,
ფრანგული ჟურნალ „ლე პუენში“ (Le point) გამოქვეყნებულია სტატია სათაურით „დაესწრება თუ არა დონალდ ტრამპი მოსკოვში გერმანიასთან ომში გამარჯვების ტრადიციულ ზეიმს“ (ავტორი - ფრანსუა-გიომ ლორენი). მართალია, აშშ-ის პრეზიდენტმა უკვე განაცხადა, რომ მოსკოვში ფაშისტურ გერმანიაზე გამარჯვების ტრადიციულ დღესასწაულს არ დაესწრება (რაც ამ ეტაპისათვის კრემლმაც დაადასტურა), მაგრამ 9 მაისამდე ჯერ კიდევ დიდი დროა და ყველაფერი შეიძლება შეიცვალოს.
გთავაზობთ პუბლიკაციას:
ვლადიმერ პუტინისათვის 9 მაისი წლის ყველაზე მნიშვნელოვანი დღეა. ეს არის მეორე მსოფლიო ომში - რუსეთისათვის „დიდ სამამაულო ომში“ - გერმანიაზე გამარჯვების ტარიღო. ეს ის ომია, რომელიც უფლებას აძლებს კრემლს ამტკიცოს, რომ მთელი მსოფლიო საბჭოთა კავშირზე უნდა ლოცულობდეს, რომელმაც ფაშისტური გერმანია დაამარცხა და პლანეტა ჯიტრელის მონობას გადაარჩინა. 9 მაისი სიმბოლური დღეა რუსეთისათვის: მოსკოვს იალტისდროინდელი რეალობის დაბრუნება სურს, როცა კომუნისტებს მთელი აღმოსავლეთი ევროპა ჰქონდათ ოკუპირებული და „გაწითლებული“. 9 მაისი ვლადიმერ პუტინისათვის ის დღეა, როცა იგი სიტყვით გამოდის და მე-20 საუკუნის ისტორიულ მოვლენას საკუთარი შეხედულებით „ჭრის და კერავს“.
„საბჭოთა საინფორმაციო ბიუროსაგან...“
ის, რაც 1945 წლის მაისში მოხდა, ევროპისათვის და რუსეთისათვის განსხვავებულ დღეებში აღინიშნება - კაპიტულაციის აქტს ხელი 8 მაისს მოეწერა, გვიანი საღამოს 23 საათზე, როცა მოსკოვში უკვე 9 მაისი იყო, ღამის პირველი საათი. ამიტომ გამარჯვების დღე დასავლეთში 8 მაისს აღნიშნება, რუსეთში კი - 9 მაისს.
სხვათა შორის, უფრო მეტი სიზუსტე რომ დავიცვათ, კაპიტულაცია სინამდვილეში ქალაქ რეიმსში 7 მაისს გაფორმდა, ცენტრალური ევროპის დროით, ღამის 2 საათსა და 41 წუთზე, რომელიც იურდიულ ძალაში შედიოდა 8 მაისს, გვიან საღამოს 23 საათსა და 01 წუთზე. იოსებ სტალინმა მოითხოვა, რომ კაპიტულაციის აქტი სწორედ ბერლინში მომხდარიყო და ამიტომ სცენა მეორედ გათამაშდა - გამარჯვებული და დამარცხებული ქვეყნების დელეგაციები ამჯერად ბერლინის გარეუბან კალრჰორსტში შეიკრიბნენ... და შემდეგ უკვე 9 მაისი ისე დაწესდა, როგორც ზემოთ ვთქვით.
როგორ გამარჯვებას იზეიმებდნენ დონალდ ტრამპი და ვლადიმერ პუტინი, 9 მაისს წითელი მოედანზე აღმართულ ტრიბუნაზე რომ მდგარიყვნენ? ალბათ, არა იმდენად 1945 წლის მაისში მიღწეულ გამარჯვებას, არამედ უფრო თავიანთს, საკუთარს - უკრაინის შესახებ სამშვიდობო მოლაპარაკების დასრულებას და ორმხრივ დოკუმენტზე ხელმოწერას, რომელიც აშშ-ის სპეცწარმომადგენელ ტიმ კელოგის გეგმით... 9 მისს უნდა დასრულდეს. თუ ყველაფერი, დავუშვათ და ისე მოხდება, როგორც თეთრ სახლს და კრემლს აქვთ ჩაფიქრებული, მაშინ 2025 წლის 9 მაისის ტრიუმფით უპირველესად ვლადიმერ პუტინი ისარგებლებს, რომელიც უკრაინას ნაცისტურ ქვეყანას უწოდებს. ანუ პუტინისებურად ასე გამოდის: გერმანულ ნაციზმზე გამარჯვებიდან 80 წლის შემდეგ რუსეთი მეორეზე - უკრაინულ ნაციზმზეც იმარჯვებს.
აშშ-ის ლიდერი კრემლის ტრიბუნაზე? ეს ადრეც მომხდარა...
მართალია, დონალდ ტრამპს უკრაინა ნაცისტურ და ჰიტლერულ ქვეყნად არ შეურაცხავს, მაგრამ მან უკვე გამოიყენა ტერმინი „დიქტატორი“ ვოლოდიმირ ზელენსკის მიმართ. თუ აშშ-ის პრეზიდენტი მოსკოვში ჩავა, მაშინ მისი ნაბიჯი მთელი მსოფლიოსათვის უფრო მეტად იმის მაჩვენებელი იქნება, რომ მისთვისაც უკრაინა ფაშისტურ ქვეყანას წარმოადგენს.
არადა, კაცმა რომ თქვას, აშშ-ის პრეზიდენტები 9 მაისს მოსკოვში რამდენჯერმე იყვნენ: 1995 წლის 9 მაისს - დემოკრატი ბილ კლინტონი, ბორის ელცინის მიწვევით: მიუხედავად პოზიციების სხვადასხვაობისა ირანის, ბოსნიისა და ნატოს გაფართოებასთან დაკავშირებით, ორივე პრეზიდენტმა ურთიერთმხარდაჭერის დემონსტრირება მოახდინეს, ხოლო 2005 წლის 8-9 მაისს მოსკოვში იყო ჩასული რესპუბლიკელი ჯორჯ ბუშ-უმცროსი, ვლადიმერ პუტინის მიწვევით...
სავარაუდოდ, არ არის გამორიცხული, რომ 2025 წლის 9 მაისს აშშ-სა და რუსეთის პრეზიდენტებმა ერთად უყურონ კრემლის ტრიბუნიდან წითელ მოედანზე მიმდინარე სამხედრო აღლუმს... ამ შემთხვევაში ეს იქნება გამარჯვების სიმბოლური ფიალის ბოლომდე შესმა ევროპელთა დასანახად, რომლებიც თავიანთ ტელევიზორის ეკრანებზე ნახავენ, თუ როგორ ესალმებიან რუს ჯარისკაცებს რუსეთისა და აშშ-ის პრეზიდენტები!
წყარო:
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
