07:39,
04/08
.jpg)
2025 წლის 1-ელი თებერვლიდან სამშენებლო მომსახურებაზე აღარ გავრცელდება სპეციალური დაბეგვრის რეჟიმი - მცირე ბიზნესის სტატუსის მქონე მეწარმე ფიზიკური პირები სამშენებლო მომსახურებისას ვეღარ ისარგებლებენ 1%-იანი შეღავათიანი განაკვეთით. სამშენებლო მომსახურებიდან მიღებულ შემოსავლებზე მცირე ბიზნესის სტატუსი აღარ გავრცელდება და მეწარმე 20%-იანი განაკვეთით დაიბეგრება.
ეს ცვლილება („სპეციალური დაბეგვრის რეჟიმების შესახებ“ საქართველოს მთავრობის №415-ე დადგენილებაში) საშუალო და გრძელვადიან პერიოდში გამოიწვევს მცირე სამშენებლო კომპანიების გაქრობას, სამშენებლო სექტორში ხელფასების შემცირებას და ფასების ზრდას სამშენებლო/ სარემონტო მომსახურებაზე. სამშენებლო მომსახურების გაძვირება ბუნებრივია აისახება უძრავი ქონების ღირებულებაზე. დეველოპერებს და კერძო მშენებლებს გაეზრდებათ ხარჯები, რაც საბოლოოდ უძრავი ქონების ღირებულების ზრდას გამოიწვევს.
„სპეციალური დაბეგვრის რეჟიმში ცვლილებების“ შესახებ BMG DGN Consulting-ის საგადასახადო მენეჯერს ანა ლობჟანიძეს ესაუბრა.
- კონკრეტულად რა ცვლილებები შევიდა „სპეციალური დაბეგვრის რეჟიმების შესახებ“ დადგენილებაში და კონკრეტულად ვის შეეხება ეს ცვლილებები?
2025 წლის 1 თებერვლიდან ძალაში შედის ცვლილება, რომლის მიხედვითაც სამშენებლო მომსახურების გაწევით მიღებული შემოსავალი აღარ დაიბეგრება 1%-იანი შეღავათიანი განაკვეთით. ეს ცვლილება ეხება მცირე ბიზნესის სტატუსის მქონე მეწარმე ფიზიკურ პირებს, რომლებიც სამშენებლო მომსახურებას უწევენ საწარმოებს, ორგანიზაციებს ან სხვა მეწარმეებს. ამ ტიპის კომპანიები 1 თებერვლიდან ვალდებულნი იქნებიან მიღებული შემოსავალი 20%-იანი საშემოსავლო გადასახადით დაბეგრონ. 1%-იანი განაკვეთი შენარჩუნდება მხოლოდ იმ შემთხვევაში, თუ მომსახურება გაწეულია არამეწარმე ფიზიკური პირისთვის. მეტი სიცხადისთვის განვმარტავ, რომ სამშენებლო სამუშაო მოიცავს როგორც უშუალოდ მშენებლობას, ასევე რემონტს და მოპირკეთებას.
- რა გავლენას მოახდენს ეს ცვლილება სამშენებლო მომსახურების ბაზარზე?
ამ ცვლილების პირდაპირი შედეგი იქნება სამშენებლო მომსახურების ფასების ზრდა. მეწარმეებს მოუწევთ დამატებითი ხარჯების გათვალისწინება ფასის განსაზღვრისას, რაც ბუნებრივად აისახება დამკვეთზე. დღეს, ბევრი სამშენებლო კომპანია იყენებს მცირე მეწარმეების მომსახურებას სამშენებლო პროცესში. ეს ეხება როგორც მსხვილ სამშენებლოებს და დეველოპერებს, ასევე მცირე კომპანიებს. შესაბამისად, შეღავათის გაუქმება პირდაპირ გააძვირებს მომსახურების ფასს და შესაძლოა შეამციროს მეწარმე ფიზიკური პირების მიერ მიღებული შემოსავალი.
- რა ეფექტი ექნება უძრავი ქონების ბაზარზე ამ ცვლილებას?
უპირველესად, სამშენებლო ხარჯების ზრდა გააძვირებს უძრავ ქონებას, განსაკუთრებით იმ სეგმენტში, რომელიც საშუალო და დაბალი შემოსავლის მქონე მომხმარებელზეა ორიენტირებული. მცირე მეწარმეები დაკარგავენ კონკურენტულ უპირატესობას, რაც შეიძლება მათი საქმიანობის შეწყვეტის მიზეზი გახდეს. ახალი წესები განსაკუთრებით რთულ მდგომარეობაში ჩააყენებს მათ, ვისაც შეზღუდული რესურსები აქვთ. საშუალო და გრძელვადიან პერიოდში ცვლილების გავლენა შესაძლოა კიდევ უფრო მწვავე იყოს და გამოიწვიოს მცირე სამშენებლო კომპანიების გაქრობა, სამშენებლო სექტორში ხელფასების შემცირება და ფასების ზრდა სამშენებლო/სარემონტო მომსახურებაზე.
- რა უნდა გაკეთდეს, რომ ეს ცვლილებები ნაკლებად დამაზიანებელი იყოს მცირე ბიზნესისთვის?
აღნიშნული ცვლილება მიღებულია და არ ითვალისწინებს საშეღავათო პერიოდს. 2025 წლის 1 თებერვლიდან გადასახადი ოცმაგდება. შესაბამისად, გადასახადის გადამხდელს სხვა ალტერნატივა არ რჩება. ამ ეტაპზე აუცილებელია სამშენებლო კომპანიების და შესაბამისი შეღავათით მოსარგებლე მცირე მეწარმე ფიზიკური პირების ინფორმირება მოსალოდნელ ცვლილებასთან დაკავშირებით. შეღავათის გაუქმება არსებითად ცვლის როგორც სამშენებლო პროექტის ხარჯების სტრუქტურას, ასევე მცირე მეწარმეების შემოსავლის ოდენობას. თუ გავითვალისწინებთ, რომ პრაქტიკულად ერთი თვეა დარჩენილი კანონის ამოქმედებამდე, აუცილებლად მიგვაჩნია აღნიშნულ საკითხზე საგადასახადო ორგანოების პროაქტიური მუშაობა სამშენებლო კომპანიებთან და მეწარმე ფიზიკურ პირებთან. სამწუხაროდ, მცირე მეწარმეების დიდი ნაწილი თვალს ვერ ადევნებს საკანონმდებლო ცვლილებებს. პროაქტიური მიდგომის გარეშე, ამ პირებს შესაძლოა, დამატებითი ზიანი მიადგეთ, საგადასახადო ჯარიმის დაკისრებით არასწორი საგადასახადო ანგარიშგების წარდგენის გამო.
წყარო:https://bm.ge/
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
