USD 2.7384
EUR 2.8548
RUB 2.6619
თბილისი
დიზაინერები, რომლებმაც შექმნეს სტარტაპები
თარიღი:  1134

სტარტაპების მიერ ვიზუალური მხარის უგულებელყოფა გავრცელებული მიდგომაა. შეიძლება ისიც ითქვას, რომ დიდად არც დიზაინერები არიან დაინტერესებული კომპანიის მენეჯმენტში მონაწილეობით. მიუხედავად ამისა, ისინი იმაზე უკეთ ითავსებენ სტარტაპერის როლს, ვიდრე ერთი შეხედვით ვიფიქრებდით.

როცა ანტრეპრენერს ვახასიათებთ, მისი ერთ-ერთი აუცილებელი უნარი პრობლემების მოგვარება და კრეატიული, გაბედული აზროვნებაა. მას უნდა შეეძლოს კავშირების დანახვა იქ, სადაც ისინი მანამდე არ არსებობდა. არანაკლებ მნიშვნელოვანია ოქროს შუალედის პოვნა პოტენციური მომხმარებლების, თანამშრომლებისა და ინვესტორების მოთხოვნებს შორის.

მაგრამ, დიზაინერის სამუშაოც ხომ სწორედ ამ პუნქტებს მოიცავს. ფართო ხედვა და მაღალი სტანდარტები, კრეატივი, კონცეფციებსა და პროდუქტს შორის კავშირის დაჭერა, მომხმარებელთა ქცევის ანალიზი, კლიენტის სურვილების გათვალისწინება და ამ ყველაფრის ერთმანეთთან შეთავსება… ასე ახლოს ცოტა პროფესია დგას ანტრეპრენულ სულისკვეთებასთან.

ეფლი, როგორც ნათელი მაგალითი

სტივ ჯობსი რომ დიზაინს დიდ მნიშვნელობას ანიჭებდა, ეს საყოველთაოდ ცნობილია: 1982 წელს მან ესლინგერს ჩააბარა პროდუქტის დიზაინი და ამისთვის წელიწადში 1 მილიონ დოლარს უხდიდა. სიმარტივე ეფლის უპირველეს მახასიათებლად იქცა, რაც მომხმარებლისთვის მუდამ მის დახვეწილ დიზაინში გამოიხატება. მიუხედავად იმისა, რომ, ბევრის აზრით, კომპანია ძველებურად ვეღარ ვითარდება, ისინი ეფლის ერთგული სწორედ ელეგანტური ვიზუალის გამო რჩებიან.

მაგრამ, მოდი, სხვა კომპანიებსაც გადავხედოთ: Pinterest-ი, Behance-ი, Kickstarter-ი, Slack-ი და Flickr-ი – ეს სრული სიაც არაა იმ გენიალური და დღემდე ჩაუნაცვლებელი სტარტაპებისა, რომელთა თანადამფუძნებლებიც დიზაინერები არიან.

ბიჰენსი და პინტერესტი – თვითგამოხატვისა და შთაგონებისთვის

ბიჰენსი ალბათ ყველა დიზაინერმა იცის. ეს ის ადგილია, სადაც მათ თავიანთი ნამუშევრების საჯაროდ გამოფენა შეუძლიათ. მის უკან ორი მთავარი ფიგურა დგას: ანტრეპრენერი სკოტ ბელსკი და ბრენდისა და პრინტის დიზაინერი მატიას კორეა. მათი გაერთიანება შემთხვევითობა სულაც არ ყოფილა. როცა სკოტს ბიჰენსის იდეა მოუვიდა, მან, პირველ რიგში, დიზაინერი პარტნიორის ძებნაზე დაიწყო ფიქრი. ერთ-ერთ ინტერვიუში მატიასი აღნიშნავს, რომ ბელსკის მან დიზაინერობა ასწავლა, ბელსკიმ მას კი – ანტრეპრენერობა:

“გამოსავალს ბრენდი, კომპანია, ან თავად პროდუქტი გვიჩვენებდა ხოლმე. ხანდახან, საჭირო იყო, უბრალოდ, კითხვა დაგვესვა და პასუხი ჩვენი ნამუშევრიდან თავისით მოდიოდა.”

ამაზე ბელსკი ამატებს:

“რაც დიდად განსხვავდება ისეთი შემთხვევისგან, როცა დიზაინერი აუთსორსზე გყავს ან, უბრალოდ – დაქირავებული. ან, როცა დიზაინერი დამფუძნებელი ბიზნესმენს ქირაობს ბიზნეს საქმეებისთვის. ეს პროცესები აუთსორსზე რომ გაგვეტანა, ბიჰენსი ვერასდროს შეძლებდა ჩვენივე კითხვებზე პასუხის გაცემას.”

ბიჰენსზე არანაკლებ გამორჩეული პლატფორმაა პინტერესტი. ამ ონლაინ სივრცეს კრეატიული ადამიანები, ერთის მხრივ, თვითგამოხატვის, მეორეს მხრივ კი – შთაგონების საპოვნელად სტუმრობენ.

"ჩვენთან არ არსებობს დიზაინსა და ინჟინერიას შორის გამყოფი ხაზი." – ამბობს პინტერესტის თანადამფუძნებელი.

ევან შარპი პროდუქტის დიზაინერია, რომელსაც პინტერესტზე მუშაობისას მენეჯერის ფუნქცია-მოვალეობების გათავისება მოუწია, თანაც – ნულიდან. მაგრამ, დიზაინერის ხედვა მას ისეთი ნიუანსების შემჩნევაში დაეხმარა, რის გამოც ჟურნალ wired-ში იმ ტექნოლოგიურ ლიდერთა სიაში მოხვდა, რომლებიც, მათი აზრით, მომავალი 25 წლის განმავლობაში ინტერნეტ რევოლუციას გაუძღვებიან. აღნიშვნის ღირსია ისიც, რომ სილიკონ ველიზე პინტერესტი ერთ-ერთ ყველაზე ჰუმანისტურ და ინტერფეისზე ორიენტირებულ პლატფორმად ითვლება.

როცა ის მენეჯერის როლის მორგებასა და თანამშრომლების შერჩევის პროცესზე საუბრობს, ხაზს უსვამს, რომ კარგ თანამშრომელს საკუთარი სუსტი მხარეების დანახვა აუცილებლად უნდა შეეძლოს. რთულია ამაში არ დაეთანხმო. ევანი ამ თვისებასა და დიზაინერობას შორის პარალელსაც ხედავს:

“თუ კარგი დიზაინერის თვალი გაქვს, ეს ნიშნავს, რომ შეგიძლია დაინახო, რა გამოგდის და რა – არა. თუ ხედავ, რა არ გამოგდის, შენ იმუშავებ საკუთარი თავის გაუმჯობესებაზე და ეს კარგი დიზაინერების გუნდის მთავარი მახასიათებელია.”

თუმცა, Behance-ი და Pinterest-ი მაინც ისევ დიზაინერებზე მორგებული პლატფორმებია. გავცდეთ მსგავს წამოწყებებს და... კიდევ უფრო მეტ დიზაინერ სტარტაპერს აღმოვაჩენთ.

 Kickstarter-ი – ადგილი ურთიერთდახმარებისა და ინოვაციებისთვის

Kickstarer-ი საჯარო დაფინანსების (ქრაუდფანდინგის) პლატფორმაა, სადაც ყველას შეუძლია ნებისმიერი პროდუქტის იდეის გამოქვეყნება. მსურველები არჩევენ საინტერესო პროექტებს და წინასწარ ყიდულობენ მათ ნამუშევრებს. თუ პროექტმა მოთხოვნილი თანხა შეაგროვა, ისინი პროდუქტს ქმნიან და მხარდამჭერებს უგზავნიან. წინააღმდეგ შემთხვევაში, მათ თანხა უბრუნდებათ უკან.

პოტენციური მხარდამჭერების დაინტერესების ერთადერთი გზა პროექტის გვერდია. ამიტომ, იდეის ავტორებს მაქსიმალური თავისუფლება სჭირდებათ თავიანთი ხასიათის გადმოსაცემად. თუმცა, აუცილებელია საერთო სტრუქტურის ჩამოყალიბება, რათა პროექტის შესახებ ყველა აუცილებელი ინფორმაცია (შეთავაზება, მხარდამჭერების რაოდენობა, ავტორის შესახებ, ბიუჯეტის განაწილება...) მარტივად საპოვნელი იყოს მხარდამჭერისთვის. სხვა სიტყვებით, პროექტების პირადი გვერდი, ერთდროულად, თანმიმდევრულია, რათა მომხმარებლები არ დაიბნენ და თან – უნიკალური, რათა ყურადღება მიიქციოს.

ამ ორი, ერთი შეხედვით, შეუთავსებელი ფუნქციების ათვისებას გრაფიკული დიზაინერი, ჩარლზ ადლერი, ედგა სათავეში. როცა ის პროექტის ინიციატორების გვერდის დიზაინზე საუბრობს, აღნიშნავს, რომ მთავარი მიმართულება, რომელსაც მუდმივად უმეორებდა საკუთარ თავს, იყო “ნაკლები ჩვენ და მეტი - ისინი.” სამი დამფუძნებლიდან ჩარლზი სწორედ დიზაინის მიმართულებით ჩაება პროექტში და მომხმარებლებისთვის დაუვიწყარი გამოცდილება შექმნა.

კიკსტარტერს უკვე 4.5 მილიარდ დოლარზე მეტი აქვს მოგროვებული ინოვაციური პროექტებისთვის, წარმატების მაჩვენებელი კი 37%-ზე მეტია.

Slack-ი – ყველაზე ეფექტიანი სისტემა საქმიანი კომუნიკაციისთვის

Slack-ისა და Flickr-ის იდეების ავტორი სტუარტ ბატერფილდია, რომლის გზაზეც შეცდომებიდან სტარტაპ შედევრებამდე ამ სტატიაში უკვე ვისაუბრეთ. აქ იმ დიზაინერი ანტრეპრენერის მაგალითად მოგვყავს, რომლებიც არა მხოლოდ სტარტაპის განვითარებაში იყო ჩართული, არამედ თავად გახლდათ იდეის ავტორი. ფილოსოფიის კურსდამთავრებულმა, პროფესიით კი – პროდუქტის დიზაინერმა, ორჯერ მოახერხა სილიკონ ველის დაპყრობა. არსებობს გამოთქმა, რომ გლობალური პროდუქტის მოფიქრება ბოთლში ელვის გამომწყვდევასავითაა. ბატერფილდმა ეს ორჯერ მოახერხა. მის მთავარ უპირატესობად კი, მომხმარებელზე მორგებული, დელიკატური ინტერფეისის შექმნის უნარს მიიჩნევენ:

“ის ისეთი ადამიანია, შუა საუკუნეებში რომ ეცხოვრა, იდეალურ ტყავის ჩანთას შეკერავდა, ზუსტად დასმული გვირისტებით – ის საქმის ოსტატია.” – Slack-ის ერთ-ერთი პირველი ინვესტორი.

"Stewart Butterfield Photography Portraits - Slack" by Kris Krug is licensed under CC BY-NC-ND 2.0

ელევესტი - ონლაინ საინვესტიციო პლატფორმა ქალებისთვის

მომხმარებლების კვლევა ისეთივე მნიშვნელოვანი ნაწილია დიზაინის შემუშავების პროცესში, როგორც – ახალი პროდუქტის შექმნის. ხშირად, სწორედ დიზაინერები აღმოაჩენენ ხოლმე სამიზნე აუდიტორიაზე გავრცელებულ არასწორ შეხედულებებს, რომლებიც პროდუქტის ტექნიკურ ნაწილზე ორიენტირებულ დამფუძნებლებს ყურადღების მიღმა რჩებათ.

ელევესტი ქალებისთვის განკუთვნილი ონლაინ საინვესტიციო პლატფორმაა, რომლის შემქმნელებმაც პროექტის საწყის ეტაპზე დიზაინერი. კომპანიამ 2014 წლიდან 77.6 მილიონი დოლარის ინვესტიციები მოიზიდა.

სტატიაში, სადაც იდეის ავტორი, სალი კრაუჩეკი, იდეის რეალიზაციის პროცესს განიხილავს, აღნიშნავს, რომ დიზაინერის შემოერთება კომპანიის წარმატებისთვის იმაზე მნიშვნელოვანი აღმოჩნდა, ვიდრე ელოდა. ამის მიზეზი სწორედ ის კვლევებია, რომლებიც მელისამ, პროდუქტის ვიზუალური მხარის შემუშავებისას აწარმოა.

ერთ-ერთი ასეთი დეტალი უკავშირდება გავრცელებულ შეხედულებას იმის შესახებ, რომ ქალებს რისკის გაწევა არ უყვართ. პირველ მომხმარებლებთან საუბრისას მელისამ აღმოაჩინა, რომ სინამდვილეში, მათ უფრო დეტალური ინფორმაცია სჭირდებათ სხვადასხვა რისკების შესახებ, რასაც საინვესტიციო პლატფორმები ნაკლებად უზრუნველყოფდნენ. ამასთან, სწორედ მელისას იდეა იყო “მეგობრული და სახალისო” სარეგისტრაციო ფორმის შემუშავება, რომელიც საკმაოდ განასხვავდებოდა არსებული მშრალი ფორმებისგან. მომხმარებლებს ეს სანდოობის განცდას უქმნის, რის გამოც ისინი უფრო კომფორტულად გრძნობენ თავს პლატფორმის გამოყენებისას.

კარგი დიზაინი ვიზუალზე შორს მიდის

დიზაინი არაა მხოლოდ ლამაზი ტიპოგრაფია, ლოგო და ილუსტრაციები (თუმცა, არც ეს დეტალებია ისეთი უმნიშვნელო, როგორც ბევრი მიიჩნევს). დიზაინი მომხმარებელთან კომუნიკაციის უპირველესი ინსტრუმენტია. CBinsights-ის თანახმად, სტარტაპების წარუმატებლობის რიგით მეექვსე (17%) მიზეზი არამეგობრული ინტერფეისია. ამავე კვლევის თანახმად, რიგით მესამე ადგილას პროექტისთვის შეუსაბამო გუნდი დგას (23%).

ეს იმას არ ნიშნავს, რომ მხოლოდ დიზაინერობა საკმარისია სტარტაპის გასამართად. უბრალოდ, დიზაინერი შეიძლება მომხმარებლის ადვოკატად წარმოვიდგინოთ. ეს ის ადამიანია, რომელიც ბიზნეს მიზნებსა და მომხმარებლის საჭიროებებს შორის ბალანსის პოვნაში კარგადაა გაწაფული. მისი ჩართულობა კომპანიის საწყის სტადიაზე ისევე შედეგიანად მთავრდება, როგორც ტექნიკური და ბიზნეს მხარეებისა. არსებობს კიდეც ვებგვერდი წარმატებულ დიზაინერ დამფუძნებლებზე, რომლებიც თავიანთ გამოცდილებას აზიარებენ და მოტივაციას აძლევენ ამ სფეროთი დაინტერესებულ კრეატიულ ადამიანებს.

ანა მიქატაძე

წყარო:https://medialab.ge/

ანალიტიკა
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

სრულად
გამოკითხვა
ვინ გაიმარჯვებს რუსეთ - უკრაინის ომში?
ხმის მიცემა
სხვათა შორის

მსოფლიოს ისტორიაში, უდიდესი იმპერიები ტერიტორიით(მლნ კვ. კმ): ბრიტანეთი - 35.5 მონღოლეთი - 24.0 რუსეთი - 22.8 ქინგის დინასტია (ჩინეთი) - 14.7 ესპანეთი - 13.7 ხანის დინასტია (ჩინეთი) - 12.5 საფრანგეთი - 11.5 არაბეთი - 11.1 იუანების დინასტია (ჩინეთი) - 11.0 ხიონგნუ - 9.0 ბრაზილია - 8.337 იაპონია - ~8.0 იბერიული კავშირი - 7.1 მინგის დინასტია (ჩინეთი) - 6.5 რაშიდუნების ხალიფატი (არაბეთი) - 6.4 პირველი თურქული სახანო - 6.0 ოქროს ურდო - 6.0 აქემენიანთა ირანი - 5.5 პორტუგალია - 5.5 ტანგის დინასტია (ჩინეთი) - 5.4 მაკედონია - 5.2 ოსმალეთი - 5.2 ჩრდილო იუანის დინასტია (მონღოლეთი) - 5.0 რომის იმპერია - 5.0

Ford, საავტომობილო ბაზრის დომინანტი მაშინ, როდესაც საავტომობილო ბაზარი ჯერ კიდევ ჩამოყალიბების პროცესში იყო, Ford Model T იყო დომინანტი მანქანა. 1916 წლის მონაცემებით, ის მსოფლიოში ყველა ავტომობილის 55%-ს შეადგენდა.

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.