,
გერმანულმა სამაუწყებლო კომპანიამ „დოიჩე ველემ“ (Deutsche Welle) თავის ვებ-გვერდზე გამოაქვეყნა სტატია სათაურით „ექსპერტები თვლიან, რომ ვლადიმერ პუტინის „წლიური“ პრეს-კონფერენცია დონალდ ტრამპის მმართველობისადმი მომზადებას ნიშნავს“ (ავტორი - ნიკიტა ჟოლკვერი).
გთავაზობთ პუბლიკაციას მცირე შემოკლებით:
„გერმანელი რუსოლოგები - რუსეთის სპეციალისტები - შტეფან მაისტერი და ჰანს-ჰენინგ შრედერი განმარტავენ, თუ რატომ ილაპარაკა ჩვეულებრივზე მეტი ვლადიმერ პუტინმა 19 დეკემბერს მოსკოვში გამართულ „შემაჯამებელ“ პრეს-კონფერენციაზე, უკრაინასთან მიმდინარე ომის შესახებ.
„პირდაპირი ხაზი-2024“: პუტინის მრავალსიტყვაობა უკრაინაზე
„პუტინის უხვსიტყვაობა, როგორც ჩანს, დაკავშირებულია იმასთან, რომ რუსეთის ხელმძღვანელობაში ბატონობს აზრი - რადგანაც საქმე გამარჯვებისაკენ მიდის, შეიძლება პოზიტიური განცხადებები გაკეთდეს და შიგადაშიგ დანაკარგებიც ვახსენოთ“, - ამბობს „დოიჩე ველესთან“ საუბრისას პროფესორი ჰანს-ჰენინგ შრედერი. ეს ეხება კურსკის ოლქში შექმნილ მდგომარეობასაც, რომლის მცირე ნაწილის ოკუპირებას უკრაინის არმია აგვისტოდან დღესაც აგრძელებს: „კურსკის სიტუაციაზე ვლადიმერ პუტინმა ფართოდ იმიტომ ილაპარაკა, რომ მისი გათვლით, რუსეთის არმია დონბასს მალე მთლიანად დაიპყრობს და კურსკის ოლქსაც სწრაფად გაათავისუფლებს, მით უმეტეს, რომ იქაც უკრაინის ქვედანაყოფები თანდათან უკან იხევენ“.
შტეფან მაისტერის შეფასებით, „ვლადიმერ პუტინი საკვირველად კარგ ხასიათზე იყო, მიუხედავად იმისა, რომ რუსეთი ომის მდგომარეობაში იმყოფება და მძიმე ეკონომიკური პრობლემებს განიცდის. კრემლმა ახლახან სირიაც დაკარგა“. მართალია, დონბასის ფრონტზე და კურსკის ოლქში წარმატება ნამდვილად არის, რაზედაც რუსეთის ლიდერმა ბევრი ილაპარაკა, მაგრამ არ უთქვამს, რომ ეს წარმატებები მას ძვირად უჯდება.
„ჩვენ ვხედავთ, რომ რუსეთის არმია წინ მიიწევს, მაგრამ მიიწევს დიდი დანაკარგებით. დღეისათვის რუსები უფრო მეტ ზარალს განიცდიან, ვიდრე წინა თვეებში. აშკარაა, რომ კრემლი არაფერს ერიდება რაც შეიძლება მეტი ტერიტორიის ხელში ჩასაგდებად იმ მომენტისათვის, როცა აშშ-ის არჩეული პრეზიდენტი დონალდ ტრამპი, იანუგურაციის შემდეგ, იურიდიულად მიიღებს თავის უფლებამოსილებას“, - ამბობს შტეფან მაისტერი.
რაც შეეხება რუსეთის არმიის ოპერაციას კურსკის ოლქში, ექსპერტის თქმით, მოსკოვი იქ შეტევებს „გადამწვარი მიწის“ პრინციპით ახორციელებს - საკუთარ ქალაქებსა და სოფლებს ანადგურებს“.
პრეზიდენტი რუს დაჭრილებზე და ინვალიდებზე „ზრუნავს“
ჰანს-ჰენინგ შრედერი აღნიშნავს, რომ 2024 წლის შემაჯამებენ პრეს-კონფერენციაზე ვლადიმერ პუტინმა უჩვეულოდ ბევრი ისაუბრა უკრაინასთან ომში დაჭრილ-დასახიჩრებულთა მდგომარეობაზე და მათ მკურნალობაზე. დღემდე რუსეთის ოფიციოზი და სამთავრობო პრესა ამ პრობლემაზე არაფერს არ წერდა. ექსპერტმა გაიხსენა, რომ პრეს-კონფერენციამდე რამდენიმე კვირით ადრე ვლადიმერ პუტინი ერთ-ერთ სამედიცინო ცენტრს ეწვია და დაჭრილი უფეხო ჯარისკაცები მოინახულა, მათთან სამახსოვრო ფოტოსურათიც კი გადაიღო. „პუტინს ომი რომ არ დაეწყო, ყველა ჯარისკაცს ხელ-ფეხი თავის ადგილზე ექნებოდა. სწორედ ვლადიმერ პუტინი არის პასუხისმგებელი დასახიჩრებულ ჯარისკაცთა მდგომარეობის გამო, მაგრამ ეს კრემლს არ ადარდებს“, - ამბობს ჰანს-ჰენინგ შრედერი.
ვლადიმერ პუტინი, - თვლის პროფესორი, - პრეს-კონფერენციაზე ცდილობდა, რომ ერთი მხრივ, დემონსტრირება მოეხდინა იმისა, თუ როგორ ზრუნავს რუსული სახელმწიფო და პირადად თვითონ საკუთარ ჯარისკაცებზე და მეორე მხრივ - ცდილობდა დაერწმუნებინა რუსული საზოგადოება იმაში, რომ ომი რიგითი მოქალაქეების მდგომარეობაზე ნეგატიურ გავლენას არ მოახდენს. თუმცა ინფლაციის დონე ისეთია, რომ რუსები უკვე გრძნობენ მის უარყოფით შედეგებს.
კრემლი დონალდ ტრამპის მოლოდინში
შტეფან მაისტერმა, კომენტარი გაუკეთა რა ვლადიმერ პუტინის განცხადებას - მისი მზადყოფნის თაობაზე სამშვიდობო მოლაპარაკებისა და კომპრომისებისათვის - აღნიშნა, რომ ამ მხრივ რაიმე ცვლილება რუსეთის პრეზიდენტის პოზიციებში არ მომხდარა. „უკრაინა, რუსეთის ლიდერის აზრით უნდა იყოს ნეიტრალური, არ უნდა გახდეს ნატოს წევრი, ანუ კიევს უსაფრთხოების გარანტიები არ უნდა ჰქონდეს და განიარაღდეს. კრემლის ბინადარი ამ თავის თვალსაზრისს მუდმივად იმეორებს და როგორც ჩანს, იგი თავის მაქსიმალისტურ პოზიციაზე დარჩება. მოსკოვის პირობები უკრაინისათვის მიუღებელია, რადგან ეს ნიშნავს სუვერენიტეტის და თავდაცვის უფლების წართმევას“, - აცხადებს ექსპერტი.
შეტეფან მაისტერის აზრით, ამავე ჩარჩოში ჯდება ვლადიმერ პუტინის განცხადებები ფრონტზე არსებული წარმატების შესახებ და მისი შეთავაზება გაიმართოს „დუელი“ რუსულ რაკეტა „ორეშნიკსა“ და დასავლურ ჰაერსაწინააღმდეგო დაცვის სისტემებს შორის, აგრეთვე მისი მსჯელობა ბირთვულ დოქტრინაზე. „ეს არის რუსეთის მომზადება დონალდ ტრამპის თეთრ სახლში დაბრუნებისათვის“, - ამბობს ექსპერტი.
„ვლადიმერ პუტინის მთელი პოლიტიკა დონალდ ტრამპის ირგვლივ ბრუნავს, რადგან მოსალოდნელია აშშ-ის მიდგომების შეცვლა უკრაინისა და რუსეთის მიმართ, - თვლის შტეფან მაისტერი, - დონალდ ტრამპის გეგმები შეიძლება რუსეთისათვის სასარგებლო აღმოჩნდეს, თუ თეთრი სახლი უკრაინაზე ზეწოლას მოახდენს და მას მნიშვნელოვან დათმობებზე წასვლას აიძულებს. მაგრამ შეიძლება პირიქით მოხდეს: თუ დონალდ ტრამპი მიხვდება, რომ ვლადიმერ პუტინთან დადებული გარიგება ცუდია, მას შეუძლია სიტუაციის ისეთი ესკალაცია მოახდინოს, რის გაკეთებაც ჯო ბაიდენსაც კი არ შეეძლო. ამიტომაც ამჟამად ვლადიმერ პუტინი მაქსიმალურ მოთხოვნებს აყენებს და ცდილობს რაც შეიძლება მეტი ტერიტორია დაიპყროს, მოლაპარაკების წინ თავისი პოზიციების განსამტკიცებლად. სწორედ ამ კონტექსტში უნდა განვიხილოთ კრემლის მეთაურის ყველა განცხადება“.
წყარო: https://p.dw.com/p/4oNSq
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
