ახმეტის მუნიციპალიტეტში, სადაც ძლიერი ქარიშხალი იყო, შესაბამისი სამსახურის წარმომადგენლების მიერ გაწმენდითი სამუშაოები მიმდინარეობს.
ქარბორბალას შედეგად დაზიანებულია მეუფე დავითის რეზიდენციის სახურავი და საუკუნოვანი ტაძრის გუმბათი. გარდა ამისა, უამინდობამ გაანადგურა მონასტრის მიმდებარე პერიმეტრზე არსებული ინფრასტრუქტურა. მოგლეჯილია მრავალწლიანი ხეები. დაზიანდა ერთი ავტომობილი. საბედნიეროდ, სტიქიის შედეგად არავინ დაშავებულა.
კახეთის მხარეში სახელმწიფო რწმუნებულის, გიორგი ალადაშვილის ჩართულობით, ადგილზე მობილიზებულია ყველა შესაბამისი სამსახური. ამ ეტაპზე მიმდინარეობს ზარალის აღწერა.
საქართველოს კულტურული მემკვიდრეობის სააგენტო აღნიშნულთან დაკავშირებით განცხადებას ავრცელებს:
"ალავერდის სამონასტრო კომპლექსის ტერიტორიაზე იმყოფებიან სსიპ საქართველოს კულტურული მემკვიდრეობის დაცვის ეროვნული სააგენტოს წარმომადგენლები, რომლებიც ეცნობიან შექმნილ მდგომარეობას.
სტიქიის შედეგად გადახდილია გუმბათის თუნუქის საფარი, ტაძრის სამხრეთ კალთაზე დაზიანებულია ლორფინის სახურავი, ჩამსხვრეულია ტაძრის დასავლეთი მხარის და გუმბათის სარკმლები, დაზიანებულია სამრეკლოს თუნუქის სახურავი და საეპისკოპოსო სასახლის კრამიტის სახურავი, ჩამოშლილია სასახლის აივანი, ტაძრის გუმბათიდან ჩამოვარდნილია ჯვარი და დაზიანებულია მიმდებარე ტერიტორიის ინფრასტრუქტურა.
ამჟამად მიმდინარეობს დაზიანებათა სიმძიმის განსაზღვრა და უახლოეს დღეებში ადგილობრივ ეპარქიასა და მის მმართველ აბბა ალავერდელ მიტროპოლიტ დავითთან ერთად დაიგეგმება ტაძრის დაზიანებების აღმოსაფხვრელი ღონისძიებები."
