,
მსოფლიოში ომი მძვინვარებს. ეს არ არის ომი სახელმწიფოთა ან მათ კოალიციებს შორის. ესაა პანდემიური ომი კაცობრიობისა ვერაგი, ძალიან საშიში და დაუნდობელი მტრის - კორონავირუსის წინააღმდეგ. - წერს ანალიტიკოსი დავით ზარდიაშვილი სოციალურ ქსელში.
"ცხადია, არასწორია წარმოდგენა, რომ საფრთხე გაზვიადებულია, რის მტკიცებულებადაც ზოგს გრიპის სტატისტიკა მოჰყავს მსოფლიოში. მართლაც, ამ ბოლო წლებში, ყველაზე საშიში - ღორის გრიპით (H1N1) მთელს მსოფლიოში, დაწყებული 2009 წლიდან დაავადდა 1 632 000 და გარდაიცვალა 284 000 ადამიანი. სიკვდილიანობის პროცენტი გაცილებით მაღალია, ვიდრე კორონავირუსის შემთხვევაში. მაშ რატომაა ეს ახალი ვირუსი უფრო საშიში? მიზეზი რამდენიმეა:
1. ეს ვირუსი გაცილებით უფრო აგრესიულად უტევს მთელს მსოფლიოს, განსაკუთრებით მსოფლიო ცივილიზაციის მთავარ ციტადელს - ევროპას; სადაც მისი გავრცელების სიხშირე და სიჩქარე, ღორის გრიპისას უკვე აღემატება;
2. მედიცინამ კარგად არ იცის ამ ახალი ვირუსის ბუნება - როგორ მოიქცევა იგი ხვალ, ჯერჯერობით უცნობია. ზოგიერთი პროგნოზით (ღმერთმა ახდენისგან დაგვიფაროს) ხანგრძლივ პერიოდში (რამდენიმე წლის განმავლობაში) ეს აგრესიული ვირუსი მთელი მოსახლეობის დაახლოებით 70%-ის ოკუპირებას მოახდენს, რაც შეუდარებლად უფრო კატასტროფული მასშტაბია, ვიდრე იგივე ღორის გრიპისას გვქონდა.
3. ეფექტური საშუალება (ვაქცინა ან სხვა რაიმე წამალი) ჯერჯერობით არ არსებობს; კაცობრიობას ჯერ არა აქვს რაიმე იარაღი, რათა ამ აგრესიულ ოკუპანტს იქით შეუტიოს და დაამარცხოს; ამიტომაც ბრძოლის ერთადერთი საშუალება - ტოტალური თავდაცვაა: ფაქტიურად „საალყო წესები“ - ე.ი. გადაადგილების თავისუფლების შეზღუდვა, სოციალური დისტანციის მკაცრი დაცვა, კარანტინი და იზოლაცია, საგანმანათლებლო დაწესებულებების დახურვა, სპორტული შეჯიბრებებისა და სხვა მასობრივი სანახაობების გაუქმება და ა.შ.
4. ბუნებრივია, ეს „საალყო წესები“ არსებითად ცვლის მთლიანად კაცობრიობის ეკონომიკურ, პოლიტიკურ თუ სოციალურ სტრუქტურებსა და სისტემებს; ჯერჯერობით ისიც არ ვიცით, საშუალო ან ხანგრძლივადიან პერსპექტივაში როგორი იქნება ამ ცვლილებათა შედეგები.
ასე რომ, მსოფლიო პანდემიური ომი უკვე მოცემულობაა და ამ ომში, გვინდა ეს თუ არა, ყველანი რიგითი ჯარისკაცები ვართ.
თუკი რამ დადებითი ახლავს ამ ომს, ეს ყველა კეთილი ნების ადამიანის კონსოლიდაციაა! როგორც ჩანს, კაცობრიობას სჭირდებოდა ერთი მძლავრი შემოლაწუნება, რომ სიკეთისაკენ შემობრუნებულიყო და ბოლო წლების აბსოლუტურად დესტრუქციული დღის წესრიგისთვის ზურგი ექცია. მსოფლიო წესრიგი, რაც ბოლო ათწლეულში ე.წ. ჰიბრიდული ომებით ინტენსიურად ინგრეოდა, ამ პანდემიურმა ომმა გარკვეულწილად, მართალია, ჯერჯერობით-როგორც საგანგებო რეჟიმი ფაქტიურად ყველა წამყვან ქვეყანაში, აღადგინა. აქ ისიც ნიშანდობლივია, რომ ნეო-ლიბერალიზმის ძლევამოსილ წინსვლას მთელს მსოფლიოში, რაც „ცივი ომის“ დასრულების შემდგომ განვითარების უალტერნატივო ვექტორს წარმოადგენდა, საბოლოოდ დაესვა დიდი წერტილი!
რასაკვირველია, პოლიტიკური დღის წესრიგი ამ პანდემიურმა ომმა არსებითად შეცვალა ჩვენს ქვეყანაში: დესტრუქციული, აგრესიული ტალღა, რაც უტევდა სახელმწიფოს, საბოლოოდ უკუგდებულია და ის ძალები, ვინც ამ ტალღის იმედად იყვნენ, წელში გადატეხილები!
ცხადია, ამ პანდემიურ ომში საბოლოოდ აუცილებლად კაცობრიობა გაიმარჯვებს! ეს უეჭველია. მაგრამ სანამ ეს მოხდება, მოგვიწევს „საალყო წესებით“ ცხოვრება და საგანგებო მდგომარეობასთან შეგუება.
ჯერჯერობით ქართველები ამას ძალიან კარგად, სხვებზე უკეთაც ვახერხებთ და ბოლომდე, ვერაგი მტრის საბოლოო განადგურებამდე, სწორედ ასე უნდა გავაგრძელოთ.
ჩვენი საქმე სამართლიანია და ამჯერადაც ჩვენ გავიმარჯვებთ: ბოროტსა სძლია კეთილმან, არსება მისი გრძელია!"
დღგ-ის გადახდისგან თავის არიდება რთულდება - საქმე ის არის, რომ 2024 წლის ოქტომბრიდან ძალაში შევიდა ფინანსთა სამინისტროს ახალი რეგულაცია, რომელიც მნიშვნელოვნად შეცვლის დამატებული ღირებულების გადასახადის (დღგ) გადახდისგან თავის არიდების მიზნით შექმნილი სუბიექტების მიმართ სახელმწიფოს დამოკიდებულებას. ეს ცვლილება განსაკუთრებულ გავლენას მოახდენს როგორც მეწარმე ფიზიკურ პირებზე (ინდივიდუალური მეწარმე, მიკრობიზნესი, მცირე ბიზნესი, ფიქსირებული გადასახადის გადამხდელი პირი), ასევე ნებისმიერ წვრილ, ქსელურ, კომპანიებზე.
რა უნდა იცოდეს ბიზნესმა აღნიშნულ ცვლილებებთან დაკავშირებით - ახალ რეგულაციასთან დაკავშირებულ დეტალებს BMG-ისთან DGN Consulting-ის საგადასახადო მენეჯერი ანა ლობჟანიძე განმარტავს.
- კონკრეტულად რას გულისხმობს ფინანსთა მინისტრის გამოცემული ახალი რეგულაცია?
- 2024 წლის ოქტომბრიდან ამოქმედდა ცვლილებები ფინანსთა სამინისტროს N996 ბრძანებაში, რომლებიც დღგ-ის გადახდისგან თავის არიდების სქემების აღკვეთისკენ არის მიმართული. გარკვეული კრიტერიუმების დაკმაყოფილების შემთხვევაში, საგადასახადო ორგანოს უფლება აქვს, რამდენიმე დამოუკიდებელი სუბიექტი განიხილოს ერთ გადამხდელ პირად და ყველა სუბიექტის შემოსავალი ერთობლივად დაბეგროს. აღნიშნული ცვლილება ეხება იმ ბიზნესებს, რომლებიც ახორციელებენ ბიზნესის დანაწევრებას, რათა არ დაუფიქსირდეთ წლიური ბრუნვა 100 000 ლარზე მეტი და ამ მიზნით არეგისტრირებენ სხვა ბიზნესსუბიექტებს, იურიდიული სუბიექტის ან ინდივიდუალური მეწარმის სახით. აღნიშნული სქემით ბიზნეს სუბიექტები თავს არიდებენ დღგ-ის გადახდას.
- რა კრიტერიუმებით იხელმძღვანელებენ საგადასახადო ორგანოები?
- თუ რამდენიმე ბიზნესი აკმაყოფილებს შემდეგ კრიტერიუმებს, მათ საგადასახადო ორგანო ერთ გადამხდელ პირად განიხილავს. კრიტერიუმები შემდეგია:
1. საქმიანობასთან დაკავშირებულ გადაწყვეტილებებს ერთი და იგივე პირი იღებს;
2. საქმიანობის ადგილი და შინაარსი იდენტურია;
3. რომელიმე სუბიექტი დღგ-ის გადამხდელად რეგისტრირებული არ არის.
ამასთანავე, განმარტებულია, თუ რა პირობებში მიიჩნევა გადაწყვეტილებები ერთი და იგივე პირის მიერ მიღებულად. მაგალითად, თუ გადაწყვეტილებები მიიღება ისეთ საკითხებზე, როგორიცაა კონტრაქტორების შერჩევა, ფასების განსაზღვრა, დასაქმების პირობები ან ინვესტიციების განხორციელება.
- როგორ იმოქმედებს ეს ცვლილებები ბიზნესზე?
- ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები. რაც შეიძლება ითვალისწინებდეს დღგ-ს გადამხდელად ნებაყოფლობით რეგისტრაციას და შესაბამისად, საქონლის/მომსახურების ფასში დღგ-ის ასახვას.
- რას ურჩევდით ბიზნესს ამ ცვლილებების გათვალისწინებით?
- ბიზნესი ყურადღებით უნდა დააკვირდეს საკუთარ საქმიანობას და დარწმუნდეს, რომ საქმიანობის პროცესში ითვალისწინებს კანონმდებლობით დადგენილ ახალ კრიტერიუმებს და მიდგომებს. ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები.
წყარო:https://bm.ge/
