,
აშშ-ის გაზეთ USA Today-ში გამოქვეყნებულია სტატია სათაურით „რობერტ კენედი-უმცროსმა მოულოდნელად საპრეზიდენტო არჩევნებში მონაწილეობა გამოაცხადა. მას ჯო ბაიდენის მომხრეებიც ენდობიან“ (ავტორი - სიუზან ფეიჯი), რომელშიც განხილულია სავარაუდო კანდიდატის საარჩევნო პერსპექტივა და საკმაოდ ოპტიმისტური პროგნოზია მოცემული.
გთავაზობთ პუბლიკაციას მცირე შემოკლებით:
რობერტ კენედი-უმცროსმა განაცხადა, რომ მონაწილეობას მიიღებს აშშ-ის პრეზიდენტის პოსტის დასაუფლებლად 2024 წლის არჩევნებში დემოკრატიული პარტიიდან. გამოკითხვების მონაცემებით, რომელიც USA Today-სა და ბოსტონის საფოლკის კვლევითი უნივერსიტეტის მიერ ერთობლივად ჩატარდა, გაირკვა, რომ რობერტ კენედის მხარს უჭერს ჯო ბაიდენის 2020 წლის მომხრეთა 14%. ეს პოპულარობის საკმაოდ საკვირველ შედეგს წარმოადგენს ცნობილი პოლიტიკური კლანის წარმომადგენლისთვის - რობერტ კენედი-უმცროსი განთქმულია როგორც შეთქმულების თეორიების აქტიური მხარდამჭერი, განსაკუთრებით ბავშვთა აუტიზმისა და კოვიდის საწინააღმდეგო ვაქცინებთან დაკავშირებით.
გამოკითხვის დროს, რომელიც 15-18 აპრილს ჩატარდა სტაციონარული და ფიჭური ტელეფონების მეშვეობით აშშ-ის დემოკრატიული პარტიის მხარდამჭერებს შორის, მხოლოდ 67%-მა განაცხადა მათგან, ვინც ჯო ბაიდენს ხმა მისცა 2020 წელს, რომ კვლავ მხარს დაუჭერენ ამჟამინდელ პრეზიდენტს, რობერტ კენედიმ კი ყოფილი „ბაიდენისტების“ 14%-ის ნდობა დაიმსახურა. კიდევ 5% მომხრეა მწერალ მარიან უილიამსონისა, რომელიც ავტორია პოპულარული წიგნისა ფსიქოლოგიის შესახებ. 13%-ს ჯერ კიდევ არ აქვს გადაწყვეტილი, თუ ვის მისცემს თავის ხმას. ცდომილობა დაახლოებით 4%-ს შეადგენს.
გამოკითხვის შედეგები ხაზს უსვამს ჯო ბაიდენის პოტენციურ მოწყვლადობას დემოკრატიული პარტიის უფრო პოპულარულ პრეტენდენტებთან შედარებით, რომლებიც, მართალია, ოფიციალურად ჯერ კიდევ არ არიან რეგისტრირებულნი, მაგრამ აუცილებლად გამოჩნდებიან.
„2020 წელს ჯო ბაიდენმა უფრო მეტი ხმა მიიღო, ვიდრე სხვა პრეზიდენტობის კანდიდატმა აშშ-ის ისტორიაში, მაგრამ გამოკითხვა აჩვენებს, რომ დღეს იგივე ამომრჩეველი მზად არის მხარი დაუჭიროს დემოკრატების სხვა წარმომადგენელს. პრაიმერიზი ძალიან დაძაბული იქნება“, - განაცხადა დევიდ პალეოლოგოსმა, საფოლკის უნივერსიტეტში არსებულმა პოლიტიკური კვლევების ცენტრის ხელმძღვანელმა, - რობერტ კენედის შანსები ჯერ-ჯერობით მცირეა, მაგრამ მას საკმაოდ მოულოდნელი ორნიშნა პროცენტული მხარდაჭერა აქვს, რაც ძალზე წარმატებული დასაწყისია“.
იმავე გამოკითხვის შედეგებით ირკვევა, რომ რობერტ კენედის მხარს უჭერენ ჯო ბაიდენის ყოფილი მომხრეები კონსერვატორებიდან (რომლებიც თვლიან, რომ პრეზიდენტი ძალიან ლოიალურია), ახალგაზრდებიდან და მათგან, ვისაც უმაღლესი განათლება არ აქვს.
რობერტ კენედი-უმცროსი, 69 წლის იურისტი-ეკოლოგი, არის რობერტ ფიტცჯერალდ კენედი-უფროსის შვილი, რომელიც 1968 წლის საპრეზიდენტო კამპანიის დროს ლოს-ანჟელესში მოკლეს და ძმისშვილი აშშ-ის ექს-პრეზიდენტ ჯონ კენედისა, რომელიც 1963 წელს დალასში მოკლეს. კენედების ცნობილი დინასტიის წარმომადგენელი დარწმუნებულია, რომ აუტიზმის საწინააღმდეგო ვაქცინა სასარგებლო კი არ არის, არამედ მავნეა. იგი თავის აზრს მტკიცედ იცავს იმის მიუხედავად, რომ ვაქცინის მავნებლობა სამეცნიერო კვლევებით არ დადასტურდა.
„კოვიდ-19“-ის პანდემიის დროს რობერტ კენედი პოპულარული გახდა სოციალურ ქსელებში იმით, რომ იგი წინააღმდეგი იყო აცრებისა და თვლიდა, რომ აცრებზე იძულება პიროვნების თავისუფლების დარღვევას წარმოადგენდა. არცთუ იშვიათად რობერტ კენედი-უმცროსი აცრებზე იძულებას ჰოლოკოსტს ადარებდა და ეჭვი შეჰქონდა ანტიკოვიდური ვაქცინის უსაფრთხოებაში. სხვათა შორის, მისი შეხედულებები ხშირად ემთხვეოდა დონალდ ტრამპისა და მისი მომხრეების პოზიციებს. კიდევ ერთი საინტერესო დეტალი: 2017 წელს დონალდ ტრამპმა სწორედ რობერტ კენედის სთხოვა ეხელმძღვანელა საპრეზიდენტო კომისიისათვის ვაქცინების უსაფრთხოების დადგენის თაობაზე.
წყარო: https://www.usatoday.com/story/news/politics/2023/04/19/rfk-jr-campaign-poll-biden-voters/11690888002/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
