,
აშშ-მა ჯანდაცვის მსოფლიო ორგანიზაციის დაფინანსება შეაჩერა. ამის შესახებ თეთრ სახლში გამართულ ბრიფინგზე აშშ-ის პრეზიდენტმა დონალდ ტრამპმა განაცხადა.
„ჩემს ადმინისტრაციას დღეს განკარგულება გავეცი, შეაჩერონ ჯანდაცვის მსოფლიო ორგანიზაციის დაფინანსება, ვიდრე შევისწავლით და შევაფასებთ ორგანიზაციის როლს პანდემიის ცუდად მართვაში და კორონავირუსის გავრცელების შესახებ მონაცემების დამალვაში“, - განაცხადა აშშ-ის პრეზიდენტმა.
დონალდ ტრამპმა ასევე გააკრიტიკა ის, რომ ჯანმო ეწინააღმდეგებოდა მოგზაურობის აკრძალვის ზომის შემოღებას და დროულად არ გაუზიარა საერთაშორისო თანამეგრობას ზუსტი და სწორი ინფორმაცია კორონავირუსის შესახებ.
10 აპრილს თეთრ სახლში გამართულ ბრიფინგზე აშშ-ის პრეზიდენტმა განაცხადა, რომ უახლეს დღეებში აშშ-ის მთავრობა განცხადებას გააკეთებს ჯანმოში შენატანების გაკეთებასთან დაკავშირებით. დონალდ ტრამპმა არაერთხელ გააკრიტიკა ჯანმოს ქმედებები კორონავირუსის პანდემიის დროს.
7 აპრილს დონალდ ტრამპმა Twitter-ზე დაწერა, რომ ჯანმო ორგანიზაციაა, რომელიც ჩინეთზე არის ორიენტირებული. მან ასევე აღნიშნა, რომ ორგანიზაციის მიერ კორონავირუსის პანდემიის წინააღმდეგ გადადგმული ნაბიჯები, არასწორი იყო.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
