სახელმწიფო შესყიდვების ეროვნული სააგენტოს თანახმად, აღნიშნულ არბიტრაჟში მთავრობის ინტერესებს საერთაშორისო იურიდიული კომპანია White & Case-ი იცავდა, რომელსაც იუსტიციის სამინისტრომ გაწეული სერვისისთვის 25,074,951 ლარი გადაუხადა.

საქართველოს მთავრობამ თურქულ კომპანია ENKA Insaat-თან, რომელიც ნამახვანის ჰესის პროექტს ახორციელებდა საერთაშორისო საარბიტრაჟო დავა წააგო - ამის შესახებ ინფორმაციას თავად კომპანია ავრცელებს. კომპანიის ინფორმაციით, საქართველოსთვის დაკისრებული კომპენსაცია 383.2 მილიონი დოლარია.

საარბიტრაჟო დავა მოჰყვა კომპანია ENKA-s მიერ 2021 წლის 22 სექტემბერს გაკეთებულ განცხადებას, რომ სახელმწიფოს მიერ საინვესტიციო შეთანხმების დარღვევის და შექმნილი ფორსმაჟორის გამო საინვესტიციო შეთანხმებიდან გადიოდნენ.

ირაკლი კობახიძემ 2 დეკემბერს განაცხადა, რომ საარბიტრაჟო დავა გრძელდება, თუმცა ამასთან მან თქვა, რომ საქართველოს შესაძლოა, მრავალმილიონიანი კომპენსაციის გადახდა მოუწიოს. იუსტიციის სამინისტროს, ჯერჯერობით, საქმესთან დაკავშირებით კომენტარი არ გაუკეთებია.

Enka Renewables, რომელიც კომპანია ENKA-ს შვილობილია, 433 მეგავატის სიმძლავრის ნამახვანჰესის ჰიდროელექტროსადგურის კასკადს წყალტუბოს მუნიციპალიტეტში აშენებდა, პროექტის ექსპლოატაციაში შესვლა 2025-2026 წლებში იგეგმებოდა.

კომპანია აღნიშნული პერიოდისთვის ნამახვანჰესის $800 მილიონიანი ჰიდროელექტროსადგურის სამშენებლო სამუშაოების დასაწყებად ემზადებოდა და წინასწარ სამუშაოებზე 100 მილიონამდე უკვე ჰქონდა ინვესტირებული.