,
საქართველოს ინფრასტრუქტურის სამინისტროს საავტომობილო გზების დეპარტამენტს თბილისის შემოვლითი მაგისტრალის მეორე ლოტის - წიწამური-ავჭალის 7.3-კილომეტრიანი მონაკვეთის მშენებლობაზე გამოცხადებულ საერთაშორისო ტენდერში ჩინურმა კომპანიამ China Railway Tunnel Group Co-მ გაიმარჯვა. საერთაშორისო ტენდერი 2025 წლის 30 დეკემბერს გამოცხადდა, მასში წინადადებების მიღება 25 მარტს დასრულდა, რომელშიც განაცხადი 10-მა კომპანიამ დააფიქსირა, პირველ სექტემბერს კი გამარჯვებულად China Railway Tunnel Group Co დასახელდა. პროექტის განხორციელების ვადა 36 თვეს შეადგენს.
კომპანიამ ორი პარალელური გვირაბი უნდა გაიყვანოს წიწამურიდან ავჭალის მიმართულებით, აღნიშნული გვირაბი კი დაუკავშირდება ავჭალა-აეროპორტის 22.5-კილომეტრიან მონაკვეთს, რომელზეც 932 მილიონი ლარის სავარაუდო ღირებულების ტენდერში კომპანიის შერჩევის პროცესი ამ დრომდე გრძელდება.
წიწამური-ავჭალის გზის ტენდერი თავდაპირველად 490 მილიონი ლარის ღირებულებით გამოცხადდა, თუმცა მასში მონაწილე ყველა კომპანიამ ამაზე მაღალი ფასი დააფიქსირა.
წარდგენილი წინადადებები ასე ნაწილდებოდა:
თუმცა, გამარჯვებულ კომპანიასთან - China Railway Tunnel Group Co-თან როგორც ჩანს საბოლოო განაცხადის დაფიქსირების შემდეგ გაგრძელდა მოლაპარაკებები და ფასი საბოლოოდ 499,147,373 ლარამდე შემცირდა, რაც 20-მილიონიან ფასდაკლებას წარმოადგენს.
პროექტის ფარგლებში მოეწყობა 7.3-კილომეტრიანი, 4-ზოლიანი გზა, რომელიც მოიცავს 3.4 კმ სიგრძის ორ პარალელურ გვირაბს, ასევე ხიდებს, საგზაო კვანძებსა და სხვა ხელოვნურ ნაგებობებს.
"მონაკვეთი მოიცავს დაახლოებით 3.4 კმ-იან ორმაგ გვირაბს, რომელიც აკავშირებს წიწამურსა და ავჭალის დასახლებებს. ზაჰესის გავლით არსებული გზის განახლების შეუძლებლობის გამო, გვირაბი პირდაპირ შემოვლით გზას ქმნის აღმოსავლეთის მიმართულებით.
გვირაბი ორმაგი კამერითაა დაგეგმილი, სადაც მილებს შორის უზრუნველყოფილია კავშირი კომუნიკაციისა და უსაფრთხოებისათვის. მთელი სავალი ნაწილის სიგანეზე (მათ გარეშე, რაც მოიცავს ტროტუარებს) უზრუნველყოფილია 5.00 მ ვერტიკალური ჰაერის სივრცე. გვირაბში დიზაინის სიჩქარე შეზღუდულია 80 კმ/სთ-მდე (საქართველოში მოქმედი ზოგადი წესი). მაქსიმალური გრძივი დაქანება გვირაბში შეადგენს 1.1%-ს. წიწამურის პორტალის საწყისი ნიშნული ზღვის დონიდან არის 498.99 მ, ხოლო ავჭალის პორტალის – 479.10 მ. გვირაბის მაქსიმალური მიწის საფარი დაახლოებით 200 მ-ს შეადგენს.
სპეციალური ტომოგრაფიული ელექტრული კვლევა ჩატარდა გვირაბის მთელ სიგრძეზე ზედაპირიდან, რის შედეგადაც მიღებულია დეტალური და უწყვეტი ინფორმაცია მიწისქვეშა ფენების შესახებ.
პორტალები იდენტიფიცირებულია ახლომდებარე სოფლების სახელებით:
ორივე პორტალზე შესაძლებელი იქნება მოძრაობის გადართვა ერთი გვირაბიდან მეორეში ტექნიკური მომსახურების, სამუშაოების ან ავარიის შემთხვევაში,"- ნათქვამია პროექტის განმარტებით დოკუმენტაციაში.
წიწამური-ავჭალის 7.3-კილომეტრიანი გზა დაუკავშირდება ავჭალა-აეროპორტის მონაკვეთს, რომელიც მეტწილად თბილისის ყოფილი შემოვლითი რკინიგზის მარშრუტს გამოიყენებს. გზის აღნიშნული მონაკვეთის სიგრძე 22.5 კილომეტრი იქნება და ის თბილისის შემოვლითი მაგისტრალის ყველაზე ძვირად ღირებული მონაკვეთი იქნება.
წიწამური-ავჭალის გზის მონაკვეთის გვირაბის შესასვლელის საპროექტო სქემა:
გზის მესამე ლოტი - ავჭალა-აეროპორტი
რაც შეეხება ავჭალა-აეროპორტის 22.5-კილომეტრიან მონაკვეთს, ტენდერში მონაწილეობა რვა კომპანიამ მიიღო. მისი სავარაუდო ღირებულება 932 მილიონი ლარია. ამ შემთხვევაშიც წინადადებების შეფასება მიმდინარეობს. მონაწილეების მიერ დაფიქსირებული ფასები 950 მილიონი ლარიდან 1.16 მილიარდ ლარამდე მერყეობს.
აღნიშნული ტენდერი 2026 წლის თებერვალში გამოცხადდა, წინადადებების მიღება პირველ ივნისს დასრულდა, ხოლო წინადადებების განხილვა ამ დრომდე მიმდინარეობს.
მეოთხე და მეხუთე მონაკვეთები:
საქართველოს საავტომობილო გზების დეპარტამენტმა შემოვლითი მაგისტრალის მე-4 და მე-5 ლოტების საერთაშორისო ტენდერები 2026 წლის 19 ივნისს გამოაცხადა. ტენდერებში ინტერესის გამოხატვის ვადა თავდაპირველად 3 აგვისტოს იწურებოდა, თუმცა მთავრობამ ვადა 14 სექტემბრამდე გაახანგრძლივა.
მე-4 ლოტი დაახლოებით 8.7-კილომეტრიან აეროპორტი-ლოჭინის მონაკვეთს მოიცავს და თბილისის შემოვლით გზას ლოჭინის სატრანსპორტო კვანძთან დააკავშირებს. სამუშაოების დაწყებიდან მისი მშენებლობის ვადა 30 თვეა.
მე-5 ლოტი, ლოჭინი-რუსთავის მონაკვეთი, 10.2 კილომეტრის სიგრძისაა და შემოვლითი გზის სამხრეთ ნაწილს წარმოადგენს. მისი მშენებლობის ვადა 20 თვეა.
ორივე ლოტის დაფინანსება ADB-ის სესხით იგეგმება, ხოლო მათი ჯამური ღირებულება დაახლოებით $250 მილიონია.
აეროპორტი-ლოჭინის 8.7-კილომეტრიანი მონაკვეთი:
ლოჭინი-რუსთავის 10.2-კილომეტრიანი მონაკვეთი
