,
ევროპულმა საბჭომ დღეს შვიდი ფიზიკური პირისა და შვიდი იურიდიული პირის წინააღმდეგ სანქციები მიიღო, რომელიც ირანის მიერ რუსეთისთვის რაკეტებისა და დრონების გადაცემას უკავშირდება.
„სანქციები მოიცავს ინდივიდებსა და ორგანიზაციებს, რომლებიც პასუხისმგებლები არიან უპილოტო საფრენი აპარატების, რაკეტების და მასთან დაკავშირებული ტექნოლოგიების შემუშავებასა და რუსეთისთვის გადაცემაზე უკრაინის წინააღმდეგ აგრესიული ომის მხარდასაჭერად და ასევე შეიარაღებული ჯგუფებისა და სტრუქტურებისთვის გადაცემაზე, რომლებიც ძირს უთხრიან მშვიდობასა და უსაფრთხოებას ახლო აღმოსავლეთსა და წითელი ზღვის რეგიონში“, - აღნიშნულია საბჭოს მიერ გამოქვეყნებულ ინფორმაციაში.
სასანქციო სიაში შედის სამი ირანული ავიაკომპანია - Saha Airlines, Mahan Air და Iran Air - და შესყიდვების ორი ფირმა. ისინი, შესაბამისად, პასუხისმგებელნი არიან ტრანსნაციონალური შესყიდვების ქსელების მეშვეობით ირანში წარმოებული უპილოტო საფრენი აპარატების და მასთან დაკავშირებული კომპონენტებისა და ტექნოლოგიების რუსეთისთვის გადაცემასა და მიწოდებაზე, უკრაინის წინააღმდეგ აგრესიულ ომში გამოსაყენებლად. ასევე სია მოიცავს ორ კომპანიას, რომელიც ჩართულია რაკეტების გასაშვებად გამოსაყენებელი საწვავის წარმოებაში.
გარდა ამისა, საბჭომ გადაწყვიტა შემაკავებელი ზომები დაეწესებინა ირანის თავდაცვის მინისტრის მოადგილე სეიედ ჰამზეჰ ღალანდარისთვის, ისლამური რევოლუციის გვარდიის კორპუსის ყუდსის ძალების, ისლამური რევოლუციის გვარდიის კორპუსის კუთვნილი Khatam al-Anbiya-ის ცენტრალური შტაბისა და ისლამური რევოლუციის გვარდიის კორპუსის აეროკოსმოსური ძალების ცნობილი ჩინოვნიკებისთვის. სანქციები დაუწესდათ ასევე ევროკავშირის სასანქციო სიაში შესული კომპანიების, Iran Aircraft Manufacturing Industries-ისა (HESA) და Aerospace Industries Organization-ის (AIO) მმართველ დირექტორებს.
სანქცირებული პირები დაექვემდებარებიან აქტივების გაყინვას და ევროკავშირში მოგზაურობის აკრძალვას. გარდა ამისა, აკრძალულია სახსრების ან ეკონომიკური რესურსების მიწოდება, პირდაპირ ან ირიბად, ჩამოთვლილი ფიზიკური ან იურიდიული პირებისთვის ან მათ სასარგებლოდ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
