყობით, მიმდინარე წელს პანდემიის მიუხედავად, მცირე ბიზნესის განვითარებას გეგმავს, რითიც რუკაზე დატანილ ადგილს ახალ ფუნქციას სძენს.
„დღეს სააგენტოს „აწარმოე საქართველოში“ ფარგლებში 30 000 ლარის გრანტი მოვიგეთ, რომლითაც საკონფერენციო დარბაზი მოეწყობა - ქართული აივნებით, თანამედროვე ტექნოლოგიებით აღჭურვილი, რომელიც კულტურათა გაცვლის, ტრენინგების, ვორქშოფების ადგილი იქნება. დარბაზის მოწყობა მაისში დასრულდება და ჩვენს სტუმრებს დამატებით მომსახურებასაც შევთავაზებთ“, - აღნიშნა თიკა დუღაშვილმა.
„ღვინის ეზო N1” დამფუძნებელი ამბობს, რომ პანდემიამდე კახეთში მოქმედი ტურისტული ადგილი შემოდგომაზე დაახლოებით 40-მდე ადამიანს, ძირითადად ორგანიზებულ ჯგუფებს მასპინძლობდა.
„ტურისტული მიმართულებები, საიდანაც უცხოელი დამსვენებლები ჩამოდიან დამოკიდებულია იმაზე, ვისთან დაამყარებ კარგ ურთიერთობებს. თავდაპირველად ყველაზე მყარი კავშირები საფრანგეთთან გვქონდა, თუმცა რუსეთის ბაზრის ჩაკეტვის შემდეგ ისეთი ბაზრები გააქტიურდა როგორიცაა ბრაზილია, ავსტრალია, ახალი ზელანდია.
ზოგადად გათვლა უცხოელებზე იყო. მართალი გითხრათ პანდემიის პერიოდში მოლოდინი რომ ქართველებისთვის შეგვეძლო კარგი შეთავაზებების გაკეთება არ მქონია, თუმცა აღმოჩნდა რომ ინტერესი ადგილობრივ დამსვენებლებშიც იყო და პანდემიის პერიოდში შესაბამისად სეზონზე აქტიურად ვმუშაობდით. დიდი ინტერესი მოდის კორპორაციებიდანაც“, - აღნიშნა თიკა დუღაშვილმა.
ტურისტული ადგილისადმი ინტერესი ავიამიმოსვლის განახლების შემდეგ უცხოელი ტურისტებიდან ინტერესი კვლავ გაჩნდა. „ღვინის ეზო N1”-ის დამფუძნებელი ამბობს, რომ დღეს მათ ძირითადად ვაქცინირებული ჯგუფები სტუმრობენ.
„ავიამიმოსვლის ამოქმედებისა და ქვეყანაში ვაქცინაციის დაწყების შემდეგ ჩვენთან ძირითადად აცრილი ტურისტები ჩამოდიან. უკრაინა, ბრაზილია, შვეიცარია, ამერიკა, ინდოეთი - ეს ის მიმართულებებია საიდანაც ბოლო პერიოდში სტუმრები გვყვავდა.
მოლოდინი გვაქვს, რომ ზაფხულის სეზონზე ტურისტები გვეყოლება, რადგან ვაქცინაცია თითქმის ყველა ქვეყანაში დაწყებულია“, - აღნიშნა „ღვინის ეზო N1”-ის დამფუძნებელმა.
თიკა დუღაშვილი BM.GE-სთან საუბრისას აღნიშნავს, რომ მათი ობიექტის მიმართ ინტერესი იმდენად დიდია, რომ სამომავლოდ მოთხოვნიდან გამომდინარე დამფუძნებლები სასტუმროსაც გახსნიან, თუმცა ზუსტ დროს ვერ ასახელებს.
წყარო:https://bm.ge/
ავტომწარმოებლებს ამერიკის შეერთებულ შტატებში გაყიდვების კუთხით შთამბეჭდავი 2025 წელი ჰქონდათ, მიუხედავად ისეთი სერიოზული დაბრკოლებებისა, როგორებიცაა მზარდი ფასები, მაღალი საპროცენტო განაკვეთები და იმპორტირებულ მანქანებსა თუ ნაწილებზე დაწესებული ტარიფები.
წლის დასაწყისში თეთრმა სახლმა აშშ-ში ავტომობილების გაყიდვების 2.4%-იანი ზრდა ხაზგასმით აღნიშნა. მათი განცხადებით, ეს ინდუსტრიის საუკეთესო მაჩვენებელია 2019 წლის შემდეგ და ასევე დასტური იმისა, რომ მათ მიერ დაწესებულმა ტარიფებმა ავტომობილები არ გააძვირა.
ამის გათვალისწინებით, USA TODAY-ის გუნდმა შეისწავლა წამყვანი ავტომწარმოებლების გაყიდვების უახლესი ანგარიშები, რათა გაერკვია, ვის ჰქონდა საუკეთესო 2025 წელი ავტომობილების გაყიდვების კუთხით.
გთავაზობთ 10 ყველაზე გაყიდვად ავტობრენდს იმ მწარმოებლებს შორის, რომლებმაც 2025 წლის გაყიდვების სრული მონაცემები უკვე გამოაქვეყნეს:
2025 წელს "ჯენერალ მოტორსმა" (General Motors) 2.85 მილიონი ავტომობილი გაყიდა, ყველაზე გაყიდვადი მოდელები კი Chevrolet Silverado და GMC Sierra იყო. გამოქვეყნებულ პრესრელიზში კომპანიამ განაცხადა, რომ ის უკვე ზედიზედ მეექვსე წელია, ამერიკის ლიდერია სრული ზომის პიკაპების ბაზარზე, სადაც Silverado-მ და Sierra-მ ბოლო 20 წლის განმავლობაში საუკეთესო ჯამური გაყიდვები დააფიქსირეს.
რეიტინგში მეორე ადგილზეა "ტოიოტა" (Toyota) 2.5 მილიონი გაყიდული ერთეულით, საიდანაც ყველაზე პოპულარული მოდელი RAV4 იყო. როგორც კომპანიის ვიცე-პრეზიდენტმა აღნიშნა, იაპონური კომპანია "მადლიერია გასულ წელს ტოიოტას მომხმარებლების მზარდი გამოხმაურებისთვის, რაც ხელმისაწვდომობისა და არჩევანის მრავალფეროვნებისადმი, კომპანიის ღრმა ერთგულებას ასახავს".
მესამე ადგილს 2.1 მილიონი გაყიდვით "ფორდი" (Ford) იკავებს. ყველაზე პოპულარული ავტომობილი კი F-სერია იყო. "ფორდის" განცხადებით, მათი ბაზრის წილი წლის განმავლობაში 0.6 პროცენტული პუნქტით გაიზარდა და 13.2%-ს მიაღწია, რაც მომხმარებელთა ფართო წრისთვის "ფორდის” მიზიდულობამ განაპირობა, კომპლექტაციებისა და ძრავების მრავალფეროვანი არჩევანის ხარჯზე".
ყველაზე პოპულარულ საავტომობილო ბრენდებს შორის მეოთხე ადგილზე "ტესლაა" (Tesla). მან 2025 წელს 1.6 მილიონი ავტომობილი გაყიდა, ყველაზე გაყიდვადი მოდელი კი Model Y იყო. ინვესტორებისთვის გაკეთებულ განცხადებაში Tesla-მ აღნიშნა, რომ კომპანიამ 2025 წელს 434 ათასი ავტომობილი აწარმოვა და 14.2 გიგავატ/საათი მოცულობის ენერგიის შემნახველი სისტემები დაამონტაჟა, რაც რეკორდული მაჩვენებელია".
მეხუთე ადგილზე 1.4 მილიონი გაყიდვით "ჰონდა" (Honda) და მისი CR-V არიან. "ჰონდამ" პრესრელიზში განაცხადა, რომ 2025 წელი იყო "მათთვის საუკეთესო, 2021-ის შემდეგ, 0.5%-იანი წლიური ზრდით". კომპანიის თქმით, გაყიდვების ზრდა მიღწეულ იქნა "მიუხედავად ბაზრის პირობების ცვლილებისა და მიკროჩიპების დეფიციტისა, რამაც მე-4 კვარტალში მარაგების შემცირება გამოიწვია".
1.2-მილიონიანი გაყიდვები დააფიქსირა "სტელანტისმა" (Stellantis). მისი ყველაზე გაყიდვადი მანქანა კი Ram-ის სერიის მსუბუქი პიკაპი იყო. როგორც კომპანიამ განაცხადა, კვარტალურმა გაყიდვებმა და ბაზრის წილის ზრდამ აჩვენა, რომ აშშ-ში ბიზნესის გადატვირთვისთვის Stellantis-ი სწორ ნაბიჯებს დგამს.
ასევე საუკეთესო ხუთეულის მიღმა, მე-7 ადგილზე რჩება "ნისანი" (Nissan), 926 ათასი გაყიდვით და ბესტსელერი მოდელით - Nissan Rogue. "ნისანმა" პრესრელიზში აღნიშნა, რომ "კალენდარული წლის განმავლობაში გამორჩეული შედეგები აჩვენეს მისმა Kicks და Pathfinder ყველგანმავლებმა; რომელთა გაყიდვებმაც, თითოეულის ბაზარზე გამოჩენის შემდეგ, რეკორდულ მოცულობას მიაღწია.
"ჰიუნდაიმ" (Hyundai) 2025 წელს აშშ-ში 901 ათასი მანქანა გაყიდა. მათი ყველაზე გაყიდვადი მოდელი Tucson იყო. Hyundai-ს პრეზიდენტმა და აღმასრულებელმა დირექტორმა, განაცხადა, რომ კომპანია ზედიზედ მეხუთე წელია, რეკორდულ საცალო გაყიდვებს აფიქსირებს.
"კია" (Kia) და მისი Sportage ათეულში რჩებიან, გასულ წელს გაყიდული 852 ათასი ავტომობილით. პრესრელიზში "კიამ" აღნიშნა, რომ "საცალო გაყიდვები ზედიზედ მერვე წელია იზრდება.
ბოლო ადგილი "ფოლკსვაგენს" (Volkswagen) უკავია, აშშ-ში თითქმის 330 ათასი გაყიდვით. მათი ყველაზე გაყიდვადი ავტომობილი Volkswagen Tiguan იყო. მიუხედავად იმისა, რომ ბრენდი ათეულში მოხვდა, "ფოლკსვაგენმა" პრესრელიზში განაცხადა, რომ 2025 წლის მეოთხე კვარტალის გაყიდვები 2024 წლის იმავე პერიოდთან შედარებით, 19.8%-ით შემცირდა. კომპანიის ცნობით, მათ წელი 13%-იანი კლებით დაასრულეს.
შეიძლება ითქვას, რომ 2025 წელი ამერიკულ ავტობაზარზე სტაბილურობისა და "პრაგმატული არჩევანის" წელი იყო. მძღოლებმა უარი თქვეს ექსპერიმენტებზე და არჩევანი ნაცად, საიმედო ბრენდებსა და პრაქტიკულ ქროსოვერებზე შეაჩერეს. 2026 წლისთვის ექსპერტები ვარაუდობენ, რომ ჰიბრიდულ ავტომობილებზე მოთხოვნა კიდევ უფრო გაიზრდება, ხოლო ავტომწარმოებლებს, კონკურენციის შესანარჩუნებლად, ფასების პოლიტიკის გადახედვა მოუწევთ.
წყარო:https://bm.ge/n
