,
bm.ge
ვიწყებთ მონაცემების გამოქვეყნებას, რათა საზოგადოებას აღარ დარჩეს კითხვის ნიშნები, – ამის შესახებ საქართველოს ყოფილი პრემიერმინიტრი ზურაბ ნოღაიდელი აცხადებს, რომელიც დღეს საერთაშორისო კომპანია “ელ გრინში” მოღვაწეობს და სათავეში უდგას ისეთ პროექტს, რომელიც აზერბაიჯანიდან საქართველოს გავლით თურქეთში ელექტროენერგიის მიწოდებას, ასევე აზერბაიჯანიდან საქართველოში ელექტროენერგიის იმპორტს გულისხმობს. კომპანიასთან დაკავშირებით არსებულ კითხვებზე მან გადაცემა “ფორბს კვირაში” გიორგი ისაკაძესთან ინტერვიუში ისაუბრა.
ზურაბ ნოღაიდელის განმარტებით, ხშირად ისმის კითხვები, თუ რატომ ყიდულობს საქართველო ელექტროენერგიას “ელ გრინისგან”(რომელიც იმპორტს აზერბაიჯანიდან ახორციელებს) და ხომ არ არიან კომპანიის დამფუძნებლები დაკავშირებული მმართველ პარტიასთან? მისი თქმით, არსებობს მოსაზრება, რომ აზერბაიჯანიდან ელექტროენერგიის იმპორტი უფრო ძვირია, რუსეთში კი უფრო იაფი, თუმცა, საქართველოსა და რუსეთის პოლიტიკური ურთიერთობიდან გამომდინარე, ქვეყანა ერიდება ჩრდილოელი მეზობლისგან ელექტროენერგიის შეძენას და ყიდულობს ძვირ ელექტროენერგიას აზერბაიჯანიდან.
“დღეს კითხვები ისმის ასე, რომ აზერბაიჯანიდან იმპორტის ფასები მაღალია, ვიდრე რუსეთიდან, მაგრამ "რუსეთიდან იმპორტს პოლიტიკური მიზეზების გამო არ ვახორციელებთ" და ვითომ აზერბაიჯანიდან იმპორტი პოლიტიკურია და ფასიც მაღალია… შემდეგ ამას მოჰყვება სხვა სპეკულაციები, რომ რადგან “ელგრინს” აძლევენ უფრო მაღალ ფასად ელექტროენერგიის შემოტანის შესაძლებლობას, ვიღაც არის წილში და ა.შ. ამ ყველაფერს ერთხელ და სამუდამოდ უნდა გაეცეს პასუხი”,– აცხადებს ზურაბ ნოღაიდელი და აღნიშნავს, რომ სწორედ ამ კითხვების გასაბათილებლად კომპანიამ გადაწყვიტა, ყოველი თვის დასრულებისა და მონაცემების შეჯამების შემდეგ გამოაქვეყნოს მონაცემები: რა ფასად მიაწოდეს საქართველოს ელექტროენერგია აზერბაიჯანიდან, რა იყო სხვა შეთავაზებები და ა.შ.
ზურაბ ნოღაიდელი კონკრეტულ მაგალითზეც საუბრობს და განიხილავს, რამდენი ელექტროენერგია და რა ფასად შეიძინა საქართველომ იანვარში. მისი განმარტებით, იანვრის პირველ ნახევარში, როცა დასვენებები იყო, ქვეყანას უღირდა რუსეთიდან ელექტროენერგიის შეძენა, მოგვიანებით კი აზერბაიჯანიდან. იანვრის თვის მონაცემებზე ნოღაიდელი დეტალურად საუბრობს.
“ენგურჰესი 21 იანვარს გაჩერდა, რის გამოც 2021 წლის იანვარში საქართველოში ელექტროენერგიის იმპორტმა შეადგინა 414.1 მლნ კვტ/სთ. ეს არის ძალიან დიდი რაოდენობა, რაც გასაგებია ენგურჰესის გაჩერებიდან გამომდინარე.
საქართველოში 262.3 მლნ კვტ/სთ ელექტროენერგიის იმპორტი რუსეთიდან და დაახლოებით 151.8 მლნ კვტ/სთ–ის იმპორტი აზერბაიჯანიდან განხორციელდა. ფორმალურად ჩანს, რომ რუსეთდან იმპორტი ბევრად მეტია, ვიდრე აზერბაიჯანიდან, მაგრამ ახლა დეტალურად გავიაროთ: რუსეთიდან იმპორტის დიდი ნაწილი 182.4 მლნ კვტ/სთ მოხმარდა აფხაზეთის მოხმარების დაბალნსებას. შესაბამისად, სახელმწიფოს ამაში თანხა არ გადაუხდია – ეს არის რუსეთის მიერ სუბსიდირებული ელექტროენერგია აფხაზებისთვის.
ხოლო, 79.9 მლნ კვტ/სთ–ის იმპორტი რუსეთიდან განახორციელა ესკომ(ელექტროენერგიის ბაზრის ოპერატორმა საქართველოში). რუსეთის იმპორტის ფასები იანვარში, შაბათ–კვირას იყო 4.1 ცენტი, ღამე 10 საათის განმავლობაში 4.1 ცენტი, დღის და საღამოს, 14 საათის განმავლობაში– 7.8 ცენტი. მაგრამ იმის გამო, რომ იანვრის პირველი 10 დღე სულ დასვენების დღეები იყო, საქართველოსთვის კომერციულად უფრო მისაღები იყო რუსეთიდან იმპორტი.
ესკო ასეც მოიქცა და მიიღო კიდეც საშუალო ფასი 4.1 ცენტი და განახორციელა 69.9 მლნ კვტ/სთ–ის იმპორტი რუსეთიდან 1–10 იანვარს.
რაც შეეხება აზერბაიჯანიდან იმპორტს, ელექტროენერგიის ნაწილი 47.2 მლნ კვტ/სთ – მთელი თვის განმავლობაში მიეწოდათ პირდაპირ მომხმარებლებს და 12.9 მლნ კვტ/სთ ტრანზიტით გავიდა თურქეთში.
104.3 მლნ კვტ/სთ–ის იმპორტი განახორციელა ესკომ "ელ გრინთან" დადებული კონტრაქტით და ფასები იყო შაბათ–კვირას 3.9 ცენტი, ღამის საათებში 3.9 ცენტი და დღის და საღამოს, 14 საათის განმავლობაში– 5.4 ცენტი, შესაბამისად, ნათელია, რომ 11–იანვრიდან მოყოლებული ესკომ ელექტროენერგიის იმპორტი განახორციელა აზერბაიჯანიდან და არა რუსეთიდან”,– აცხადებს ზურაბ ნოღაიდელი.
წყარო:https://bm.ge/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
