სს "საქართველოს რკინიგზის" 2020 წლის ფინანსური მაჩვენებლების მიხედვით, გასულ წელს რკინიგზამ 164.6 მილიონი ლარის ზარალი მიიღო. მისი ზარალიანობა წლიურ ჭრილში  159 მილიონი ლარითაა გაზრდილი.

2020 წელს ზარალის მთავარი მიზეზი კურსთაშორისი სხვაობიდან მიღებული დანაკარგებია, რომელიც 191 მილიონ ლარს უტოლდება. კომპანიის ფინანსური ვალდებულებები ნახევარ მილიარდ აშშ დოლარს აჭარბებს. ამ ვალის ძირი თანხა ლარის გაუფასურების გამო 2020 წელს გაიზარდა. რაც შეეხება შემოსავლებს, შარშან რკინიგზამ 2019 წელთან შედარებით,  0.2 მილიონი ტონით მეტი, სულ  11.1 მილიონი ტონა ტვირთი გადაზიდა, თუმცა შემოსავლები წლიურ ჭრილში 2 მილიონი ლარით შეუმცირდა და  489.4 მილიონი ლარს გაუტოლდა. 2012 წელს რკინიგზის მიერ გადაზიდული ტვირთი 20.1 მილიონ ტონას გაუტოლდა, 2013 წლიდან მოყოლებული 2018 წლის ჩათვლით, საქართველოს რკინიგზაში ტვირთბრუნვა ყოველწლიურად იკლებდა.  2018 წელს კომპანიას ტვირთბრუნვა 10 მილიონ ტონამდე შეუმცირდა, 2019 წლიდან კი, სატრანზიტო ნაკადებმა ზრდა დაიწყო და 10.9 მილიონ ტონას მიაღწია, 2020 წელს კი 11.1 მილიონი ტონა გახდა.

რკინიგზის მოგება ყველაზე მაღალი 2011 წელს იყო, როცა 74 მილიონი ლარის მოგება მიიღო. ყველაზე ზარალიანი მისთვის 2018 წელი იყო, როცა კომპანია 716-მილიონიან ზარალზე გავიდა.