,
.jpg)
ტურიზმის სექტორისა და ეკონომიკის სამინისტროს წარმომადგენლების შეხვედრა წლის ბოლოს ტრადიციულად მედიის გარეშე დახურულ კარს მიღმა შედგა. ინფორმაცია იმაზე თუ რაზე ისაუბრეს შეხვედრაზე პრესრელიზით გავრცელდა, შეხვედრის მონაწილეთა კომენტარები და შეფასებებიც ეკონომიკის სამინისტრომ გაავრცელა. მთავრობის მიერ საზოგადოებისთვის გაზიარებული ინფორმაციით, უმსხვილესი ბიზნესგაერთიანების - საქართველოს ბიზნეს ასოციაციის ოფისში დაგეგმილი შეხვედრისას ტურიზმის ადმინისტრაციამაც და სექტორის წარმომადგენლებმაც 2025 წლის შედეგებით თავი მოიწონეს.
"ინნ ჯგუფის" თანადამფუძნებელი პაატა კოკაია, რომელიც შეხვედრას ესწრებოდა ამბობს, რომ ტურიზმის ეროვნულმა ადმინისტრაციამ ბიზნესს 2026 წლის გეგმებიც გააცნო. მისი თქმით, მომავალ წელს აქცენტი ევროპის, აზიისა და სპარსეთის ყურის ქვეყნებზე გაკეთდება.
“ეს წლის შეჯამება იყო. შეხვედრა ბიზნეს ასოციაციასთან, ტურიზმის სექტორის წარმომადგენლებთან და ტურიზმის ეროვნულ ადმინისტრაციასთან ერთად გუშინ გაიმართა. შეხვედრას ესწრებოდა ეკონომიკის მინისტრის მოადგილეც. განვიხილეთ 2025 წლის პირველი სამი კვარტალის შედეგები. ტურიზმის წარმომადგენლები 2024 წელთან შედარებით ტურისტების რაოდენობა 7.9%-ით გაიზარდა, ხოლო შემოსავლების მხრივ ზრდა 5.1%-ია. ზაფხულის ტურისტულ სეზონზე დატვირთულობა ნორმალური იყო, საქართველოში მაღალ სეზონზე ტურიზმს საწუწუნო არაფერი აქვს, დატვირთულობის მაჩვენებელი 80%-ს აჭარბებს. რაც შეეხება ზამთარს, გამოწვევები აქ იწყება, განსაკუთრებით იქ, სადაც თოვლი არ არის. ზამთარში ტურისტების ის რაოდენობა, რაც ზაფხულში გვყავს, ვერ იქნება, ამიტომ განთავსების ადგილები ზამთარში, დაბალ სეზონზე, ჭარბადაც გვაქვს.
ძირითადი განხილვა ტურიზმის ეროვნული ადმინისტრაციის გაზრდილ ბიუჯეტს ეხებოდა - რა აქტივობებია დაგეგმილი და რომელ ქვეყნებზე კეთდება აქცენტი. ძალიან სასიხარულოა, რომ ევროპიდან და დიდი ბრიტანეთიდან შემოსული ტურისტების მიერ დახარჯული თანხა რუსეთის შემდეგ მეორე ადგილზეა. ასევე გვითხრეს, რომელ ქვეყნებში აპირებენ თანხების დახარჯვას - ესაა ევროპა, აზია და სპარსეთის ყურის ქვეყნები”, - ამბობს "ინნ ჯგუფის" თანადამფუძნებელი პაატა კოკაია.
წყარო:https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
