,
აჭარის მთავრობის მიერ, საქართველოს მთავრობის მხარდაჭერით, „ოცნების ქალაქის“ მშენებლობის მეორე ეტაპი აქტიურად მიმდინარეობს.
აჭარის მთავრობის თავმჯდომარე სულხან თამაზაშვილი ინფრასტრუქტურულ სამუშაოებს ადგილზე გაეცნო.
სულხან თამაზაშვილმა აღნიშნა, რომ მთავრობის ერთ-ერთ მთავარ პრიორიტეტად რჩება რეგიონის სოციალურ-ეკონომიკური მდგომარეობის კიდევ უფრო გაუმჯობესება.
აჭარის მთავრობის ინფორმაციით, მეორე ეტაპის ფარგლებში აშენდება 9-მრავალბინიანი საცხოვრებელი სახლი, რომლებშიც 1 077 ოჯახი მიიღებს ბინას. ახალი ბინები იქნება კეთილმოწყობილი და სრულად აღჭურვილი გაზმომარაგების და წყალარინების ინფრასტრუქტურით. გარდა საცხოვრებელი სახლებისა, ტერიტორიაზე მოეწყობა საგანმანათლებლო და რეკრეაციული სივრცეები. პროექტი 2028 წლის პირველ ნახევარში დასრულდება.
„ოცნების ქალაქის“ მშენებლობის პირველი ეტაპის ფარგლებში კი, ტერიტორიაზე სამი 12-სართულიანი საცხოვრებელი კორპუსი აშენდა და 582 ოჯახს ბინები საკუთრებაში გადაეცა.
სოციალური სახლების მშენებლობა აჭარის სხვა მუნიციპალიტეტებშიც აქტიურად მიმდინარეობს. 2028 წლისთვის, მიმდინარე პროექტები დასრულდება და 2000-ზე მეტ ოჯახს გადაეცემა კეთილმოწყობილი ბინა.
აჭარის მთავრობის თავმჯდომარესთან ერთად, სამუშაოების მიმდინარეობას ბათუმის მერის მოვალეობის შემსრულებელი გიორგი ცინცაძე და აჭარის მთავრობის წევრები გაეცნენ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
