ტაძრის გუმბათის ირგვლივ ხარაჩოს აგება რამდენიმე დღეში დასრულდება. რეაბილიტაციისათვის საჭირო ხარაჩოების მასალა მიტანილი და დასაწყობებულია.
სააგენტოს არქიტექტორ-რესტავრატორებმა და კონსტრუქტორების ჯგუფმა უკვე შეაფასეს გალავნის შიდა მხარეს არსებული კარიბჭე-სამრეკლოსა და მის ჩრდილოეთით მდებარე საეპისკოპოსო სახლის საბურველის მდგომარეობა. დაიგეგმა კარიბჭე-სამრეკლოსთან ხარაჩოს მოწყობა, თუნუქის საბურველის მოხსნის შემდეგ კი შეფასდება ვითარება და დაიგეგმება საჭირო სარეაბილიტაციო სამუშაოები. საეპისკოპოსო სახლის დაზიანებული კრამიტის საბურველი საჭიროებს რეაბილიტაციას, რისთვისაც ხარაჩო აიგება გარე პერიმეტრზეც.
ინფორმაციისთვის: ალავერდის ეპარქიისა და სააგენტოს წარმომადგენლებთან შეთანხმებით გადაწყდა, ტაძრის ფასადზე სასწრაფოდ მოეწყოს ხარაჩო, რათა სპეციალისტებმა შეძლონ გუმბათზე მუშაობა. სარეაბილიტაციო სამუშაოების სრულად ჩასატარებლად ალავერდში გაიგზავნა 1500 კვ. მ ხარაჩოს მასალა.
როგორც საზოგადოებისთვის ცნობილია, 26 ივნისს საქართველოს კულტურისა და სპორტის მინისტრი თეა წულუკიანი სსიპ საქართველოს კულტურული მემკვიდრეობის დაცვის ეროვნული სააგენტოს გენერალურ დირექტორ ნიკოლოზ აზნაურაშვილთან ერთად გაეცნო ალავერდის სამონასტრო კომპლექსში შექმნილ მდგომარეობას.
ალავერდის საკათედრო ტაძარი კულტურული მემკვიდრეობის ძეგლის სტატუსის მქონე ყველაზე მაღალი ეკლესიაა საქართველოში.
