,
ვაკეში გავლისას ყურადღების მიღმა არ დაგრჩებათ ჭავჭავაძის გამზირის N37-ში მდებარე ყოფილი სტუდქალაქის 3 ავარიული შენობა. როგორ გადაურჩა ეს სამი ნაგებობა დემონტაჟს გაურკვეველია - ის ხომ ცათამბჯენებითაა გარშემორტყმული. დაინტერესებას ამ მიწის ნაკვეთის მიმართ არაერთი დეველოპერი გამოთქვამდა და გამოთქვამს, თუმცა ადგილობრივ მაცხოვრებლებთან შეთანხმება დღემდე ვერ შედგა.
გარდა რამდენიმე კერძო პირისა, ძველი სტუდქალაქის ტერიტორიაზე 32 წელია იძულებით გადაადგილებული პირები, გაუსაძლის პირობებში ცხოვრობენ. ბევრი მათგანი ყველანაირი საყოფაცხოვრებო პირობების გარეშე, 12-კვადრატულ მეტრ ოთახებშია განთავსებული, თუმცა მათი გადმოცემით მოლაპარაკება დეველოპერებთან ძალიან ნელა მიმდინარეობს. აქ მაცხოვრებელი იძულებით გადაადგილებული პირების ნაწილი, დეველოპერების მიერ შეთავაზებულ პირობებზე თანახმაა, ნაწილი კი არა.
ერთ დროს ჭავჭავაძის N37-ში სტუდენტური ცხოვრება ჩქეფდა, თუმცა დღეს არსებული რეალობა ასეთია:
ამ გაპარტახებული შენობების შემხედვარე, ჩვენ დავინტერესდით ამდენი უმაღლესი სასწავლებლის მიღმა, რამდენს აქვს საერთო საცხოვრებელი სტუდენტებისათვის და რამდენად ხელსაყრელ ლოკაციებზეა ისინი განლაგებული? ასევე, სად ცხოვრობენ სტუდენტები აქვთ თუ არა მათ შესაბამისი პირობები ცხოვრებისათვის?
როგორც აღმოჩნდა, საერთო საცხოვრებელი სახელმწიფო სასწავლებლებიდან მხოლოდ ივ. ჯავახიშვილის სახელობის თბილისის სახელმწიფო უნივერსიტეტს აქვს – ერთი ბაგებში, ხოლო მეორე ლისზე.
თსუ-ს ბაგების საერთო საცხოვრებელი სტუდენტებისათვის წყნეთის გზატკეცილზე მდებარეობს. გასული საუკუნის 70-იან წლებში აშენებულ სტუდენტურ საცხოვრებელში ე.წ. კაპიტალური რემონტი არასდროს ჩატარებულა. ის ახლა სრულად ამორტიზებულია. ლევან სამხარაულის ექსპერტიზის ეროვნული ბიუროს დასკვნის საფუძველზე, გამოიკვეთა, რომ ამ შენობების გამაგრება-რეაბილიტაცია აზრს იყო მოკლებული. ერთადერთი, რაც ამ წლების განმავლობაში შენობაში მეტ-ნაკლებად მოწესრიგდა, ეს საერთო საპირფარეშოები, საშხაპეები, სამრეცხაო და კომპიუტერული ცენტრია.
396-ადგილიანი სტუდენტური საერთო საცხოვრებელი კომპლექსი ორი, 4-სართულიანი საცხოვრებელი კორპუსისგან შედგება. კამპუსში სასტუმროს ტიპის 2-ადგილიანი ბინებია განლაგებული, სადაც სტუდენტებისათვის ცხოვრების საფასური ყოველთვიურად 50 ლარს შეადგენს.
ბაგების საერთო საცხოვრებლისგან განსხვავებით, ლისზე არსებული სტუდქალაქი, ახალაშენებული და კეთილმოწყობილია. მისი მშენებლობა 2016 წელს დასრულდა და 2017 წელს გაიხსნა. კამპუსი მთლიანობაში 320 სტუდენტზეა გათვლილი. საერთო საცხოვრებელი კომპლექსი სამი 4-სართულიანი საცხოვრებელი კორპუსისგან შედგება.
თვალჭრელიძის N11-ში მდებარე, ლისის საერთო საცხოვრებელში გათვალისწინებულია საზოგადოებრივი/ადმინისტრაციული დანიშნულების შენობა, ღია ტიპის სპორტული მოედანი, გარე სავარჯიშო სივრცე, საკონფერენციო ოთახი, ონლაინ ბიბლიოთეკა, კომპიუტერული რესურსცენტრი, სამრეცხაო, სამზარეულო და სხვა დამხმარე სახის ინფრასტრუქტურა, რომელიც სტუდენტებს მაქსიმალურად კომფორტულ გარემოს უქმნის.
საცხოვრებელ კორპუსში სასტუმროს ტიპის 2-ადგილიანი ბინებია. მათ შორის, ორი ოთახი შეზღუდული შესაძლებლობის მქონე პირებისათვისაა განკუთვნილი. ამასთან, საცხოვრებლის ინფრასტრუქტურა სრულად ადაპტირებულია შშმ პირთათვის.
სტუდენტებისთვის აქ ცხოვრების საფასური 150 ლარს შეადგენს.
გამომდინარე იქიდან, რომ ბაგების სართო საცხოვრებელი რეაბილიტაციას აღარ ექვემდებარება, ლისის საერთო საცხოვრებელი კი ათასობით სტუდენტის მოთხოვნას ვერ აკმაყოფილებს, 2017 წელს 3 000 სტუდენტზე გათვლილი, ახალი სტუდენტური საცხოვრებლის აშენება გადაწყდა. იმ დროს მოქმედმა განათლების მინისტრმა, მიხეილ ჩხენკელმა განაცხადა, რომ კამპუსი თბილისის სახელმწიფო უნივერსიტეტის მაღლივი კორპუსის მიმდებარე ტერიტორიაზე აშენდებოდა და მისი მშენებლობა 2020 წელს დასრულდებოდა. თუმცა, საერთო საცხოვრებლის მშენებლობა ამ დრომდე არ დაწყებულა.
2024 წლის თებერვალში ცნობილი გახდა, რომ თბილისის სახელმწიფო უნივერსიტეტის ახალი სტუდენტური საერთო საცხოვრებლის მშენებლობა-რეაბილიტაციის სამუშაოები იწყება. მიმდინარე სამუშაოებთან დაკავშირებით, თსუ-ის რექტორი ჯაბა სამუშია და კანცლერი ლაშა საღინაძე ტენდერში გამარჯვებულ სამშენებლო კომპანიის წარმომადგენლებს შეხვდნენ.
ინფორმაციის თანახმად, რომელსაც თბილისის სახელმწიფო უნივერსიტეტი ავრცელებს იკვეთება, რომ კომპანიამ გამაგრებითი და სარეაბილიტაციო სამუშაოები მიმდინარე წლის ოქტომბერში უნდა დაასრულოს, რის შემდეგაც უმოკლეს დროში დაიწყება შიდა სარემონტო სამუშაოები. სარემონტო სამუშაოების დასრულების შემდეგ უნივერსიტეტს, მაღალი ენერგიების ფიზიკის ინსტიტუტის ტერიტორიაზე განთავსებული, 300-მდე სტუდენტზე გათვლილი საერთო საცხოვრებელი ექნება. ახალი საერთო საცხოვრებელი სრულად დააკმაყოფილებს თანამედროვე სტანდარტებს. შენობაში განთავსდება კვების ობიექტი, მოეწყობა სოციალური სივრცე, ბიბლიოთეკა, სპორტული აქტივობებისთვის საჭირო ინფრასტრუქტურა. ტენდერში გამარჯვებული სამშენებლო კომპანია ამჟამად თბილისის მერიასთან შესაბამის დოკუმენტაციას ათანხმებს.
თსუ-ის რექტორმა კომპანიის წარმომადგენლებს სთხოვა, რომ მერიასთან უახლოეს პერიოდში აწარმოონ მოლაპარაკებები, რათა სამუშაოები რაც შეიძლება ადრე დაიწყონ. შეხვედრაზე ამავე დროს საუბარი შეეხო სამშენებლო სამუშაოების ვადაზე ადრე დასრულების შესაძლებლობას, რათა თსუ-ის სტუდენტებმა რაც შეიძლება მალე ისარგებლონ ახალი საერთო საცხოვრებლით.
წყარო:https://kalaki.ge/
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
