,
.jpg)
გთავაზობთ გასული კვირის 23-29 დეკემბრის მნიშვნელოვან მოვლენებს საქართველოს ეკონომიკაში
27 დეკემბერს ბიძინა ივანიშვილს ამერიკის შეერთებულმა შტატებმა ფინანსური სანქციები დაუწესა. ივანიშვილის სანქცირება მოხდა რუსეთის მავნე საგარეო გავლენის შეზღუდვის სასანქციო პაკეტიდან.
აშშ-ის სახელმწიფო მდივნის ენტონი ბლინკენის განცხადებით, ბიძინა ივანიშვილის ხელისუფლებამ საქართველოში შეზღუდა სიტყვის და გამოხატვის თავისუფლება, გაატარა ძალადობრივი რეპრესიები დემონსტრანტებისა და მედიის წინააღმდეგ, ქვეყანა ევროატლანტიკური გზიდან ჩამოაცილა და საქართველო რუსეთს დაუახლოვა.
სანქციები ვრცელდება ბიძინა ივანიშვილის აქტივებსა და იმ კომპანიებზე, რომლებშიც ივანიშვილი 50%-ზე მეტს ფლობს. სანქცირების გადაწყვეტილება შეეხო ივანიშვილის მიერ Credit Suisse-თან მოგებულ დავას, რომელშიც მოგებულ თანხას ივანიშვილი მხოლოდ აშშ-ის თანხმობის არსებობის შემთხვევაში მიიღებს.
დღეს ქართული ოცნება ხალხის ძალის წევრის, მიხეილ ყაველაშვილის პრეზიდენტად ინაუგურაციას გეგმავს. ყაველაშვილი 224-მა ხმოსანმა 14 დეკემბერს გამართულ არჩევნებზე აირჩია, სადაც ყაველაშვილი ერთადერთი კანდიდატი იყო.
ამასთან, საერთაშორისო საზოგადოება მხარდაჭერას უცხადებს საქართველოს მეხუთე პრეზიდენტ სალომე ზურაბიშვილს, როგორც ერთადერთ ლეგიტიმურად არჩეულ ლიდერს.
23 დეკემბერს ქართული ოცნების პრემიერ-მინისტრი ირაკლი კობახიძე საქართველოში მოქმედი მსხვილი ბიზნესის წარმომადგენლებს შეხვდა. შეხვედრას სულ 100-მდე ბიზნესმენი დაესწრო და ის ოთხ საათს გაგრძელდა. BMG-სთან საუბარში შეხვედრის დამსწრე კერძო სექტორის წარმომადგენლები აღნიშნავენ, რომ საუბრის უდიდესი ნაწილი თავად ირაკლი კობახიძის ვრცელ განცხადებას დაეთმო და დარჩა პასუხგაუცემელი კითხვები, რომლებზეც კობახიძეს არ უსაუბრია. ამასთან, შეხვედრის შემდეგ გავრცელებული ცნობის თანახმად, შეხვედრაზე ოცნების მისამართით, განსაკუთრებით კი საგარეო კურსის ცვლილების მხრივ კითხვები დასვა ტელეიმედის მფლობელმა ირაკლი რუხაძემ, რომელმაც შემდგომში საკითხზე ვრცელი განცხადება გააკეთა.
მთლიანობაში, შეხვედრის დამსწრეთა ცნობით ეს შეხვედრა მარტივ ვითარებაში არ წარმართულა, ხოლო ეკონომიკის მინისტრის განცხადებით მომავალში კიდევ ერთი შეხვედრა იგეგმება უფრო მეტად "განსხვავებული პოზიციის" მქონე ბიზნესებთან.
ეროვნულმა ბანკმა ნოემბრის თვის სადეპოზიტო სტატისტიკა გამოაქვეყნა. ანგარიშის თანახმად, გასული თვის განმავლობაში დეპოზიტების ლარიზაციის კოეფიციენტი ერთი პროცენტით შემცირდა და მან 48.3% შეადგინა. ნოემბერში ლარის დეპოზიტები სულ 351 მილიონი ლარით, 28 მილიარდ ლარამდე შემცირდა. ეს 2023 წლის მარტის შემდეგ დეპოზიტების ლარიზაციის ყველაზე დაბალი მაჩვენებელია, ამასთან აგვისტოს შემდეგ, დეპოზიტების ლარიზაცია 3.9 პროცენტული პუნქტით არის შემცირებული.
"საქართველოს საბანკო სისტემა მკაცრად იცავს საერთაშორისო სანქციებს"- ასე პასუხობს ეროვნული ბანკი BMG-ის კითხვას, მიიჩნევს თუ არა სებ-ი, რომ 2023 წლის საგამონაკლისო ბრძანება ვრცელდება „გლობალური მაგნიტსკის აქტით“ გათვალისწინებულ სანქციებზეც.
სავარაუდოდ, იურიდიულად, ეროვნული ბანკის პრეზიდენტის მოვალეობის შემსრულებლის, ნათია თურნავას მიერ 2024 წლის 19 სექტემბერს გამოცემული საგამონაკლისო ბრძანება „გლობალური მაგნიტსკის აქტის“ სანქციებს არ ეხება, რადგან ბრძანება მხოლოდ უკრაინაში რუსეთის შეჭრის გამო დაწესებული სანქციების აღსრულებას არეგულირებს. შესაბამისად, ეს გამონაკლისი ვრცელდება მხოლოდ იმ მოქალაქეებზე, რომლებიც დასანქცირდნენ უკრაინასთან დაკავშირებული საერთაშორისო სანქციების ფარგლებში, და არა სხვა სასანქციო ნორმებით, მათ შორის „გლობალური მაგნიტსკის აქტის“ პაკეტზე.
საქართველოში გერმანიის საელჩო აქვეყნებს დამატებით ინფორმაციას გერმანიის ეკონომიკის სამინისტროს მიერ მიღებულ გადაწყვეტილებასთან დაკავშირებით, რაც 237 მილიონი ევროს საკრედიტო დაფინანსების შეჩერებას უკავშირდება. საუბარია საქართველოში მაღალი ძაბვის გადამცემი ხაზების მშენებლობის, ბათუმის წყალმომარაგების სისტემის გაუმჯობესების და ბათუმში მწვანე წყალბადზე მომუშავე ავტობუსების შემოყვანის პროექტების შეჩერებაზე.
სარეიტინგო სააგენტო "Fitch"-მა "საქართველოს რკინიგზის" საკრედიტო რეიტინგის მოლოდინი "პოზიტიურიდან" "სტაბილურამდე" შეამცირა, ამასთან ორგანიზაციამ რეიტინგი უცვლელად "BB-“ დონეზე დაადასტურა.
Fitch-ის მიერ მიღებული გადაწყვეტილება თანხვედრაშია საქართველოს სახელმწიფოს საკრედიტო რეიტინგის მოლოდინის გაუარესებასთან, რადგანაც რამდენიმე დღის წინ ორგანიზაციამ სახელმწიფოს სუვერენული რეიტინგის მოლოდინი "სტაბილურიდან" "ნეგატიურამდე" შეამცირა, რაც 2024 წლის განმავლობაში უკვე მეორე შემცირებაა, რადგანაც ზაფხულში რეიტინგის მოლოდინი "პოზიტიურიდან" "სტაბილურამდე" შემცირდა. ამასთან, Fitch-მა უცვლელად დატოვა სახელმწიფოს რეიტინგი და ის კვლავ "BB" დონეზე შეინარჩუნა.
საქართველოს ეროვნულმა ბანკმა ნოემბერში $43 მილიონი დოლარის ღირებულების ოქრო ზოდებისა და სადეპოზიტო სერტიფიკატების სახით გაყიდა - ამის შესახებ სებ-ში BMG-ის კითხვაზე პასუხისას განაცხადეს. ეროვნული ბანკის განმარტებით, მათ მიერ ოქროს შესყიდვა მოხდა ბაზარზე არსებული მოთხოვნების შესაბამისად, რომლის რეალიზაციაც ადგილობრივი მოთხოვნის შესაბამისად მოხდა.
სებ-მა საინვესტიციო დანიშნულების ოქროს შესყიდვა და მისი რეალიზაცია 2023 წლის დეკემბერში დაიწყო და 2023 წლის დეკემბრიდან-მაისის პერიოდში სებ-ი სავალუტო რეზერვების მიღმა თვიდან თვემდე საშუალოდ 2 მილიონი დოლარის ოქროს ინახავდა, თუმცა 2024 წლის მაისიდან ამ ოქროს მოცულობა ჯერ 10 მილიონამდე გაიზარდა, ხოლო უკვე სექტემბრისთვის მისმა მოცულობამ 47 მილიონ დოლარს მიაღწია, ნოემბერში კი სებ-მა 45 მილიონი დოლარის ოქრო გაყიდა, რის შედეგადაც ამ ოქროს მარაგის მოცულობა 3.7 მილიონ დოლარამდე შემცირდა. ბაზარზე ზოდებისა და სერტიფიკატების სახით რეალიზებული ოქროს მოცულობა დაახლოებით 511 კილოგრამს შეადგენს.
საქართველო თურქეთს ახალი მაგისტრალით დაუკავშირდება. ზღვის სანაპიროს მომიჯნავედ არსებული გზა ჩანაცვლდება ახალი ასფალტ ბეტონის 11 კილომეტრის სიგრძის გზით, რომელიც 7.6 კილომეტრის სიგრძის ახალი გვირაბის მშენებლობას და მდინარე ჭოროხზე 1,471 მეტრის სიგრძის ხიდის აგებას.
პროექტი აზიის განვითარების ბანკის (ADB) დაფინანსებით შენდება და მისი დასრულება 2028 წელს იგეგმება. ახალ მაგისტრალზე მთლიანობაში 620 მილიონი ლარი ($225 მილიონი) უნდა დაიხარჯოს.
პროექტთან დაკავშირებით 25 დეკემბერს გარემოსდაცვითი ზედამხედველობის სამსახურმა ნებართვა გასცა, რასაც წინ საჯარო განხილვების რამდენიმეთვიანი პროცესი უსწრებდა, რა პერიოდის განმავლობაშიც პროექტში მცირედი კორექტირებები შევიდა.
წყარო:https://bm.ge/
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
