გთავაზობთ გასული კვირის (18-24 აგვისტოს) მნიშვნელოვან მოვლენებს საქართველოს ეკონომიკაში.

2025 წლის მეორე კვარტალში საქართველოში უმუშევრობა გაიზარდა

2025 წლის II კვარტალში საქართველოში თვითდასაქმებულთა რიცხოვნობა 29.3 ათასით შემცირდა. ამის შესახებ საქსტატის მიერ დღეს გამოქვეყნებულ სამუშაო ძალის მაჩვენებლებშია აღნიშნული. ოფიციალური სტატისტიკით, 2025 წლის II კვარტალში საქართველოში უმუშევრობის დონე წინა წლის შესაბამის პერიოდთან შედარებით 0.6 პროცენტული პუნქტით გაიზარდა და 14.3 პროცენტი შეადგინა.

ანგარიშის თანახმად, უმუშევრობის ზრდა თვითდასაქმებულთა რაოდენობის კლებამ განაპირობა, ხოლო კონტრაქტით დასაქმებულთა რაოდენობა პირიქით გაიზარდა. 2025 წლის II კვარტალში წინა წლის შესაბამის პერიოდთან შედარებით დაქირავებულთა რიცხოვნობა გაიზარდა 4.7 ათასი კაცით (0.5%) და 940.5 ათასს მიაღწია, ხოლო თვითდასაქმებულთა რიცხოვნობა 29.3 ათასით შემცირდა (6.5%) და 422.2 ათასი შეადგინა. ამავე პერიოდში უმუშევართა რაოდენობა გაიზარდა 7.9 ათასით (3.6%) და 227.6 ათასი შეადგინა.

2025 წლის 7 თვეში საქართველოს ექსპორტი 3.9 მილიარდ ლარამდე გაიზარდა - ქვეყნების სტატისტიკა

2025 წლის იანვარ-ივლისში საქართველოში საქონლით საგარეო სავაჭრო ბრუნვა 10.3%-ით 14 მლრდ 155 მლნ დოლარამდე გაიზარდა. აქედან 7 თვეში ექსპორტი 3 მილიარდ 845 მილიონი დოლარი იყო, რაც წლიურად 9%-ით გაზრდილი მაჩვენებელია, ხოლო იმპორტი 10 მილიარდ 310 დოლარი, ამ შემთხვევაში წლიური ზრდა 10.8%-ია.

2025 წლის იანვარ-ივლისში TOP-10 საექსპორტო პარტნიორი ქვეყნის წილმა საქართველოს მთლიან ექსპორტში 79.9% დაიკავა. ისევე როგორ წინა პერიოდებში, ექსპორტის დიდი ნაწილი ავტომობილების რეექსპორტზე მოდის და აქედან გამომდინარე საექსპორტო გეოგრაფიაში ყირგიზეთი, ყაზახეთი და რუსეთი ლიდერობენ. ამასთან, წელს 7 თვის განმავლობაში საქართველოდან ექსპორტი შემცირდა აზერბაიჯანში, სომხეთსა და თურქეთში ანუ მეზობელ ქვეყნებში, რომლებიც ექსპორტის მიხედვით უმსხვილესი პარტნიორები არიან. TOP-10 ქვეყნის რეიტინგი კი ასე გამოიყურება:

1. ყირგიზეთი - $815.5 მლნ, ზრდა - 38.8%;
2. ყაზახეთი - $494.7 მლნ, ზრდა - 10.8%;
3. რუსეთი - $411.9 მლნ, ზრდა - 1.4%;
4. აზერბაიჯანი - $400.2 მლნ, კლება - 0.1%;
5. სომხეთი - $290 მლნ, კლება - 16.1%;
6. თურქეთი - $196 მლნ, კლება - 31.6%;
7. ჩინეთი - $185 მლნ, ზრდა - 5.3%;
8. ბულგარეთი - $108 მლნ, ზრდა - 166.6%;
9. უზბეკეთი - $103.9 მლნ, ზრდა - 56.5%;
10. შვეიცარია - $66.1 მლნ, ზრდა - 7.8%.

საქართველოს დერეფანში სატრანზიტო ტრაილერების რიცხვი შემცირდა

საქართველოში ტრაილერების გატარებით მიღებული შემოსავალი შემცირების ტენდენციას ინარჩუნებს.

სახელმწიფო ხაზინის მონაცემებით, წელს 7 თვეში ქვეყნის გზებით 277 058 საერთაშორისო სატვირთო ავტომობილმა ისარგებლა, მათ მიერ ბიუჯეტში გადახდილმა თანხამ კი 96.970 მლნ ლარი შეადგინა.

წლიურად, ბიუჯეტში გადახდილი გზათსარგებლობის გადასახადი 5.8 მილიონი ლარით ანუ 6%-ით არის შემცირებული. ეს იმას ნიშნავს, რომ წელს საქართველოს გზებით თითქმის 17 000-ით ნაკლებმა ტრაილერმა გაიარა.

2025 წლის 7 თვეში ქართულმა ბანკებმა 1.82 მილიარდი ლარის მოგება მიიღეს

2025 წლის 7 თვეში საქართველოში მოქმედმა კომერციულმა ბანკებმა 1.82 მილიარდი ლარის მოგება გამოიმუშავეს - ამის შესახებ ბანკების მიერ სებ-ისთვის წარდგენილი ფინანსური ანგარიშგებებიდან ხდება ცნობილი. მთლიანობაში აღნიშნული თანხა 2024 წლის ანალოგიურ პერიოდში არსებულ მოგებასთან შედარებით 75 მილიონი ლარით, ანუ 4%-ით მეტია. ბანკებს შორის მოგებით პირველ ადგილზე კვლავ "საქართველოს ბანკია", რაც 2025 წლის 7 თვეში 922 მილიონ ლარს შეადგენდა, ეს თანხა წლიურად 8%-ით არის გაზრდილი. მეორე ადგილს "თიბისი ბანკი" იკავებს 686 მილიონი ლარით, რაც წლიურად 0.4%-ით არის გაზრდილი. მესამე პოზიციაზე კვლავინდებურად "ლიბერთი ბანკია" 74 მილიონი ლარით, რაც წინა წელთან შედარებით 12%-ით გაზრდილი მოგების მაჩვენებელია.

რაც შეეხება მოგების მიხედვით სიის ბოლოში მყოფ ბანკებს, 4 კომერციული ბანკი ზარალზეა, მათ შორის ყველაზე დიდი - 41 მილიონი ლარის ზარალი აქვს "ვითიბი ბანკს".

მიკროსაფინანსო სექტორმა 2025 წლის პირველ ნახევარში 71 მილიონი ლარის მოგება მიიღო

მიკროსაფინანსო სექტორმა 2025 წლის პირველი ნახევარი 70.6 მილიონის წმინდა მოგებით დახურა. წლიურად წმინდა მოგება 3.7 მილიონით, ანუ 5.5%-ით გაიზარდა. მიუხედავად იმისა, რომ სექტორი წელს 2-მა მსხვილმა მოთამაშემ დატოვა და მიკრობანკების ლიცენზიით გააგრძელა ოპერირება, მისოებმა მომგებიანობის ზრდა შეძლეს, თუმცა ემბისის და კრისტალის მისო-ების სექტორიდან გასვლის გამომ დაახლოებით 212 მლნ ლარით 1.68 მილიარდ ლარამდე შემცირდა მისოების საკრედიტო პორტფელი. სულ მიკროსაფინანსო სექტორს 813 117 სესხი აქვს გაცემული.

საკრედიტო პორტფელში სალომბარდე კრედიტები ლიდერობს 1.3 მილიარდი ლარით, მეორე ადგილზე კი 252 მილიონი ლარით სამომხმარებლო სესხებია.

მობილურმა ოპერატორებმა 2025 წლის 6 თვეში 438 მილიონი ლარის შემოსავალი მიიღეს

2025 წლის 6 თვეში საქართველოს მოსახლეობამ მობილურ კავშირგაბმულობაში რეკორდული მოცულობის თანხა 438 მილიონი ლარი გადაიხადა - ამის შესახებ კომუნიკაციების კომისიის მიერ გამოქვეყნებული ანგარიშიდან ხდება ცნობილი. სტატისტიკის მიხედვით, 2024 წლის ანალოგიურ პერიოდთან შედარებით მობილური ოპერატორების შემოსავლები 26 მილიონი ლარით, ანუ 6%-ით არის გაზრდილი.

კომუნიკაციების კომისიის სტატისტიკის თანახმად, ქართული მობილური ოპერატორების აქტიური აბონენტების რაოდენობა 5,756,274-მდე არის გაზრდილი, რაც წლიურ ჭრილში 172,000 აბონენტის მატებას ნიშნავს.

2025 წლის იანვარ-ივნისში მობილური ოპერატორების ფინანსური მაჩვენებლები ასე ნაწილდება:

• მაგთი - 206,534,442 ლარი, 2,361,432 აბონენტი, ბაზრის 41%, შემოსავლის ზრდა იანვარ-ივნისში 5.4%;
• სილქნეტი - 154,195,437 ლარი, 2,041,811 აბონენტი, ბაზრის 35.5%, შემოსავლების ზრდა იანვარ-ივნისში 6.2%;
• სელფი მობაილი - 76,936,360 ლარი, 1,334,723 აბონენტი, ბაზრის 23%, შემოსავლების ზრდა იანვარ-ივნისში 8.9%.

2025 წლის 6 თვეში საქართველოს რკინიგზის ტვირთბრუნვა შემცირდა

კომპანიის მმართველობითი ანგარიში ცხადყოფს, რომ 6 თვეში რკინიგზით 6.3 მილიონამდე ტონა ტვირთი გადაიზიდა, რაც წლიურად 8.1%-იანი კლებაა. წლიურ ჭრილში 9%-ით, 3.2 მლნ ტონამდე შემცირდა ტვირთის მოცულობა წლის მეორე კვარტალშიც.

წელს, იანვარ-ივნისში ტრანზიტული ტრანსპორტირების წილი გადაზიდული მთლიანი მოცულობის 59% შეადგენდა. კერძოდ, “საქართველოს რკინიგზა” წელს 3.7 მლნ ტონა ტრანზიტულ ტვირთს მოემსახურა, კლება კი 10.6%-ი იყო.

სარკინიგზო კომპანია მიუთითებს, რომ ტრანზიტულ ტვირთებში გადაზიდვის 11%-იანი შემცირება, ძირითადად, ყაზახეთიდან გადაზიდვების შემცირებამ განაპირობა. კლება 478.3 ათასი ტონა იყო.

წყარო: https://bm.ge/