,
წყარო:https://bm.ge/
გთავაზობთ გასული კვირის (20-26 მაისის) მნიშვნელოვან მოვლენებს საქართველოს ეკონომიკაში.
ამერიკის შეერთებული შტატების სახელმწიფო მდივნის, ენტონი ბლინკენის 23 მაისის განცხადებით ცნობილი გახდა, რომ აშშ-მა სავიზო სანქციების რეჟიმი დააწესა ხელისუფლებისა და მმართველი პარტიის წარმომადგენლების, ასევე მათი ოჯახის წევრებისთვის. სანქციები უკავშირდება ხელისუფლების მიერ საქართველოს ევროატლანტიკური გზიდან გადახვევას, დემოკრატიის ძირის გამოთხრას, რუსული კანონის მიღებას, მშვიდობიანი პროტესტის ძალადობრივ ჩახშობას და მოქალაქეთა დაშინების კამპანიას. სახელმწიფო დეპარტამენტის განმარტებით, მათი სია, ვისაც სავიზო შეზღუდვები დაუწესდა საჯარო არ იქნება.
სახელმწიფო მდივნის, ენტონი ბლინკენის განცხადების თანახმად, საქართველოს ხელისუფლების მიერ ანტიევროპული და ანტიამერიკული საგარეო პოლიტიკური კურსის დაჭერიდან, ასევე აგენტების კანონის მიღებიდან გამომდინარე, აშშ გეგმავს ძირეულად გადახედოს და ხელახლა შეაფასოს საქართველოსთან ორმხრივი თანამშრომლობის მიმართულებით არსებული პოლიტიკა.
ლარის გაცვლითი კურსი, რომელიც გასული კვირის პირველ ნახევარში დოლართან მიმართებით 2.71-2.72 ლარის ნიშნულზე იყო, კვირის ბოლოს გაუფასურდა და პარასკევს Bloomberg-ის სისტემაში 2.78 ლარს მიაღწია. ამასთან, კომერციულ ბანკებში აშშ დოლარის ყიდვის ფასი 2.82-2.84 ლარის ფარგლებში მერყეობს.
22 მაისს სებ-მა რეფინანსირების განაკვეთის 0.25 პროცენტული პუნქტით 8%-მდე შემცირების გადაწყვეტილება მიიღო. ეროვნული ბანკის მიერ გამოქვეყნებული მონეტარული პოლიტიკის ანგარიშის თანახმად, 2024 წლის მეოთხე კვარტალში რეფინანსირების განაკვეთის დონის 7.8%-მდე შემცირება არის მოსალოდნელი.
ანგარიშის თანახმად, ეროვნული ბანკი მოელის, რომ მონეტარული პოლიტიკის შერბილება 2024 და 2025 წლის ბოლომდე გაგრძელდება, ხოლო ამ კლებათა შედეგად განაკვეთი 2025 წლის ბოლოსთვის 7.2%-მდე დაიწევს.
პირველმა ვიცე-პრემიერმა, ეკონომიკისა და მდგრადი განვითარების მინისტრმა ტურიზმის სექტორის წარმომადგენლებთან შეხვედრა გამართა, სადაც სექტორში მიმდინარე და სამომავლო გეგმები განიხილეს. შეხვედრის შესახებ ინფორმაციას ეკონომიკის სამინისტრო ავრცელებს.
როგორც დარგის წარმომადგენლებმა შეხვედრის შემდეგ ჟურნალისტებს განუცხადეს, ეკონომიკის მინისტრს ტურიზმში მდგომარეობის გამოსწორებისთვის "რუსული კანონის" უკან გაწვევა მოსთხოვეს და უწყების ხელმძღვანელს სამოქმედო გეგმის შესახებ ჰკითხეს, რაზეც მინისტრსა და მის მოადგილეებს პასუხი არ ჰქონდათ.
საქსტატის ანგარიშის თანახმად, 2024 წლის I კვარტალში, საქართველოს რკინიგზის მეშვეობით 3.2 მილიონი ტონა ტვირთის გადაზიდვა მოხდა, რაც წინა წლის ანალოგიურ პერიოდთან შედარებით 2.5%-ით მეტია.
2024 წლის პირველ კვარტალში საქართველოში მოქმედი პორტებისა და ნავსადგურების ტვირთბრუნვა შემცირდა - ამის შესახებ საქსტატის მიერ გამოქვეყნებული ანგარიშიდან ირკვევა. დოკუმენტის თანახმად, პერიოდის განმავლობაში ქართული პორტები 3.4 მილიონ ტონა ტვირთებს მოემსახურნენ, რაც წინა წლის ანალოგიურ პერიოდთან შედარებით 8%-ით ნაკლებია.
საქართველოს მთავრობა რუსთავიდან აზერბაიჯანის საზღვრამდე 32-კილომეტრიანი 4-ზოლიანი მაგისტრალის მშენებლობაზე 202 მილიონი დოლარის (187 მილიონი ევროს) დახარჯვას გეგმავს. ამისთვის საავტომობილო გზების დეპარტამენტმა გამოაცხადა საერთაშორისო ტენდერი გზების მშენებლობის ზედამხედველი კომპანიის შესარჩევად.
გზის მშენებლობის ზედამხედველი კომპანიის ტენდერის სავარაუდო ღირებულება 5 მილიონ ევროს შეადგენს. სავარაუდოდ ზედამხედველი კომპანიის შერჩევის შემდეგ გამოცხადდება საერთაშორისო ტენდერიც გზის მშენებელი კომპანიის შესარჩევად. აღნიშნული გზის სიგრძე 32 კილომეტრს შეადგენს და ის მეტწილად არსებული გზის პარალელურად გაივლის. მაგისტრალის მშენებლობის ღირებულების უდიდეს ნაწილს ევროპის საინვესტიციო ბანკი (EIB) 150 მილიონი ევროს ოდენობის კრედიტით დააფინანსებს.
საქართველოს მთავრობა სომხეთის დამაკავშირებელი სადახლოს საბაჟო გამშვები პუნქტის მიმართულებით ახალი 4-ზოლიანი მაგისტრალის მშენებლობას გეგმავს. 29.3-კილომეტრიანი გზის მშენებლობის ღირებულება 107 მილიონი ევრო, ანუ 115 მილიონი დოლარია, საიდანაც 87 მილიონი ევროს დაფინანსებას ევროპის საინვესტიციო ბანკი (EIB) გამოყოფს.
საავტომობილო გზების დეპარტამენტმა გამოაცხადა საერთაშორისო ტენდერი 4 მილიონი ევროს ოდენობით, რათა შეარჩიოს ზედამხედველი კომპანია, რომელიც საინჟინრო სამუშაოებს მონიტორინგს გაუწევს. სავარაუდოდ, აღნიშნული კომპანიის შერჩევის შემდეგ გამოცხადდება ტენდერები გზის სამშენებლო კონტრაქტორის შესარჩევად.
ფინანსთა მინისტრის მოადგილემ, მირზა გელაშვილმა თანამდებობა დატოვა. აღნიშნული ინფორმაცია bm.ge-ის თავად მირზა გელაშვილმა დაუდასტურა.
მისი თქმით, გადაწყვეტილება ერთი თვის წინ მიიღო და ის პოლიტიკური თანამდებობის პირების შესაძლო სანქცირებას არ უკავშირდება.
“არ ვთვლი, რომ ფინანსთა სამინისტროს ამ პროცესებთან რაიმე კავშირი აქვს, თუმცა ბუნებრივია, ეს საჯარო სექტორში დასაქმებულების მოტივაციაზე დადებითად არ მოქმედებს", - უთხრა მან Bm.ge-ს.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
