Galt & Taggart-ის ინფორმაციით, 2025 წლის ექვს თვეში თბილისში ყველაზე მეტი 4 055 საცხოვრებელი ბინა დიდ დიღომში გაიყიდა. შემდეგ მოდის საბურთალო 3 256 გაყიდული ბინით, ხოლო მესამე ადგილზეა სამგორი 2 664 გაყიდული საცხოვრებლით.

რაც შეეხება სხვა მონაცემებს, 2025 წლის ივნისში თბილისში 3 266 საცხოვრებელი გაიყიდა, 10%-ით მეტი 2024 წლის ივნისთან შედარებით. ივნისში კვ.მ საშუალო ფასი 3%-ით 1 338 დოლარამდე გაძვირდა. ქირის ფასის კლების ტენდენცია 2025 წლის ივნისშიც გაგრძელდა და კვ.მ-ზე ფასმა 9.4 დოლარი შეადგინა.

Galt & Taggart-ის მიერ ჩატარებული დეველოპერების გამოკითხვის (რომელიც პირველადი ბაზრის ტენდენციებს რეალურ დროში ასახავს) მიხედვით, 2025 წლის ივნისში გაყიდვები პირველად ბაზარზე წლიურად 13%-ით გაიზარდა, რაც ძირითადად გასული წლის ივნისის დაბალი ბაზითაა გამოწვეული. თუმცა გაყიდვები თვიურად მაისში დაფიქსირებული ზრდის შემდეგ კვლავ შემცირდა. ჯამურად, 2025 წლის პირველ ნახევარში, გაყიდვები წინა წლის ამავე პერიოდთან შედარებით 3.6%-ით გაიზარდა. 2025 წლის პირველ ნახევარში, თბილისში სულ 19 131 ბინა გაიყიდა და ჯამურმა ღირებულებამ 1.5 მლრდ აშშ დოლარი შეადგინა, წლიური ზრდა თითქმის 6%-ია.

რაც შეეხება მიწოდებას, 2025 წლის ივნისში ნებართვა გაიცა 10 საცხოვრებელ პროექტზე, რომელთა ჯამური საცხოვრებელი ფართი 92,244 მ 2 -ს შეადგენდა (+25.2% წ/წ გასული წლის დაბალი ბაზის ეფექტის გამო). ჯამურად, 2025 წლის პირველ ნახევარში გაცემული ნებართვების მოცულობა წლიურად 0.4%-ით შემცირდა.

Galt & Taggart-ის ინფორმაციითვე, 2025 წლის ივნისში, მაისში დაფიქსირებული კლების შემდეგ, პირველად ბაზარზე კვადრატული მეტრის საშუალო ფასი თვიურად 0.5%-ით 1 338 დოლარამდე გაიზარდა. ამასთან, მეორადი ბაზრის ახალ პროექტებში (რაც 2013 წლიდან გაცემული ნებართვებით აშენდა) ფასი გასულ თვესთან შედარებით 0.2%-ით გაიზარდა და 1 256 დოლარი შეადგინა.

2025 წლის ივნისში, თბილისში საშუალო ზომის ბინის (50-60 მ2 ) ქირის ფასი თვეში, 1.2%-ით გაიზარდა და კვადრატულზე 9.4 დოლარი შეადგინა, რაც 4.9%-ით ჩამორჩება გასული წლის ივნისის ფასს.