,
ამერიკის შეერთებული შტატების პრეზიდენტის თქმით, ილონ მასკის “სამთავრობო ეფექტიანობის დეპარტამენტის”, იგივე DOGE-ის მიერ ფედერალური ბიუროკრატიული მანქანის ნაწილობრივი დაშლით გამოთავისუფლებული თანხის ნაწილი, შესაძლოა, ამერიკელებს გადაერიცხოთ, ნაწილით კი — აშშ-ის საგარეო ვალი დაიფაროს.
ამ თემაზე პრეზიდენტმა მას შემდეგ ისაუბრა, რაც ილონ მასკმა განაცხადა, რომ სურს, დაზოგილი თანხის ნაწილი ამერიკელებს საგადასახადო შეღავათების სახით დაუბრუნოს. თუკი მსოფლიოს უმდიდრესი ადამიანის გეგმას დავუჯერებთ და DOGE-მა $6.75-ტრილიონიანი ფედერალური ბიუჯეტის $2 ტრილიონით შემცირება მოახერხა, ესე იგი, თითო ამერიკული ოჯახი $5,000-მდე თანხას მიიღებს.
ამ ტიპის და მასშტაბის ფულადი დახმარება დონალდ ტრამპმა ამერიკელებს პირველი საპრეზიდენტო ვადის დროსაც გამოუყო. იმ დროს, “უფასო ფული” მილიონობით ამერიკელმა მიიღო. მოგვიანებით, ეს ფული, დიდწილად, საფონდო ბირჟაზე აღმოჩნდა, რამაც, ნაწილობრივ, 2021 წლის აღმასვლა განაპირობა.
DOGE-ის განცხადებით, ამ დრომდე, დეპარტამენტმა გადასახადის გადამხდელების კუთვნილი $55 მილიარდი დაზოგა, მაგრამ Bloomberg-ის თანახმად ეს რიცხვი გაცილებით დაბალია და $16.6 მილიარდს შეადგენს. პარალელურად, “სამთავრობო ეფექტიანობის დეპარტამენტის” არსებობის წინააღმდეგ სასამართლო დავები გრძელდება.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
