,
პარტია „ტრიბუნას“ დამფუძნებელმა დავით ჭიჭინაძემ „პალიტრანიუსის“ გადაცემაში „ნიუსრუმში“ განაცხადა, რომ 2020 წლის საპარლამენტო არჩევნები მისი 4-წლიანი სადეპუტატო საქმიანობის შეფასება იქნება.
აქვე მან ისაუბრა, ისნის რაიონში ქართული ოცნების მიერ დაყენებულ კანდიდატზე და აღნიშნა, რომ ქართულმა ოცნებამ მას ორი კანდიდატი დაუყენა - ვაშაძე და კახიაშვილი.
„მე ვამბობდი „ქართულმა ოცნებამ“ ორი კანდიდატი დამიყენა, ვაშაძე და კახიშვილი. ეს სააკაშვილისთვის დღეს გახდა ცნობილი? 2016 წელს რეალურად სად იყო ვაშაძე?
ან 2017 წელს როგორ ემიჯნებოდა, როგორ საუბრობდა? უბრალოდ, დოღი იყო „ქართული ოცნების“ კარზე, ვინ მიასწრებდა. გიგა ბოკერია და ვაშაძე მაგაში ბლოკავდნენ ერთმანეთს. ზოგადად, „ევრონაცებიც“ შეხმატკილებულად არიან ხელისუფლებასთან, რაც ყველგან ჩანს. როდესაც მათ ქმედებებს ვაკვირდებით, მაქსიმალურად ყველგან ცდილობენ მოლაპარაკებებში ეს 20 მანდატი, რომელიც პარლამენტში აქვთ, გამოიყენონ. თუნდაც მათ მიერ შექმნილი საგამოძიებო კომისიების მუშაობა გავიხსენოთ, ყველა უშედეგოდ დამთავრდა. მეორე - როდესაც პრემიერ-მინისტრი მოდის, ის ლაზღანდარობა, მაამებელი განცხადებებით და სიცილ-კისკისით ატარებენ მოსმენებს, როდესაც გახარიას აძლევენ იმიჯს, რომ თითქოს ძლევამოსილია. პოლიტიკაში ბევრი რამ გვაქვს ნანახი, ერთმანეთის ლანძღვაც და მერე ერთად გვინახავს ყველა. თუნდაც, ნათელაშვილის კარავში თუ ფანჩატურში შეკრება. არადა, ადრე ერთმანეთს ლანძღავდნენ და მერე ერთმანეთთან იჯდნენ.
ჩემთვის არა აქვს მნიშვნელობა, ვინ რას იტყვის, მთავარია ჩემი ამომრჩეველი რა გადაწყვეტილებას მიიღებს. იმ 4 წელს როგორ შეაფასებს, რაც მე მათი დეპუტატი ვარ. ეს არჩევნები არის ჩემი 4-წლიანი საქმიანობის შეფასება და მეტი არაფერი.
ეს იქნება იმის მაჩვენებელი, რამდენად წარმატებული პოლიტიკოსი ვარ“, - განაცხადა ჭიჭინაძემ.
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
