,
ბათუმის სივრცითი განვითარებისა და განაშენიანების მართვის დოკუმენტაციის შემუშავების მიზნით გამოცხადებულ კონკურსში გამარჯვებულ კომპანია ,,სითი ინსტიტუტი საქართველოსთან“ ხელშეკრულება გაფორმდა, რომელსაც ბათუმის მერის მოვალეობის შემსრულებელმა, არჩილ ჩიქოვანმა მოაწერა ხელი. ინფორმაციას ბათუმის მერია ავრცელებს.
არჩილ ჩიქოვანის თქმით, ხელშეკრულება ისტორიული ღირებულებისაა, ვინაიდან დაიწყება მუშაობა დოკუმენტზე, რომელსაც უდიდესი მნიშვნელობა ექნება ქალაქის სწორი განვითარებისთვის.
„ერთი წლის წინ, დავდე პირობა, რომ ჩვენ დავიწყებდით სივრცითი განვითარებისა და განაშენიანების მართვის დოკუმენტების შემუშავებას. დღეს, შემიძლია თამამად ვთქვა, რომ ისტორიული დღეა, უკვე გამოვავლინეთ გამარჯვებული კომპანია და სწორედ დღეიდან, დავიწყებთ მუშაობას დოკუმენტზე, რომელსაც უდიდესი მნიშვნელობა ექნება ქალაქის სწორი განვითარებისთვის. მოგეხსენებათ, ურბანული პროცესების არასწორი მიმართულებით განვითარებამ გამოიწვია ქაოტური მშენებლობები, რაც უკვე მრავალი წელია მიმდინარეობს და ამ კუთხით ქალაქის წინაშე პრობლემები დაგროვდა. ქალაქის განვითარების პოლიტიკის დოკუმენტი კი, ბათუმს ქაოტური მშენებლობების განხორციელებისგან დაიცავს. დოკუმენტი სიღრმისეულ კვლევებს დაეყრდნობა, გაითვალისწინებს და დაარეგულირებს ქალაქის სწორ სამშენებლო პოლიტიკას, კულტურული მემკვიდრეობის დაცვას, საინჟინრო და სატრანსპორტო ინფრასტრუქტურის, ეკოლოგიური და რეკრეაციული ზონებისა და ეკონომიკურ განვითარებას, კომუნალური ქსელების მოწყობას, საზოგადოებრივ კეთილდღეობასა და სხვა ძირითადი სისტემების ოპტიმიზაციას. ინფორმაციას, დოკუმენტზე მუშაობის მიმდინარეობასთან დაკავშირებით, ჩვენ კვარტალურად ჩავიბარებთ. პროცესი იქნება გამჭვირვალე და მაქსიმალურად მოვახდენთ საზოგადოების ჩართულობას. ერთობლივი ძალისხმევით, ჩვენ შევძლებთ, გრძელვადიან პერსპექტივაში ჩვენი ქალაქის სწორ განვითარებას, რაც მნიშვნელოვანია თითოეული ბათუმელისთვის“,-განაცხადა არჩილ ჩიქოვანმა.
ბათუმის მერიის ცნობით, კომპანიის გუნდმა, მერიის ქალაქგანვითარებისა და ურბანული პოლიტიკის სამსახურის წარმომადგენლებთან ერთად, პრეზენტაცია გამართა, რომელზეც წარადგინა სამუშაო გუნდის წევრები და ისაუბრა ქალაქისთვის გენერალური გეგმის მნიშვნელობაზე, შემუშავების ეტაპებსა და სამუშაო პროცესზე. მათი ინფორმაციით, განიხილეს არსებული გამოწვევები და ხაზი გაუსვეს პროცესში დაინტერესებული პირების ჩართულობისა და გამჭვირვალობის მნიშვნელობას.
„ხელშეკრულების შესაბამისად, კონკურში გამარჯვებული კომპანია უზრუნველყოფს საპროექტო მომსახურებას, რომელიც გულისხმობს ბათუმის სივრცითი განვითარებისა და განაშენიანების მართვის დაგეგმვასა და სათანადო შედეგების მიღწევას, შუალედური და საბოლოო დოკუმენტების სახით. გენერალურ გეგმაზე მუშაობა დაახლოებით ერთი წლის განმავლობაში გაგრძელდება“,-აღნიშნულია ინფორმაციაში.
უკრაინის შესახებ დონალდ ტრამპის გეგმა, შესაძლოა, მოლაპარაკებების საფუძველი გახდეს, - ამის შესახებ კრემლის პრესსპიკერმა, დიმიტრი პესკოვმა განაცხადა.
„ამჟამად, ერთადერთი არსებითი პროექტი ამერიკული, ტრამპის პროექტია. მიგვაჩნია, რომ ეს შეიძლება მოლაპარაკებების კარგი საფუძველი გახდეს და ამის შესახებ პრეზიდენტმა პუტინმაც ისაუბრა“, - განაცხადა დიმიტრი პესკოვმა.
მისი თქმით, „უკრაინის კონფლიქტის მოგვარების შესახებ მიმდინარე მოლაპარაკებებში მოგვიანებით ევროპელების მონაწილეობა აუცილებელი იქნება“.
„ბუნებრივია, რომ ევროპის უსაფრთხოების სისტემის განხილვა და უსაფრთხოების გარანტიებზე საუბარი ევროპელების მონაწილეობის გარეშე პრაქტიკულად შეუძლებელია. გარკვეულ ეტაპზე მათი მონაწილეობა საჭირო გახდება“, - აღნიშნა პესკოვმა.
ასევე, პესკოვის ცნობით, აშშ-ის „სამშვიდობო გეგმის“ ტექსტი უკვე შეიცვალა.
„ამერიკელებსა და უკრაინელებს შორის მოლაპარაკებები მიმდინარეობს. გვესმის, რომ ტექსტში, რომელიც გამოქვეყნდა, გარკვეული ცვლილებები შედის. გვესმის, რომ ტექსტმა, რომელიც არაოფიციალურად ნაადრევად მივიღეთ, ცვლილებები განიცადა“, - განაცხადა კრემლის პრესსპიკერმა.
