ირაკლი ჩავლეიშვილი აჭარის უმაღლეს საბჭოში შედის.

ამის შესახებ მან ფეისბუქის საკუთარ გვერდზე რამდენიმე წუთის წინ დაწერა. მისივე თქმით, იგი დროებით იჩერებს „რესპუბლიკური პარტიის“ წევრობას.

„სამწუხაროდ, ჩემი და საქართველოს რესპუბლიკური პარტიის დამოკიდებულება, უმაღლესი საბჭოს ბოიკოტირებასთან დაკავშირებით რადიკალურად განსხვავდება“, – წერს იგი.

„ვფიქრობ, დეპუტატის ადგილი პარლამენტშია. ასევე თანავუგრძნობ მომიტინგეებს ქუჩაში, სადაც ჩემი პოლიტიკური ცხოვრების საკმაოდ დიდი ნაწილი გამიტარებია“ – წერს დეპუტატი და იმედს გამოთქვამს, რომ „ დადგება ის დროც, როდესაც საქართველოში პატივი მიეგება ერთი ადამიანის განსხვავებულ აზრს“.

აღსანიშნავია, რომ ირაკლი ჩავლეიშვილს ხელი არც ოპოზიციის მემორანდუმზე მოუწერია, როგორც ეს არჩეულმა 6-მა დეპუტატმა გააკეთა, მათ დააფიქსირეს, რომ უმაღლეს საბჭოში შესვლას არ აპირებენ.

უმაღლეს საბჭოში 21 დეპუტატია, აქედან პროპორციული სიით 11 მანდატი „ქართულმა ოცნებამ“ მოიპოვა, ასევე სამივე მაჟორიტარი დეპუტატი „ქართულ ოცნებას“ ერგო. უმაღლეს საბჭოში 7 ადგილი ერგო „გაერთიანებულ ოპოზიციას“, თუმცა ეს პოლიტიკური სუბიექტი უმაღლეს საბჭოში შესვლაზე უარს ამბობს.

ირაკლი ჩავლეიშვილი „გაერთიანებული ოპოზიციის“ საარჩევნო სიაში მე-6 ნომერი იყო.

ამ საკითხზე  პარტიის ერთ-ერთმა ლიდერმა, დავით ბერძენიშვილმა ასეთი კომენტარი გააკეთა:

„ირაკლი პარტიას არ დაეთანხმა და გავიდა. როგორც თავად წერს, ოპოზიციონერობას აპირებს უმაღლეს საბჭოში. პარლამენტის რესპუბლიკელი დეპუტატები, ხათუნა სამნიძე და თამარ კორძაია, ხვალ შეიტანენ დეპუტატის უფლებამოსილების შეწყვეტის მოთხოვნით განცხადებას. ირაკლის გადაწყვეტილება მძიმე ამბავია ჩემთვის ძალიან. მეტს ამ ღამით ვერაფერს გეტყვით“.

წყარო: netgazeti.ge